Jesus udah besampi enggau bala rasul iya ke tetap ati. Lalu, “pengudah belagu meri puji, sida mupuk ngagai Bukit Kana.” (Mark 14:26) Sida bejalai tunga ke timur ngagai siti taman ke dikumbai Getsemani, endur ke selalu digagai Jesus.

Taman nya bisi mayuh pun kayu kana. Pengudah sida datai ba dia, Jesus madah ngagai lapan iku rasul iya: “Duduk ditu. Aku deka kin lalu besampi.” Udah nya, Jesus tama dalam taman nya enggau tiga iku rasul iya, iya nya Peter, James, enggau John. Iya berasai amat irau lalu madah ngagai tiga iku rasul nya: “Ati aku balat tusah, asai ke deka mati. Nganti ditu lalu mengkang bejaga enggau aku.”—Matthew 26:36-38.

Jesus bejalai jauh mimit ari sida, “nyungkurka diri ke tanah, lalu besampi ngagai Petara.” Ku iya besampi: “Apai, ba Nuan semua utai ulih magang. Ambi meh mangkuk tu ari aku. Taja pia, anang nitihka peneka aku, tang nitihka peneka Nuan.” (Mark 14:35, 36) Nama reti ku iya? Kati Jesus enggai mati kena nebus dosa mensia? Tentu enda.

Suba maya Jesus ba serega, iya kala meda chara orang Rome merinsaka orang lalu munuh sida. Lebuh Jesus nyadi mensia, iya ngembuan asai ati baka orang biasa. Nya alai, iya nemu iya deka mati enggau chara ti amat merinsa. Tang, utai ke ngasuh iya lebih agi pedis nya, laban iya deka diukum bunuh baka siku penjenayah. Nya ulih ngenyaika nama Apai iya. Dalam beberapa jam agi, Jesus deka dipantang ba tiang laban iya dituduh bejaku ngelaban Petara.

Pengudah Jesus besampi, iya pulai lalu meda tiga iku rasul iya benung tinduk. Ku iya bejaku ngagai Peter: “Iga ga kita enda ulih bejaga enggau aku sejam? Anang ngetu bejaga sereta seruran besampi, ngambika kita enda alah laban penguji.” Tang Jesus nemu sida berasai ditekan sereta lelak. Nya alai, iya madah: “Ati amat ransing, tang tubuh lemi.”—Matthew 26:40, 41.

Udah nya, Jesus mupuk baru kali kedua lalu minta Petara ngambi “mangkuk tu” ari iya. Lebuh iya pulai baru, Jesus sekali agi meda tiga iku rasul iya benung tinduk. Kebendar iya, sida patut besampi ngambika enda alah laban penguji. Nya alai lebuh iya bejaku enggau sida, sida “enda nemu baka ni deka nyaut Jesus.” (Mark 14:40) Nyadi Jesus mupuk baru, lalu besugang sereta besampi.

Jesus balat irau pasal pemati iya, laban iya deka dibunuh baka siku orang ke jai. Lalu tu ulih ngemaluka nama Apai iya. Jehovah ninga sampi Anak Iya, lalu nganjung siku melikat kena ngeringka ati iya. Tanggung pengawa Jesus nya amat berat laban nya bekaul enggau pengidup iya empu, sereta peluang idup meruan ngagai semua mensia ke arap. Nya alai, iya “majak bendar agi besampi nyentukka peluh iya nyau nyadi  baka darah ke neritik ngagai tanah.”—Luke 22:44.

Lebuh Jesus pulai baru kali ketiga ngagai bala rasul iya, sekali agi iya meda sida benung tinduk. Ku Jesus madah: “Ba maya ke baka tu pan agi ga kita ka tinduk sereta belelak! Peda kita! Jam nyau semak alai Anak Mensia deka diserahka ngagai orang ke bedosa. Angkat, aram kitai mupuk. Peda kita! Orang ke deka nyerahka aku nyauka datai.”—Matthew 26:45, 46.