Pengudah Jairus meda Jesus ngeraika siku indu ke balat datai kain, iya pechaya Jesus mega ulih ngeraika anak iya. Tang iya engka ngasaika ‘maya tu, anak indu iya tentu udah mati.’ (Matthew 9:18) Kati Jesus agi ulih nulung iya?

Lebuh Jesus benung berandau enggau indu ke digeraika iya, sekeda orang ari rumah Jairus datai lalu madah ngagai Jairus: “Anak indu nuan udah mati! Anang ngiruh Pengajar nya agi.”—Mark 5:35.

Jairus tentu amat tusah ati lebuh iya ninga berita nya. Taja pan iya siku pemesai ke bisi kuasa sereta dipebasa ba menua iya, tang iya nadai daya ngereja nama-nama utai. Jairus semina bisi siku anak indu tang iya udah mati. Tang pengudah Jesus ninga berita ti ngenusahka ati nya, iya madah ngagai Jairus: “Anang irau, tang ayanka pengarap.”—Mark 5:36.

Lebuh Jesus tama ngagai rumah Jairus, iya meda orang begau. Lalu iya ninga orang nyau bekeduie sereta rauh-rauh nyabak sereta mandam dada diri ketegal tusah ati. Lalu Jesus madahka utai ke ngasuh orang mayuh tekenyit: “Anak mit tu ukai mati, tang iya semina tinduk aja.” (Mark 5:39) Orang ba dia ketawa lebuh sida ninga jaku Jesus, laban sida nemu indu nya udah mati. Tang nengah kuasa ke diberi Petara ngagai iya, Jesus deka nunjukka orang ke udah mati ulih idup baru. Nya baka ngerakka orang ke benung tinduk jenak lalu ngasuh iya dani.

Jesus ngasuh semua orang pansut ari rumah nya. Tang iya mai Peter, John, James, enggau apai indai indu nya enggau iya. Udah nya Jesus megai jari anak mit nya, lalu bejaku: “‘Talita kumi,’ reti nya: ‘Endu, aku madah ngagai nuan, angkat nuan!’” (Mark 5:41) Tekala nya, anak mit nya angkat lalu bejalai. Naka meh pengaga ati Jairus enggau bini iya lebuh anak sida angkat idup baru! Udah nya Jesus ngasuh sida meri anak mit nya utai diempa.

Sebedau tu, Jesus enda ngasuh orang ke digeraika iya nusui utai ti digaga iya ngagai orang mayuh. Jesus mega madah utai ti sama ngagai Jairus enggau bini iya. Tang, berita pasal utai ke nyadi tu ngelekai “ngagai serata menua nya.” (Matthew 9:26) Enti orang ke dikesayauka nuan angkat idup baru, nuan mega tentu berasai gagit amat ati, enda pia? Lalu tu meh kali ti kedua Bup Kudus nyebut pasal Jesus ngangkatka orang idup baru.