Ba Judea, siku orang Parisi mai Jesus makai begulai enggau iya. Nya alai Jesus setuju deka makai enggau iya. Sida engka makai begulai maya siang hari. (Luke 11:37, 38; banding Luke 14:12.) Baka biasa, sebedau makai, orang Parisi deka masu jari sida nyentuk ngagai siku. Taja pia Jesus enda ngereja nya. (Matthew 15:1, 2) Utai ke digaga Jesus enda ngelanggar Adat Petara. Pia mega, Petara enda minta nembiak Iya ngereja nya.

Orang Parisi nya tekenyit laban Jesus enda masu jari nyentuk ngagai siku. Jesus nemu utai ke diperundingka iya. Nya alai Jesus madah: “Kita orang Parisi nuchi mangkuk enggau chapak kita ari luar, tang ba dalam kita penuh laban pengamu enggau penyai. Kita tu enda nemu berunding! Endaka Petara ke ngaga tubuh mega ngaga ati?”—Luke 11:39, 40.

Iya ke amat, penanggul nya ukai pasal masu jari sebedau makai, tang penanggul iya pasal orang Parisi ke bepura-pura ngapa. Taja pan orang Parisi enggau orang bukai nuchi jari nyentukka siku nitihka adat orang bansa Judah, tang sida enda nuchi ati sida ari penyai. Nyadi Jesus meri sida jaku lalau tu: “Lebuh kita ngereja utai ti manah ngagai orang ke seranta, kereja nya ari ati. Enggau nya, kita tentu deka tuchi ba semua pekara.” (Luke 11:41) Utai ke dipadah Jesus nya endang amat! Orang ke deka ngereja utai ti manah ngagai orang bukai patut ngereja nya ketegal pengerindu, ukai ketegal deka nunjukka diri manah ba mua orang bukai.

Jesus madah: “Kita meri pudina, rue, enggau semua sayur ke bukai nyadika pemeri. Tang kita enda beberatka pengelurus enggau pengerindu ke Petara! Pemeri endang beguna, tang pekara ke bukai mega patut dikemeratka.” (Luke 11:42) Adat Petara bisi ngasuh orang meri satu per sepuluh asil ari utai ke diketau sida. (Ulang Adat 14:22) Tu nyengkaum pudina, rue, enggau semua sayur ke bukai. Orang Parisi meri satu per sepuluh ari utai dikemisi sida tang sida enda nitihka utai ti berat agi dalam Adat Petara, baka ngayanka pengelurus sereta pemaruh ati.—Mikah 6:8.

Udah nya Jesus madah: “Tulah meh kita orang Parisi, laban kita rindu duduk ba endur ti pemadu mua ba balai gempuru sereta rindu dipebasa orang ba sebelah pasar! Tulah meh kita, laban kita baka kubur ke enda ulih dipeda. Orang ke bejalai pan enda nemu sida bejalai ba atas kubur nya!” (Luke 11:43, 44) Nitihka Adat, lebuh sesiku orang bejalai ba atas kubur, orang nya deka dikumbai enda tuchi taja pan iya engka enda sedar iya udah ngereja nya. Jesus madah pasal nya kena nunjukka penyai orang Parisi enda nyengala dipeda.—Matthew 23:27.

Siku lelaki ke landik pasal Adat Petara madah: “Pengajar, lebuh nuan nyebut munyi nya, nuan mega ngeleseka kami.” Tang Jesus deka nulung sida sedar sida besalah laban enda nulung orang bukai. Ku Jesus: “Tulah mega kita ke landik pasal Adat, laban kita meri ma ti berat ngagai orang bukai, tang kita empu, indah ngena siti tunjuk jari pan enggai negu ma nya! Tulah meh kita, laban kita begagaka pendam ke bala nabi, tang bala aki ini kita udah munuh sida!”—Luke 11:45-47.

Ma ti berat ke dipadahka Jesus reti iya, adat mensia sereta ajar orang Parisi pasal Adat. Sida ngenusahka orang bukai enggau mejal orang bukai nitihka atur ti berat. Jesus madahka aki ini sida udah munuh bala nabi Petara, kenyau ari jeman Abel. Lalu, sida ngumbai diri bebasaka bala nabi laban sida ngaga kubur ke bala nabi nya. Tang kebendar iya, sida ngembuan  runding sereta ulah ti sama enggau aki ini sida. Sida indah deka munuh nabi ti pemadu besai, iya nya Jesus. Nya alai, Jesus madah rebak maya nya deka diukum ketegal utai ti dikereja sida. Lalu 38 taun pengudah nya, utai ke dipadah Jesus amat nyadi ba taun 70 M.

Ku Jesus: “Tulah meh kita ke landik pasal Adat, laban kita ngambi kunchi kena muka pintu penemu pasal Petara. Kita empu enda tama, tang kita mega nagang orang bukai tama!” (Luke 11:52) Kebendar iya, sida patut nerangka reti Jaku Petara ngagai orang bukai, tang sida enda ngereja nya sereta nagang orang bukai meretika Jaku Petara.

Nama reaksi orang Parisi enggau bala penulis Adat? Lebuh Jesus angkat ari endur nya, sida amat ringat lalu nanya Jesus mayuh macham utai kena ngelaban iya. Sida ukai deka belajar ari Jesus tang nganti iya nyebut utai ke tau dikena sida nyalahka iya.