Jesus udah ngena mayuh chara meransang orang ngemanahka kaul sida enggau Petara. Jesus sekali agi ngereja nya pengudah iya berandau enggau orang ba luar rumah siku orang Parisi.

Maya nya, sekeda orang nyebut pasal siti penusah ke nyadi lebuh “sekeda orang Galili dibunuh [Gabenor Rome ke benama Pontius] Pilate lebuh sida benung meri pemeri tunu.” (Luke 13:1) Nama reti ku sida?

Pilate ngena duit ari tabung duit Rumah Sembiang ngaga siti saluran ai ti panjai ke mai ai ngagai Jerusalem. Ketegal nya, beribu iku orang Judah angkat ngelaban Pilate. Pengujung iya, Pilate munuh sekeda orang Galili ke ngelaban iya. Pilate engka ngulihka duit ngaga saluran nya, laban orang ke betanggungjawap nyaga Rumah Sembiang ngemendarka iya ngambi duit nya. Sida ke madah pasal pekara tu engka ngasaika, orang Galili ke dibunuh nya udah ngereja pengawa ti jai. Tang Jesus enda besetuju enggau nya.

Iya nanya: “Kati kita ngumbai utai tu nyadi ketegal sekeda orang Galili nya bedosa agi ari semua orang Galili ke bukai?” Iya madah enda. Tang Jesus ngena penusah tu nangkan orang Judah. Ku iya: “Enti kita enda nesal ati, semua kita deka dipunaska baka sida.” (Luke 13:2, 3) Udah nya, Jesus madah pasal siti da agi penusah ke baru udah nyadi, ke engka bisi kaul enggau pengawa ngaga saluran ai nya.

Ku Jesus: “Perundingka mega pasal 18 iku orang ke mati ditinggang menara Siloam ke runtuh. Kati kita ngumbai dosa sida besai agi ari dosa semua orang bukai ba Jerusalem?” (Luke 13:4) Orang mayuh ngasaika sida mati laban udah ngereja pengawa ti jai. Sekali agi Jesus enda setuju enggau sida. Jesus nemu “utai ti jai endang tau nyadi” ba genap iku orang. (Pengajar 9:11) Taja pia, orang Judah patut belajar ari utai ke nyadi. Ku Jesus madah: “Enti kita enda nesal ati, semua kita deka dipunaska baka sida.” (Luke 13:5) Tang nama kebuah iya nekanka poin tu ba maya nya?

Tu bisi kaul enggau timpuh pengawa nginjil Jesus. Iya nerangka tu ngena siti jaku sempama: “Siku lelaki nanam pun kayu ara ba kebun anggur iya. Iya deka ngiga buah ba pun kayu nya, tang sigi buah pan enda ditemu iya. Nya alai, iya bejaku ngagai orang ke bekereja ba kebun nya, ‘Udah tiga taun aku ngiga buah ba pun kayu ara tu, tang nadai sigi buah pan ditemu aku. Tebang pun kayu tu! Nadai guna pun kayu tu tumbuh ba tanah enti iya enggai bebuah.’ Orang ke bekereja nya nyaut iya, ‘Tuan, tejuka pun kayu nya ba dia setaun da agi. Aku deka nyangkul tanah ngelingi pun kayu tu lalu meri iya baja. Enti pun kayu tu bebuah ila, manah meh nya. Enti enda, tebang aja pun kayu tu.’”—Luke 13:6-9.

Udah lebih ari tiga taun Jesus nulung orang Judah ngemanahka kaul sida enggau Petara. Tang mimit aja orang Judah nyadi murid Jesus. Lalu ba taun ti keempat, Jesus bebendar agi nulung sida. Lebuh Jesus nginjil sereta ngajar ba Judea enggau Perea, nya baka ke iya nyangkul  tanah sereta meri baja ba pun kayu ara. Tang nama asil iya? Semina mimit aja orang Judah ke deka nerima. Ketegal nya, semua orang Judah ke enggai nesal ati deka dipunaska.

Utai tu nyata dipeda sekali agi lebuh Jesus ngajar ba balai gempuru ba Hari Sabat. Ba dia, iya meda siku indu ke bungkuk pengelama 18 taun ketegal melikat ti jai. Jesus kasihka iya, lalu madahka: “Endu, nuan udah digeraika ari penyakit nuan.” (Luke 13:12) Jesus ngengkahka jari iya ba atas indu nya, tekala nya indu nya bediri rurus lalu ngemuliaka Petara.

Tuai balai gempuru ringat meda utai ke nyadi, ku iya: “Orang bekereja enam hari aja. Nyadi enti kita deka digeraika, datai maya nya ukai maya Hari Sabat.” (Luke 13:14) Tuai balai gempuru nya enda nyangkal Jesus bisi kuasa ngeraika orang. Tang iya nganu orang ke datai ngagai balai gempuru ngambika ulih digeraika ba Hari Sabat! Nya alai Jesus nyaut: “Kita tu orang ke pura-pura ngapa. Maya Hari Sabat, endaka genap iku kita ngelepaska sapi tauka keledai kita ari kandang lalu mai sida pansut ngirup ai? Indu tu ari peturun Abraham lalu udah ditanchang Sitan pengelama 18 taun. Endaka iya patut dilepaska ari tanchang tu maya Hari Sabat?”—Luke 13:15, 16.

Sida ke ngelaban Jesus berasai malu, tang orang mayuh gaga ati ke semua utai ti badas ke dikereja Jesus. Udah nya, Jesus madahka baru dua iti jaku sempama pasal Perintah Petara, ke kala diajar iya ba Danau Galili.—Matthew 13:31-33; Luke 13:18-21.