Jesus agi ba Perea, iya nya endur ke “seberai Sungai Jordan.” (John 10:40) Diatu iya deka neruska pejalai ngagai Jerusalem.

Tang Jesus enda kediri laban bala murid iya bisi enggau iya. Pia mega, “mayuh orang,” nyengkaum bala pengumpul chukai sereta sida ke bedosa nitihka iya. (Luke 14:25; 15:1) Orang Parisi enggau bala penulis Adat ke ngutuk jaku sereta pengawa Jesus mega bisi enggau iya. Sida patut berundingka mayuh utai pengudah ninga jaku sempama Jesus pasal bedus ke lenyau, anak ke lenyau, sereta pasal siku lelaki ke kaya enggau Lasarus.—Luke 15:2; 16:14.

Jesus engka agi ingat utai ke dipadah sida ke ngelaban iya, ngambika sida ulih ngutuk sereta ngeleseka iya. Nyadi, Jesus ngulang baru poin ke kala diajar iya ngagai bala murid iya ba Galili.

Ambika chunto, Jesus madah: “Pekara ke ngasuh orang labuh ba pengarap tentu deka bisi. Tang tulah meh orang ke ngasuh pekara nya nyadi. . . . Bejimat meh. Enti menyadi kita bedosa, rara iya. Lalu enti iya nesal ati, ampun meh iya. Taja pan iya bedosa ngelaban nuan tujuh kali sehari, lalu datai ngagai nuan tujuh kali lalu iya nyebut, ‘Aku minta ampun,’ nuan patut ngampunka iya.” (Luke 17:1-4) Jaku Jesus engka ngingatka Peter pasal utai ke kala ditanya iya ngagai Jesus pasal ngampunka orang nyentuk ngagai tujuh kali.—Matthew 18:21.

Kati bala murid Jesus ulih ngereja utai sejalai enggau jaku iya? Ku sida madah ngagai Jesus: “Tambahka pengarap kami.” Jesus lalu nyaut sida: “Enti kita bisi pengarap ngemesai igi mustard, kita ulih bejaku ngagai pun kayu tu, ‘Techabut meh nuan lalu nanam diri empu ba tasik!’ lalu pun kayu nya deka ngasika kita.” (Luke 17:5, 6) Nya alai, indah pengarap ti mit pan ulih ngereja pengawa ti besai amat.

Pengudah nya, Jesus ngajar kebuah patut baruh ati sereta bisi runding ti seimbang pasal diri empu. Ku iya madah ngagai bala rasul: “Sema kita bisi siku ulun ke benung ngeradu tanah tauka ngibun bedus. Pengudah iya pulai, sapa entara kita deka madah ngagai iya, ‘Jampat kitu lalu makai ba mija’? Endaka kita deka madah ngagai iya, ‘Tukar gari nuan. Udah nya, sediaka pemakai kena aku makai malam, lalu intu aku nyentukka aku tembu makai enggau ngirup. Udah nya, baru nuan ulih makai enggau ngirup’? Kita tentu enda nyebut terima kasih ngagai ulun nya laban nya endang pengawa iya. Pia mega pengudah kita ngereja semua pengawa ke diberi ngagai kita, sebut meh: ‘Kami ulun ke enda patut dipuji. Kami semina ngereja pengawa ke patut dikereja kami.’”—Luke 17:7-10.

Nya alai, tiap iku nembiak Petara mesti ngenuluka peneka Petara ba pengidup. Kelimpah ari nya, semua kitai patut beterima kasih ke peluang ti istimewa ulih nyembah Petara sereta nyadi sebagi ari ruang bilik Iya.

Enda lama udah nya, siku orang ke dianjung mai pesan ari Maria enggau Marta datai. Seduai iya menyadi indu Lasarus, lalu sida diau ba Betani di Judea. Orang ke mai pesan nya madah: “Tuan, kaban ke dikesayauka nuan benung sakit.”—John 11:1-3.

Taja pan iya nemu kaban iya Lasarus benung sakit, tang Jesus enda kelalu balat tusah ati. Ku Jesus madahka: “Penyakit nya enda ngujungka pemati, tang mai mulia ngagai Petara. Enggau nya, Anak Petara deka dimuliaka.” Nya alai, Jesus mengkang ba endur nya pengelama dua hari, lalu madah ngagai bala murid iya: “Aram kitai pulai baru ngagai Judea.” Tang sida enda setuju lalu madah: “Rabbi, baru-baru tu orang  Judea deka nuku nuan ngena batu, tang diatu nuan deka kin baru?”—John 11:4, 7, 8.

Disaut Jesus: “Endaka kitai bisi 12 jam maya siang hari? Barang sapa bejalai maya siang hari enda labuh, laban iya meda penampak dunya tu. Tang barang sapa bejalai maya malam hari deka labuh, laban penampak nadai ba dalam iya.” (John 11:9, 10) Reti ku Jesus nya, timpuh ti udah ditetapka Petara kena iya ngereja pengawa nginjil bedau abis. Nya alai, Jesus patut ngena semua masa ke agi tinggal enggau manah.

Jesus madahka: “Kaban kitai Lasarus udah tinduk, tang aku deka mansang kin ngerak iya.” Tang bala murid ngumbai Jesus madah Lasarus benung belelak lalu iya deka gerai, nya alai sida madah: “Tuan, enti iya benung tinduk, iya deka gerai.” Nyadi Jesus enggau terus terang madahka: “Lasarus udah mati . . . Aram kitai mupuk ngagai iya kin.”—John 11:11-15.

Taja pia, Thomas nemu Jesus engka deka dibunuh ba Judea. Nyadi iya deka nyukung Jesus. Nya alai, iya madah ngagai bala murid ke bukai: “Aram kitai mega mupuk, ngambika kitai sama mati enggau iya.”—John 11:16.