Jesus amat bebasaka John Pemaptisa, tang kati orang bukai mega bebasaka iya? Ku Jesus madahka: “Rebak ke diatu, baka bala anak mit ke duduk ba pasar, lalu bekangauka pangan diri: ‘Kami nyepu kesuling ke kita, tang kita enggai betanda; kami bekeduie nyabak, tang kita enda tusah ati.’”—Matthew 11:16, 17.

Nama reti jaku Jesus? Iya nerangka: “Lebuh John datai, iya enda makai tauka ngirup wain. Tang orang madahka: ‘Iya dirasuk melikat ti jai.’ Lebuh Anak Mensia datai, iya makai sereta ngirup wain. Tang agi meh orang madah: ‘Peda iya nya! Bam sereta udu ngirup wain. Iya bekaban enggau orang ke ngumpul chukai sereta enggau orang ke bedosa.” (Matthew 11:18, 19) John siku orang Nasir. Ketegal nya, iya idup enggau pengumbas iya lalu iya enda ngirup wain. Tang, orang madahka iya dirasuk melikat ti jai. (Penyampau 6:2, 3; Luke 1:15) Taja pia, Jesus idup baka orang biasa. Iya makai sereta ngirup wain enggau chara ti seimbang, tang orang agi nuduh iya bam sereta udu ngirup wain. Nyadi amat mustahil deka ngemuaska ati semua orang.

Jesus mandingka rebak maya nya enggau bala anak mit ba pasar ke enggai betanda lebuh kaban sida besepuka kesuling, tauka enda tusah ati lebuh orang bukai bekeduie nyabak. Ku Jesus madah: “Taja pia, penemu-dalam siku-siku orang nyata dipeda ari utai ke dikereja iya.” (Matthew 11:16, 19) Nyadi, “utai ke dikereja” John enggau Jesus nunjukka jaku tuduh orang ngagai sida nya salah.

Pengudah Jesus madah rebak maya nya enda ngasi, iya ngutuk nengeri Korasin, Betsaida, enggau Kapernaum. Kebendar iya, Jesus kala ngereja kereja ajih ba tiga iti nengeri nya. Jesus madahka enti iya ngereja kereja ajih nya ba Tirus enggau Sidon ke bisi ba nengeri Finisia, orang ba dia mega tentu deka nesal ati. Pia mega, Jesus kala diau ba Kapernaum pengelama siti timpuh sereta mayuh ngereja pengawa rohani ba din. Taja pia, Jesus madahka mayuh orang ba Kapernaum enggai ngasi. Tu meh utai ke dipadah Jesus pasal Kapernaum: “Lebuh Hari Pechara ila, ukum ke ninggang Sodom deka lempung agi ari ukum ke ninggang nuan.”—Matthew 11:24.

Jesus lalu muji Apai iya, ke udah ngelalaika pemendar ti berega “ari orang ke bepenemu-dalam sereta pandai” tang mandangka utai nya ngagai orang ke baruh ati baka anak mit. (Matthew 11:25) Ku Jesus madah ngagai orang ke baruh ati: “Datai ngagai aku semua kita ke lelak ngema utai ti berat, lalu aku deka meri kita pengering baru. Ambi lalu san tangkun aku, lalu belajar ari aku, laban aku nelap sereta baruh ati, lalu kita deka bulih pengering baru. Laban tangkun aku nyamai disan, lalu ma aku lempung.”—Matthew 11:28-30.

Baka ni Jesus meri pengering baru? Mayuh tuai pengarap udah ngaga adat ti kelalu terit, baka adat ke digaga sida bekaul enggau Hari Sabat. Ketegal nya, mayuh orang tusah deka nitihka adat nya lalu sida berasai lelak. Tang Jesus ngeringka sida baru lebuh iya ngajar sida pemendar pasal Petara, laban utai ke diajar Jesus nadai kaul enggau adat ke digaga bala tuai pengarap. Jesus mega ngelantangka ati sida ke balat ditekan orang ke bisi kuasa ba politik, sereta nulung sida ke berasai besalah ketegal dosa diri empu. Jesus ngajar sida chara ngambika dosa sida ulih diampun sereta chara sida ulih bebaik enggau Petara.

Semua sida ke deka ngesan tangkun ari Jesus ulih nyerahka diri ngagai Petara. Sida mega ulih nyembah Apai kitai ti di serega ke penuh enggau pengasih, sereta pengibuh. Sida ulih ngereja nya laban pesan Petara enda kelalu tusah dititihka.—1 John 5:3.