Orang Judah ke diau ba begian barat laut tebing Danau Galili nemu berita Jesus deka pulai baru ari Dekapolis. Engka mayuh entara sida udah ninga Jesus neduhka ribut ba danau sereta ngeraika lelaki ke dirasuk. Nya alai, “mayuh orang” begelumu ba tebing danau nya. Nya engka ba menua Kapernaum, lalu sida enda sabar deka nyambut penatai Jesus.—Mark 5:21.

Siku ari sida, iya nya tuai balai gempuru ke benama Jairus. Iya keran deka betemu enggau Jesus. Lebuh iya meda Jesus, iya lalu nyungkurka diri ba kaki Jesus. Iya enda ngetu-ngetu minta kasih ari Jesus. Ku iya: “Anak indu aku ke agi mit benung sakit raya. Datai meh, lalu engkahka jari nuan ba atas iya, ngambika iya gerai lalu idup!” (Mark 5:23) Jairus semina bisi siku anak indu ke beumur 12 taun, lalu iya amat sayauka anak nya. Nama digaga Jesus enggau utai ke dipinta iya?—Luke 8:42.

Lebuh Jesus ba pejalai iya ngagai rumah Jairus, mayuh orang nitihka iya laban sida deka meda Jesus ngereja pengawa ti luar biasa. Ba entara sida nya, bisi siku indu ke balat sakit.

Indu nya ari bansa Judah. Iya sakit ketegal udah balat datai kain pengelama 12 taun. Iya ngiga mayuh lutur laban iya deka gerai, lalu iya nyau abis semua duit iya kena berubat. Taja pia, iya agi bedau gerai “tang majak balat sakit.”—Mark 5:26.

Ketegal penyakit nya, indu nya amat lemi lalu iya berasai malu. Nitihka Adat Moses, indu ke datai kain dikumbai enda tuchi. Barang sapa ke negu indu nya mesti masu gari diri sereta mandi, lalu orang nya deka dikumbai enda tuchi nyentukka mata panas padam.—Adat Lewi 15:25-27.

Indu nya “ninga rita pasal Jesus,” lalu mupuk ngiga Jesus. Laban iya dikumbai enda tuchi, iya nyelitka diri ba bala orang mayuh. Iya majak nyebut: “Enti aku semina negu gari luar iya, aku tentu deka gerai.” Lebuh indu nya negu buchai gari luar Jesus, tekala nya iya ngetu datai kain! Iya “udah digeraika ari penyakit ti balat nya.”—Mark 5:27-29.

Jesus nanya: “Sapa negu aku?” Ku Peter nyaut Jesus: “Peda nuan pemayuh orang ngempit nuan.” Tang nama kebuah Jesus nanya: “Sapa negu aku?” Jesus nerangka: “Bisi orang negu aku, laban aku ngasaika kuasa udah pansut ari aku.” (Luke 8:45, 46) Ba runding nuan, nama asai ati indu nya lebuh iya ninga jaku Jesus?

Lebuh indu nya nemu utai ke digaga iya ditemu Jesus, iya takut lalu besugang ba mua Jesus. Ba mua orang mayuh, iya madahka pasal penyakit iya baru digeraika. Enggau pengasih Jesus madah ngagai iya: “Anak, pengarap nuan udah ngeraika nuan. Mupuk meh, anang irau. Nuan udah gerai ari penyakit nuan ti balat nya.”—Mark 5:34.

Endang amat, Petara udah milih Jesus nyadi raja merintah dunya tu laban iya manah ati sereta bisi pengasih. Jesus ukai semina ibuhka orang tang mega bekuasa nulung sida!