Enda lama pengudah Jesus dibaptisa, bisi siku munsuh ke keran deka nagang Jesus ngepunka pengawa nginjil. Endang amat, Sitan mayuh kali nguji Jesus. Tang tu meh utai ke dipadahka Jesus pasal Sitan: “Pemerintah dunya tu deka datai, tang iya nadai kuasa atas aku.”—John 14:30.

Dalam siti genera, rasul John meda utai ke nyadi ngagai ‘naga ti besai, ular ti asal ke dikumbai Iblis enggau Sitan.’ Munsuh mensia ti pemadu jai, iya nya Sitan dibuai ari serega lalu iya “balat amat ringat laban iya nemu timpuh iya mimit aja agi tinggal.” (Pemandang 12:9, 12) Orang Kristian pechaya sida benung idup ba maya “timpuh iya mimit aja agi tinggal.” Enda lama da agi, “naga nya, iya nya ular ti asal,” deka dikurung dalam siti lubang ti amat dalam pengelama 1,000 taun. Maya nya Sitan enda ulih ngereja nama-nama, lalu Jesus deka merintah nyadi Raja ba Perintah Petara.—Pemandang 20:1, 2.

Ba timpuh 1,000 taun nya, nama deka nyadi ngagai bumi kitai? Sapa ke deka diau ba dunya, lalu baka ni gaya dunya maya nya? Jesus empu kala meri saut nya lebuh iya madahka jaku sempama pasal bedus enggau kambin. Jesus madah sida ke baka bedus ke nyukung sereta ngintu bala menyadi Jesus enggau manah deka nerima berekat, tang sida ke disemaka baka kambin enda ngereja nya. Lalu tu meh utai ke dipadah Jesus pasal sida, ku iya: “Sida tu [kambin] deka mati belama iya. Tang sida ke lurus [bedus] deka idup belama iya.”—Matthew 25:46.

Tu nulung kitai faham jaku Jesus ngagai penjenayah ke dipantang sepiak iya. Sebedau tu, Jesus besemaya ngagai bala rasul iya ti setia pasal sida ke deka nyadi sebagi ari Perintah  serega. Taja pia, Jesus enda madahka semaya nya ngagai penjenayah nya. Tang tu meh semaya Jesus ngagai penjenayah ke udah nesal ati nya: “Enggau bendar aku madah ngagai nuan seharitu: Nuan deka enggau aku ba Paradais.” (Luke 23:43) Nya alai lelaki nya deka idup ba dunya Paradais, iya nya siti taman ti amat manah. Ba jemah ila lebuh Jesus ngakim orang, sida ke baka bedus “deka idup belama iya” ba dunya Paradais.

Tu sejalai enggau utai ke dipadah rasul John pasal gaya dunya jemah ila. Ku iya: “Langkau kain Petara bisi enggau mensia. Iya deka diau enggau sida, lalu sida deka nyadi nembiak Iya. Petara Empu deka enggau sida. Iya deka ngendas semua ai mata ari mata sida, lalu pemati deka nadai agi. Nadai agi balat tusah ati, nadai agi nyabak, nadai agi pedis. Semua utai ti lama udah nadai agi.”—Pemandang 21:3, 4.

Ba jemah ila, penjenayah nya patut diangkatka idup baru ngambika iya ulih diau ba dunya Paradais. Lalu ukai iya aja ke deka diangkatka idup baru laban Jesus madah: “Maya deka datai alai semua orang ke ba dalam kubur deka ninga nyawa iya, lalu pansut. Orang ke ngereja utai ti manah deka diangkatka idup baru lalu bulih pengidup ti meruan belama iya, tang orang ke ngereja utai ti jai deka diangkatka idup baru lalu diakim.”—John 5:28, 29.

Tang baka ni enggau bala rasul ti setia enggau seraban orang ke deka enggau Jesus ba serega? Bup Kudus madah: “Sida deka nyadi bala imam Petara enggau Kristus, lalu sida deka merintah nyadi raja enggau Kristus pengelama 1,000 taun.” (Pemandang 20:6) Sida ke deka merintah enggau Jesus nya, bala lelaki enggau indu ke kala diau ba dunya. Nya alai, sida tentu bisi pengibuh sereta ulih meretika asai ati mensia.—Pemandang 5:10

Nengah genselan tebus iya, Jesus deka nulung semua orang ba dunya sereta ngelepaska sida ari dosa. Lalu iya enggau sida ke merintah enggau iya, deka nulung semua orang ke tetap ati nyadi sempurna. Mensia deka idup nitihka tuju asal Petara lebuh iya ngasuh Adam enggau Awa ngemenuhka dunya tu. Pemati ke nyadi ketegal dosa Adam deka nadai agi!

Enggau nya, Jesus deka nembuka semua pengawa ke diberi Jehovah ngagai iya. Ba pengujung Seribu Taun Jesus Merintah, iya deka nyerahka baru Perintah nya sereta semua mensia ti sempurna ngagai Apai iya. Pengawa Jesus nunjukka iya amat baruh ati. Ku rasul Paul nulis: “Pengudah Petara ngasuh semua utai nunduk ngagai Anak Iya, Anak nya deka nunduk ngagai Petara ke ngasuh semua utai nunduk ngagai iya. Enggau nya, semina Petara siku aja ke deka nyadi pemerintah atas semua utai.”—1 Korint 15:28.

Endang amat, Jesus bisi peranan ti penting kena ngamatka semua tuju Petara. Lalu nyentukka belama iya, Jesus deka terus idup sejalai enggau jaku iya ke madah: “Aku tu meh jalai, pemendar, enggau pengidup.”—John 14:6.