Jesus madah “raban mit” deka merintah ba Perintah serega. (Luke 12:32) Taja pia, sida ke nerima peluang tu bisi tanggungjawap ti berat. Lalu, Jesus madahka sesiku orang ke deka nyadi sebagi ari Perintah Petara, enda tau enda ngembuan runding ti betul.

Nya alai, Jesus ngasuh bala murid iya mengkang besedia ngambika ulih nyambut penatai iya. Ku iya: “Tentuka kita udah begari sereta besedia. Lalu tentuka mega lampu kelita kita udah ditungkun. Kita patut nyadi baka ulun ke benung nganti tuan sida pulai ari pengerami tikah. Lebuh tuan sida datai lalu ngetuk pintu, sida ulih muka pintu ke iya tekala nya. Gaga ati meh ulun nya, enti tuan sida datai lalu nemu sida benung bejaga.”—Luke 12:35-37.

Bala murid senang meretika jaku sempama nya, lalu sida nemu utai ke patut digaga. Dalam jaku sempama nya, Jesus madahka bala ulun udah besedia nganti penatai tuan sida. Bekaul enggau utai tu, Jesus nerangka: “Gaga ati meh sida, enti iya [tuan sida] nemu sida benung bejaga lebuh iya datai ba gintir jaga kedua [ari kira pukul semilan malam nyentuk ngagai tengah malam], tauka indah ba gintir jaga ketiga [ari tengah malam nyentuk ngagai kira pukul tiga pagi].”—Luke 12:38.

Jaku sempama Jesus ukai semina pasal ulun ke bagas gawa aja. Tu ketegal, Jesus mega nyebut pasal diri empu dalam jaku sempama nya, iya nya Anak Mensia. Ku iya madah ngagai bala murid iya: “Nya alai, kita patut sedia, laban Anak Mensia deka datai ba jam ti enda disangka kita.” (Luke 12:40) Reti iya, Jesus deka datai baru. Maya nya, iya deka bala murid iya, kelebih agi sida ke ari “raban mit” besedia nyambut penatai iya.

Peter deka meretika jaku Jesus enggau terang agi. Nyadi iya nanya: “Tuan, kati nuan madahka jaku sempama tu semina ngagai kami aja tauka mega ngagai semua orang?” Ari ke meri saut ti terang ngagai Peter, Jesus madahka iya pasal siti agi jaku sempama bekaul enggau utai tu. Ku Jesus: “Sapa kebendar iya ulun ke tetap ati sereta bepenemu-dalam, ke udah dipilih tuan iya ngemataka semua ulun ti bukai, ngambika seruran meri sida pemakai ti chukup ba maya ti patut? Ulun nya tentu deka gaga ati lebuh tuan iya datai lalu nemu iya benung ngereja pengawa iya! Enggau bendar aku madah ngagai kita: Tuan nya deka milih ulun nya ngemataka semua reta tengkira iya.”—Luke 12:41-44.

Ba jaku sempama sebedau tu, “tuan” merujuk ngagai Jesus, iya nya Anak Mensia. Nya alai, “ulun ke tetap ati” merujuk ngagai sida ke ari “raban mit,” ke deka nyadi sebagi ari Perintah serega. (Luke 12:32) Ba jaku sempama nya, Jesus madahka sekeda ari raban nya deka meri “semua ulun ti bukai” utai ke diguna sida, nyengkaum “pemakai ti chukup ba maya ti patut.” Nya alai, Peter enggau bala murid ke bukai ulih faham Jesus deka datai baru. Lebuh maya nya, atur deka digaga ngambika bala murid Jesus ulih nerima pemakai rohani ba maya ti patut.

Jesus mega madahka kebuah bukai bala murid iya mesti mengkang bejaga sereta bejimat enggau ulah sida. Enti sida enda mengkang bejaga, sida ulih lenyau fokus ba utai ti beguna, lalu indah berengkah ngelaban bala menyadi Kristian sida empu. Ku Jesus madahka: “Tang enti sema ulun nya bejaku dalam ati diri: ‘Tuan aku laun datai,’ lalu iya belabuh bepaluka  ulun ke lelaki enggau ke indu sereta makai ngirup lalu mabuk, tuan iya deka datai ba hari ti enda disangka iya enggau ba jam ti enda ditemu iya. Tuan iya deka balat amat ngukum iya lalu muai iya sama enggau orang ke enda tetap ati.”—Luke 12:45, 46.

Jesus madah iya datai “deka nungkun api ba dunya.” Tu endang amat nyadi, laban Jesus bisi nyebut pasal isu semasa ke suah nyadi buah mulut orang mayuh maya nya. Ketegal nya, orang mayuh balat bekelikuh sereta enda besetuju enggau pangan diri. Pia mega, Jesus enggau terang nunjukka pemula ti diajar pengarap pelesu enggau adat mensia. Tu meh utai ke udah nyadi: “Apai ngelaban anak lelaki; anak lelaki ngelaban apai; indai ngelaban anak indu; anak indu ngelaban indai; mentua indu ngelaban menantu indu; lalu menantu indu ngelaban mentua indu.”—Luke 12:49, 53.

Semua utai ti dipadah Jesus nya dituju ngagai bala murid iya. Udah nya, Jesus bejaku ngagai orang mayuh ba dia. Ketegal mayuh ari sida agi kieh, sida enggai nerima bukti ti nunjukka Jesus nya endang amat Messiah. Nya alai, iya madah ngagai orang mayuh: “Lebuh kita meda mua hari petang tunga ke barat, kita lalu nyebut, ‘Kabut deka datai,’ lalu utai nya deka nyadi. Lebuh kita meda angin selatan bepuput, kita lalu nyebut, ‘Angat amat hari tu legi,’ lalu utai nya deka nyadi. Kita tu orang ke pura-pura ngapa! Kita nemu madahka gaya hari ari utai ti dipeda kita ba dunya enggau langit. Tang nama kebuah kita enda meretika utai ke benung nyadi diatu?” (Luke 12:54-56) Tu terang nunjukka sida enda bejaga.