Diatu udah dua hari Natanel nyadi murid Jesus. Jesus enggau sekeda murid iya mupuk ngagai utara Galili, menua asal sida. Sida deka ngagai Kana, menua asal Natanel. Kana nya ba endur ti bebukit ba utara Nasaret, endur Jesus dibesaika. Sida dibai ngagai siti pengerami tikah ba dia.

Indai Jesus pan bisi ba dia. Maria nya siku ari kaban pengantin nya, lalu Maria engka bisi nulung sida nyambut penatai temuai. Lebuh iya meda wain nyauka abis, Maria terus madah ngagai Jesus: “Wain sida udah abis.”—John 2:3.

Kebendar iya, Maria minta tulung Jesus nambahka wain. Tang Jesus nyaut iya: “Indai, nama kaul hal nya enggau tua?” (John 2:4) Jesus nya Raja dipilih Petara. Nya alai iya patut nitihka iring Apai iya ti di serega, ukai nitihka iring ari ruang bilik iya tauka kaban iya. Maria semina madah ngagai sida ke nyadung wain ba dia: “Kereja aja utai ke dipadahka iya ngagai kita.”—John 2:5.

Bisi enam igi tajau ba dia, tiap igi tajau ulih nyimpan lebih ari empat puluh liter ai. Jesus ngasuh bala ke nyadung wain: “Isi tajau nya ngena ai.” Udah nya ku Jesus: “Kauk ai nya mimit lalu bai ngagai ketuai ke ngatur pengerami tikah.”—John 2:7, 8.

Ketuai ke ngatur pengerami tikah nya alit ati laban wain ba tajau nya amat nyamai. Tang iya enda nemu wain nya digaga ari kereja ajih. Iya ngangauka pengantin lelaki, lalu madahka: “Kesuah iya, orang mantaika wain ti manah dulu. Pengudah bala temuai mabuk, nya baru sida mantaika wain ke enda entu nyamai. Tang nuan udah nyimpan wain ti manah nyentuk ke diatu.”—John 2:10.

Tu meh kereja ajih Jesus ti keterubah. Lebuh bala murid iya meda kereja ajih tu, pengarap sida tentu dikeringka. Pengudah nya, Jesus, indai iya, enggau bala menyadi tiri iya, mupuk ngagai Kapernaum ke bisi ba begian barat laut Tasik Galili.