PELAJAR 35
Chara Ngaga Pemutus ti Manah
Semua kitai patut ngaga mayuh pemutus ba pengidup. Sekeda pemutus kitai bisi empas ti besai ngagai pengidup kitai sereta kaul kitai enggau Jehovah. Ambika chunto, kitai engka patut ngaga pemutus bekaul enggau kereja, endur diau, sereta kaling pengidup. Lebuh kitai ngaga pemutus ti manah, kitai deka ngagaka ati Jehovah sereta idup enggau lantang.
1. Baka ni Bup Kudus ulih nulung nuan ngaga pemutus ti manah?
Sebedau ngaga pemutus, nuan ulih besampi minta iring ari Jehovah sereta mansik Bup Kudus kena meda runding Iya pasal pekara nya. (Bacha Jaku Dalam 2:3-6.) Kadang-kadang, Bup Kudus ngembuan pesan ti nyemetak pasal pekara nya. Enti pia, pemutus ti pemadu manah iya nya, nitihka pesan nya.
Baka ni enti nadai pesan ti nyemetak ari Bup Kudus? Jehovah agi ulih ngena prinsip Bup Kudus “nunjukka jalai ti patut ditengah.” (Isaiah 48:17) Nama reti prinsip Bup Kudus? Prinsip Bup Kudus nya batang pemendar ke nulung kitai nemu asai ati sereta runding Jehovah. Prinsip ke baka tu mega ulih ditemu ba sekeda cherita dalam Bup Kudus. Lebuh kitai bebendar nguji nemu runding Jehovah, kitai deka ngaga pemutus ti ngelantangka ati Iya.
2. Nama utai ke patut diperundingka nuan sebedau ngaga pemutus?
Bup Kudus madah: “Orang ke pintar deka nyingkang enggau bejimat.” (Jaku Dalam 14:15) Nya alai, berunding meh enggau dalam sebedau ngaga pemutus. Tanya diri empu: ‘Nama prinsip Bup Kudus ke ulih dikena aku? Nama empas ari pemutus ke digaga aku ngagai diri empu enggau orang bukai? Ke pemadu beguna, kati pemutus aku ngasuh Jehovah gaga ati?’—Ulang Adat 32:29.
Jehovah bisi hak nentuka bagi utai ti manah enggau utai ti jai. Lebuh kitai nitihka pesan Jehovah, kitai benung ngelatih penemu ati kitai. Penemu ati nya penau ngelala utai ti betul enggau utai ti salah. (Rome 2:14, 15) Penemu ati ke dilatih tu ulih nulung kitai ngaga pemutus ti manah.
BELAJAR MAYUH AGI
Peratika baka ni prinsip Bup Kudus enggau penemu ati kitai nulung kitai ngaga pemutus ti manah.
3. Awakka Bup Kudus ngiring nuan
Baka ni prinsip Bup Kudus ulih ngiring kitai lebuh ngaga pemutus? Mainka VIDEO, lalu kerandauka tanya tu.
-
Nama reti peluang bibas milih?
-
Nama kebuah Jehovah meri kitai peluang bibas milih?
-
Nama utai ke diberi Jehovah ngambika kitai ulih ngena peluang bibas milih tu enggau manah?
Bacha Epesus 5:15, 16 kena meda siti chunto prinsip Bup Kudus. Udah nya kerandauka baka ni nuan ulih ngena ‘semua jam nuan enggau badas’ ngambika ulih . . .
-
macha Bup Kudus enggau tetap.
-
nyadi laki, bini, apai, indai, tauka anak ti manah agi.
-
datai gempuru.
4. Latih penemu ati nuan ngambika ulih ngaga pemutus ti manah
Enti bisi pesan ti nyemetak dalam Bup Kudus, kitai ulih ngaga pemutus enggau senang. Tang baka ni enti nadai pesan ti nyemetak dalam Bup Kudus? Mainka VIDEO, lalu kerandauka tanya tu.
-
Nama utai ke digaga menyadi indu dalam video nya kena ngelatih penemu ati iya ngambika ulih ngaga pemutus ti ngagaka ati Jehovah?
Nama kebuah kitai enda patut ngasuh orang bukai ngaga pemutus ke kitai? Bacha Hebrew 5:14, lalu kerandauka tanya tu:
-
Kitai engka ngasaika nya senang agi enti orang bukai ngaga pemutus ke kitai. Tang nama utai ke patut ditemu kitai?
-
Nama utai ti bisi ke ulih dikena matih penemu ati kitai ngambika ulih ngaga pemutus ti manah?
Penemu ati nya baka kar ke ngiring jalai pengidup kitai
5. Bebasaka penemu ati orang bukai
Tiap iku orang bisi pilih ti bebida. Baka ni kitai ulih masa penemu ati orang bukai? Peratika dua chunto tu:
Chunto 1: Seiku menyadi indu baru pindah ngagai eklisia bukai. Sekeda menyadi indu ba eklisia nya enda nyamai ati lebuh meda iya rindu nganta.
Bacha Rome 15:1 enggau 1 Korint 10:23, 24, lalu kerandauka tanya tu:
-
Nama pemutus ke engka digaga menyadi indu nya enti iya nitihka jaku lalau ba ayat tu? Taja pan penemu ati nuan ngemendarka nuan ngereja siti-siti utai, tang nama deka digaga nuan enti penemu ati orang berasai enda nyamai?
Chunto 2: Seiku menyadi lelaki nemu Bup Kudus nadai nagang kitai ari ngirup ai bisa, tang iya milih ngambika enda ngirup. Lebuh makai begulai enggau bala menyadi bukai, iya meda bala menyadi lelaki ke bukai ngirup ai bisa.
Bacha Pengajar 7:16 enggau Rome 14:1, 10, lalu kerandauka tanya tu:
-
Nama pemutus ke engka digaga menyadi lelaki nya enti iya nitihka jaku lalau ba ayat tu? Nama deka digaga nuan enti orang bukai ngereja utai ti ngasuh penemu ati nuan berasai enda nyamai?
Chara ngaga pemutus ti manah
1. Minta tulung ari Jehovah sebedau ngaga pemutus.—James 1:5.
2. Pansik Bup Kudus enggau litaricha bepelasarka Bup Kudus kena ngiga prinsip Bup Kudus ti engkeman. Nuan tau ngiga jaku ajar ari bala menyadi Kristian ti tegap ba pengarap.
3. Perundingka empas ari pemutus ke digaga nuan ngagai penemu ati nuan enggau orang bukai.
BISI ORANG MADAH: “Nuan ulih ngereja utai sepeneka ati nuan. Enda ibuh berundingka orang bukai.”
-
Nama kebuah nya beguna berundingka asai ati Petara, enggau orang bukai?
LANSA
Kitai ulih ngaga pemutus ti manah lebuh kitai berundingka asai ati Jehovah pasal pekara nya sereta berunding sekalika pemutus ke digaga kitai nya deka nulung tauka ngachau orang bukai.
Ulang Kaji
-
Baka ni nuan ulih ngaga pemutus ti ngagaka ati Jehovah?
-
Baka ni nuan ulih matih penemu ati nuan?
-
Baka ni nuan ulih bebasaka penemu ati orang bukai?
ARAM BELAJAR
Baka ni nuan ulih ngaga pemutus ti ngelantangka ati Petara?
“Gaga Pemutus ti Ngemuliaka Petara” (Menara Jaga, 15 April 2011)
Belajar mayuh agi pasal chara Jehovah meri kitai jaku ajar.
Peratika utai ti nulung seiku nembiak ngaga pemutus ti mar.
Belajarka baka ni nuan ulih ngaga pemutus ti ngelantangka Jehovah taja pan Bup Kudus nadai ngembuan pesan ti nyemetak pasal pekara nya.
“Kati Nuan Seruran Begunaka Pesan ti Nyemetak ari Bup Kudus?” (Menara Jaga, 1 Disember 2003)
Nuan Engka Rindu Meda Tu
UTAI KE SUAH DITANYA
Nama Reti Kursus Belajarka Bup Kudus ke Diatur Saksi-Saksi Jehovah?
Nengah kursus ke pechuma ti diatur Saksi-Saksi Jehovah, nuan ulih ngena sebarang salin Bup Kudus ke dikembuan nuan. Nuan mega diperansang mai semua diri sebilik sereta bala kaban nuan sama enggau kursus tu.
