Hari nyau udah lemai maya Hari Lima, 14 Nisan. Lebuh mata panas padam, Hari Sabat maya 15 Nisan deka berengkah. Jesus udah mati, tang dua iku perumpak ke ba sepiak iya agi idup. Nitihka Adat, bangkai “enda tau ditejuka ba tiang semalam-malam” tang patut dikuburka “ba hari nya mega.”—Ulang Adat 21:22, 23.

Hari Lima nya hari ke dikena nyediaka Hari Sabat. Ba hari nya, orang deka nyediaka pemakai sereta nembuka pengawa bukai sebedau Hari Sabat berengkah. Hari Sabat nya dikumbai Hari Sabat “ti besai.” (John 19:31) Tu ketegal dalam minggu nya, Hari Sabat nyadi ba hari ti sama enggau hari keterubah Pengerami Roti ti Enda Beragi. Pengerami tu diintu tujuh hari. Ba senentang tu, 15 Nisan seruran dikumbai Hari Sabat, enda ngira iya kena ba hari ni.—Adat Lewi 23:5, 6.

Maya nya, orang Judah minta Pilate matahka kaki Jesus enggau dua iku perumpak nya. Nama kebuah? Nya deka ngasuh sida tusah enseput lalu jampat agi mati. Bala soldadu pan datai lalu matahka kaki dua iku perumpak nya. Tang lebuh sida datai ba Jesus, sida meda iya udah mati. Nyadi sida enda matahka kaki iya. Tu ngamatka jaku ba Masmur 34:20: ‘Jehovah nyaga iya. Siti pen nadai meh tulang iya patah.’

Ngambika ulih nentuka Jesus amat udah mati, siku soldadu ngena sangkuh ngerejang rusuk  Jesus. “Tekala nya, darah enggau ai lalu pansut.” (John 19:34) Tu ngamatka siti da agi ayat Bup Kudus: “Sida deka merening ngagai orang ke mati dibanchak sida.”—Sekariah 12:10.

Maya Jesus dibunuh, Josep ari nengeri Arimatea mega bisi ba dia. Iya “siku lelaki ke kaya” sereta siku ari Raban Kunsil Orang Judah ke dipebasa. (Matthew 27:57) Pia mega, iya “siku lelaki ke manah sereta lurus” ke “nganti penatai Perintah Petara.” Kebendar iya, iya “murid Jesus, tang iya enda madah ngagai orang bukai pasal nya laban iya takutka orang Judah.” Lebuh Raban Kunsil Orang Judah ngukum Jesus, iya enda nyukung sida. (Luke 23:50; Mark 15:43; John 19:38) Taja pia, Josep meranika diri minta pemendar ari Pilate kena ngambi bangkai Jesus. Pengudah Pilate nentuka Jesus amat udah mati, iya pan ngemendarka Josep ngambi bangkai Jesus.

Josep meli kain linin ti alus sereta beresi lalu nurunka bangkai Jesus ari tiang nya. Nikodimus “ke kala datai ngagai Jesus maya malam hari, mega bisi datai kia.” (John 19:39) Iya mai kira-kira 30 kilogram mur ke udah dichampurka enggau garu. Lalu bangkai Jesus dibalut ngena kain linin enggau rempah nya, nitihka adat orang Judah lebuh sida nguburka orang ke udah mati.

Enda jauh ari endur nya, bisi siti kubur ti baru ke ditebuk ba bukit batu, ke enggi Josep. Lalu sida ngengkahka bangkai Jesus ba dalam kubur nya. Udah nya, sigi batu ti besai dibaringka kena nutup lubang kubur nya. Sida ngereja semua pengawa tu enggau jampat sebedau Hari Sabat berengkah. Maria Magdalin enggau Maria indai James ke mit mega engka bisi nulung ba pengawa nya. Udah nya, sida pulai ke rumah “nyediaka rempah ti bebau rengut enggau minyak wangi” ke deka dikena ngintu bangkai Jesus pengudah Hari Sabat.—Luke 23:56.

Hari siti, bala tuai imam enggau orang Parisi betemu enggau Pilate lalu madah: “Tuan, kami ingatka utai ti udah disebut penipu nya, lebuh iya agi idup. Ku iya: ‘Pengudah tiga hari, aku deka diidupka baru.’ Nya alai, asuh soldadu nuan nyaga kubur nya nyentuk ngagai hari ti ketiga, enggaika bala murid iya ngambi bangkai iya, lalu madah ngagai orang: ‘Iya udah diidupka baru ari mati!’ Enti pia, pemula ti penudi tu deka nyadi balat agi ari pemula ti keterubah.” Pilate nyaut sida: “Bai meh seraban soldadu, lalu jaga kubur nya enggau naka ulih kita.”—Matthew 27:63-65.

Sehari pengudah nya, iya nya ba tumu pagi Hari Minggu, Maria Magdalin, Maria indai James enggau bala indu ke bukai mai rempah ngagai kubur Jesus laban sida deka ngintu bangkai iya. Nya alai, sida madah ngagai pangan diri: “Sapa ke deka maringka batu ke dikena nutup kubur tu ke kita?” (Mark 16:3) Tang enda memukai tanah berenyang nyadi. Siku melikat udah maringka batu nya lalu bala soldadu ke nyaga kubur nya udah nadai dia. Kubur Jesus udah kusung!