Peter udah ninga jaku lalau Jesus pasal chara mutarka penanggul enggau sesiku orang. Tang Peter deka nemu berapa mayuh kali iya patut ngereja nya.

Peter nanya Jesus: “Tuan, enti menyadi aku bedosa ngelaban aku, berapa kali aku patut ngampun iya? Tujuh kali?” Sekeda tuai pengarap ngajar nembiak sida pasal sida patut ngampunka orang nyentuk ngagai tiga kali. Ketegal nya, Peter engka ngasaika diri amat manah laban iya sanggup ngampunka sesiku orang nyentuk ngagai “tujuh kali.”—Matthew 18:21.

Taja pia, Jesus enda ngajar murid iya ngingatka penyalah orang bukai. Nya alai, iya ngemetulka runding Peter. Ku Jesus nyaut: “Aku madah ngagai nuan, ukai 7 kali, tang nyentuk ngagai 77 kali.” (Matthew 18:22) Reti iya, sesiku orang enda patut ngira berapa kali iya patut ngampunka orang bukai. Nya alai, Peter mega enda patut netapka berapa kali iya patut ngampunka orang bukai.

Jesus madah ngagai Peter enggau orang bukai siti jaku sempama kena ngajar sida kebuah patut ngampunka orang bukai. Ulun ba jaku sempama nya enda neladan raja ti ngayanka pengasih ngagai iya. Raja nya deka ngumpul utang ari bala ulun iya. Siku ulun ke berutang 10,000 talenta [60,000,000 denari] dibai betemu enggau raja. Ketegal utang nya amat mayuh, nya alai ulun nya tentu enda ulih tebayarka utang nya. Nyadi, raja ngasuh iya dijual sama enggau bini sereta bala anak iya, kena mayar utang nya. Ketegal nya, ulun nya besugang ba mua raja lalu minta kasih ari iya. Ku ulun nya: “Sabar meh enggau aku. Aku deka mayar semua utang aku.”—Matthew 18:26.

Raja nya kasihka ulun nya. Nya alai, iya muai semua utang ulun nya taja pan utang nya amat mayuh. Pengudah nya, ulun nya ngiga siku da agi ulun ke berutang seratus denari enggau iya. Iya nangkap ulun nya lalu nyekal iya. Ku iya: “Bayar semua utang nuan.” Tang ulun nya besugang lalu minta kasih ari iya. Ku iya: “Sabar meh enggau aku. Aku deka mayar utang aku.”  (Matthew 18:28, 29) Ba senentang tu, ulun ke jai nya enda neladan raja ke udah ngampunka iya sereta muai semua utang iya. Ulun ke siku da agi nya berutang jauh lebih mimit enti dibanding enggau utang iya empu. Tang, iya muai ulun nya ngagai rumah jil nyentukka ulun nya ulih mayar abis utang iya.

Jesus madahka bala ulun ke bukai madahka pekara nya ngagai raja. Raja balat ringat lalu ngangauka ulun nya. Ku raja nya madahka: “Nuan tu ulun ti jai. Aku udah muai semua utang nuan, lebuh nuan minta kasih ari aku. Endaka nuan patut kasihka kaban nuan, baka aku ke udah kasihka nuan?” Pengudah nya, raja nya ngasuh orang ngurung ulun nya dalam rumah jil, datai ke iya mayar semua utang iya. Lalu Jesus ngujungka jaku iya enggau madahka: “Nya meh utai ke deka dikereja Apai aku ti ba serega ngagai kita, enti genap iku kita enda ngampun menyadi kita enggau pengabis ati.”—Matthew 18:32-35.

Jaku sempama nya ngajar kitai kebuah patut ngampunka orang bukai. Iya ke amat, kitai udah mayuh bedosa ba mua Petara tang Iya sanggup ngampunka kitai. Enti dibanding enggau dosa kitai ngagai Petara, penyalah ke dikereja menyadi Kristian ngagai kitai mit aja. Lalu Jehovah udah ngampunka kitai ukai sekali, tang beribu-ribu kali. Engka bisi menyadi Kristian ke udah bekali-kali ngereja penyalah ngagai kitai, lalu kitai bisi kebuah enda nyamai ati enggau iya. Taja pia, endaka kitai patut ngampunka iya? Baka ke kala diajar Jesus lebuh iya meri Jaku Ajar ba Atas Bukit, Petara deka ‘ngampunka dosa kitai baka kitai ke ngampunka orang ke bedosa ngagai kitai.’—Matthew 6:12.