Jesus enggau bala murid iya udah datai ba Betsaida. Orang mayuh mai siku lelaki ke buta ngagai iya lalu ngasuh Jesus ngeraika lelaki nya.

Jesus megai jari lelaki ke buta nya, lalu mai iya pansut ari genturung pendiau nya. Pengudah ngeludah mata iya, Jesus nanya: “Kati nuan bisi meda utai?” Iya nyaut: “Aku bisi meda orang, tang sida baka pun kayu ke bejalai kin kia.” (Mark 8:23, 24) Jesus ngengkahka jari iya baru ba mata lelaki nya, lalu ngeraika iya. Jesus ngasuh lelaki nya pulai, tang enda ngasuh lelaki nya tama baru ngagai genturung pendiau nya.

Udah nya, Jesus enggau bala murid iya bejalai tunga ke utara ngagai Kaisaria Pilipi. Sida patut niki bukit penyauh 40 kilometer. Sida deka ngagai siti agi genturung pendiau ke bisi ba atas bukit. Ari nya, sida ulih meda Bukit Hermon ti jauh tinggi agi ari bukit nya sereta penuh enggau seleju. Sida engka bejalai pengelama lebih kurang dua hari.

Bisi sekali ba pejalai nya, Jesus mupuk deka besampi kediri. Iya bisi semilan tauka sepuluh bulan da agi sebedau iya deka dibunuh. Nya alai, Jesus irau pasal bala murid iya. Enda lama sebedau tu, mayuh bala murid badu nitihka iya. Bisi mega keliru tauka kecewa. Sida enda mereti nama kebuah iya enggai nyadi raja, tauka nama kebuah iya enda meri tanda kena nunjukka sapa iya ti bendar.

Lebuh Jesus benung besampi kediri, bala murid iya datai ngagai iya. Jesus nanya sida: “Ba penemu orang, sapa Anak Mensia?” Sida nyaut: “Bisi orang ngumbai iya John Pemaptisa. Sekeda ngumbai iya Elijah. Lalu sida ke bukai, ngumbai iya Jeremiah tauka siku ari nabi ti bukai.” Orang mayuh ngumbai Jesus siku ari nabi ke udah diangkatka baru. Kena nemu runding sida, Jesus nanya sida: “Ba kita, sapa aku tu deh?” Peter lalu jampat nyaut: “Nuan tu Kristus, Anak Petara ti idup.”—Matthew 16:13-16.

Jesus madah Peter patut gaga ati laban Petara udah mandangka utai tu ngagai iya. Ku Jesus: “Aku mega madah ngagai nuan: Nuan tu Peter. Ba atas batu tu, aku deka nirika raban gempuru aku. Lalu pintu Kubur enda ulih ngalahka iya.” Jesus madah iya deka nirika raban gempuru, lalu indah Kubur enda ulih ngalahka sida ba raban gempuru enti sida tetap setia ba dunya tu. Iya besemaya ngagai Peter: “Aku deka meri nuan kunchi Perintah serega.”—Matthew 16:18, 19.

Jesus enda meri Peter penuduk ti pemadu tinggi entara bala rasul. Jesus mega enda ngaga Peter nyadika pugu raban gempuru. Tu ketegal, Jesus empu nyadi batu alai raban gempuru deka didirika. (1 Korint 3:11; Epesus 2:20) Tang, Peter deka nerima tiga iti kunchi. Iya  deka muka peluang ngagai beberapa iti raban orang ngambika sida ulih tama ngagai Perintah serega.

Peter deka ngena kunchi keterubah ba Pentikos taun 33 M. Iya deka nunjukka ngagai orang Judah enggau orang ke megai pengarap Judah pasal utai ke patut digaga sida ngambika ulih diselamatka. Iya mega deka ngena kunchi ti kedua muka peluang ngagai orang Samaria ngambika sida mega ulih tama ngagai Perintah serega. Udah nya ba taun 36 M., Peter deka ngena kunchi ti ketiga muka peluang ngagai orang bansa bukai ke enda besunat, baka Kornelius enggau orang bukai.—Surat Kereja Rasul 2:37, 38; 8:14-17; 10:44-48.

Maya nya, Jesus mega madah iya deka diperinsa sereta dibunuh ba Jerusalem. Nya alai, bala rasul iya balat tusah ati. Udah nya, Peter mai iya ke tisi lalu belabuh ngerara iya. Ku Peter: “Anang munyi nya, Tuan. Utai nya enda sekali-kali nyadi ba nuan.” Tang Jesus nguing lalu bejaku ngagai Peter: “Rari ari aku, Sitan! Nuan ngempang jalai aku, laban nuan nitihka runding mensia, ukai runding Petara.” (Matthew 16:22, 23) Peter bejaku munyi nya laban iya enda nemu Jesus deka diangkatka idup baru ba serega.

Jesus ngangau sida ke bukai datai, lalu madahka enda senang deka nyadi murid iya. Ku iya: “Barang sapa deka nitihka aku, awakka iya nulak pengingin diri empu, ngesan tiang perinsa iya, lalu enda ngetu nitihka aku. Laban barang sapa ke deka ngidupka nyawa diri, deka ngelenyauka nyawa iya, tang barang sapa ke ngelenyauka nyawa diri ketegal aku, sereta ketegal Berita Manah, deka nyelamatka nyawa iya.”—Mark 8:34, 35.

Orang ke deka nyadi murid Jesus patut berani sereta sanggup ngelengkaka sebarang utai ba pengidup. Jesus madah: “Barang sapa ke malu nyadi murid aku sereta malu arapka jaku aku, Anak Mensia mega malu deka nerima orang nya, lebuh iya datai dalam mulia Apai iya enggau bala melikat ti kudus.” (Mark 8:38) Lebuh Jesus datai, iya deka “ngakim genap iku orang, nitihka utai ti udah dikereja sida siku-siku.”—Matthew 16:27.