Ari “pukul 12 tengah hari,” semua dunya “petang magang nyentuk ngagai pukul 3 ngalih hari.” (Mark 15:33) Pemetang nya ukai ketegal gerhana mata panas, laban gerhana mata panas semina nyadi maya bulan baru ayan. Tang maya nya musin Pengerami Paska, lalu kesuah iya bulan purnama ke deka ayan ba langit. Kelimpah ari nya, gerhana mata panas nyadi beberapa minit aja, tang dunya nyadi petang pengelama beberapa jam. Nya alai, Petara meh ke ngasuh utai tu nyadi!

Utai ke nyadi tu tentu ngasuh sida ke udah ngeleseka Jesus amat tekenyit. Ba maya ti petang nya, indai Jesus, Salomi, Maria Magdalin, sereta Maria indai rasul James ke mit mansang ngagai tiang perinsa Jesus.

Rasul John enggau indai Jesus “bediri semak tiang perinsa.” Naka meh penusah ati Maria lebuh meda anak ke diadaka iya, sereta dikemesaika iya benung balat merinsa ba tiang nya! Ati iya baka ke “direjang ngena pedang.” (John 19:25; Luke 2:35) Taja pan Jesus balat merinsa, tang iya agi berundingka indai iya. Nya alai, iya merening ngagai John maya iya madah ngagai indai iya: “Indai, berengkah ari diatu, iya meh anak nuan.” Lalu, iya merening ngagai Maria lebuh madahka John: “Berengkah ari diatu, iya meh indai nuan.”—John 19:26, 27.

Jesus ngasuh John, rasul ke dikesayauka iya nyaga indai iya ke udah nyadi balu. Maya nya, Jesus bisi beberapa iku menyadi tiri, iya nya bala anak lelaki Maria ke bukai. Taja pia, sida bedau agi arapka iya. Nya kebuah Jesus ngaga atur tu ngambika ulih nyaga utai ti diguna Maria ari segi fizikal enggau rohani. Endaka Jesus teladan ti manah?

Kira-kira pukul tiga ngalih hari lebuh hari udah enda agi petang, Jesus madah: “Aku aus.” Iya madahka tu kena ngamatka ayat Bup Kudus. (John 19:28; Masmur 22:15) Jesus ulih ngasaika Apai iya enda agi nyaga iya, ngambika penetap ati iya ulih diuji enggau pengabis iya. Nya alai, Jesus ngangau enggau nyawa ti inggar: “Eli, Eli, lama sabakhtani?” Reti iya, “Petara aku, Petara aku, nama kebuah Nuan ninggalka aku?” Sekeda orang ke bediri semak dia enda meretika utai ku iya, lalu sida madah: “Dinga kita, iya ngangauka Elijah.” Udah nya bisi orang belanda, ngambi kapuk lalu nyepuhka kapuk nya ngagai ai wain ti masam. Iya ngengkahka kapuk nya ba kayu, lalu nuatka nya ngagai Jesus ngambika diirup Jesus. Tang orang bukai bejaku: “Awakka iya! Aram kitai meda sekalika Elijah deka datai nyelamatka iya tauka enda.”—Mark 15:34-36.

Jesus lalu madah enggau nyawa ti inggar: “Udah tembu!” (John 19:30) Endang amat, Jesus udah nembuka semua pengawa ke diberi Apai iya ba dunya. Pengujung iya, Jesus madah: “Apai, aku nyerahka nyawa aku ngagai Nuan.” (Luke 23:46) Jesus amat pechaya Petara tentu deka ngidupka iya baru. Nyadi, Jesus nyerahka nyawa iya ngagai Jehovah. Pengujung iya, Jesus ngendukka pala iya lalu ngapuska seput iya.

Maya nya, tanah berenyang nyadi lalu batu tebelah. Tanah berenyang nya amat kuat nyentukka  kubur mega tebuka, lalu mayuh bangkai tempalung pansut ari kubur. Mayuh orang ke meda utai nya tama ngagai “nengeri ti kudus,” lalu madahka utai ke udah dipeda sida.—Matthew 12:11; 27:51-53.

Lebuh Jesus mati, kain tirai ti panjai sereta berat ke bisi entara Endur ti Kudus enggau Endur ti Pemadu Kudus ba Rumah Sembiang charik belah dua, ari atas ke baruh. Utai ke nyadi nya ngambarka pengeringat Petara ngagai sida ke munuh Anak Iya. Pia mega, nya ngambarka jalai ngagai Endur ti Pemadu Kudus, iya nya serega udah dibuka.—Hebrew 9:2, 3; 10:19, 20.

Lebuh meda utai ke nyadi, orang mayuh lalu berasai takut. Pengudah nya, pemesai soldadu ke ngemataka pengawa ngukum bunuh Jesus madahka: “Orang tu amat Anak Petara!” (Mark 15:39) Pemesai soldadu nya engka bisi enggau lebuh Pilate deka nentuka Jesus nya Anak Petara tauka enda. Nya alai, pemesai nya nemu Jesus nadai ngereja penyalah, lalu iya endang amat Anak Petara.

Sida ke bukai pulai ngagai rumah sida lalu “mandam dada diri ketegal kelalu tusah ati.” (Luke 23:48) Lalu bisi mayuh murid Jesus ke indu meda semua utai tu ari jauh. Sida mega berasai amat tusah ati.