Peter enggau John nitihka iring Jesus, lalu seduai iya udah datai ba Jerusalem nyediaka utai ke dikena ngintu Pengerami Paska. Seraya mata panas nyauka padam, Jesus enggau sepuluh iku rasul pan bejalai mupuk ngagai Jerusalem nengah Bukit Kana. Nya meh kali ti penudi Jesus meda pemandangan nengeri Jerusalem ari Bukit Kana sebedau pemati iya.

Enda lama udah nya, Jesus enggau bala rasul iya datai ba Jerusalem. Sida lalu ngagai rumah alai sida deka ngintu Pengerami Paska. Sida niki tangga ke siti bilik besai ba tingkat atas, lalu meda semua utai udah disediaka enggau manah. Kebendar iya, Jesus enda sabar deka ngintu Pengerami Paska tu, lalu iya madah: “Aku keran amat deka makai enggau kita maya Pengerami Paska tu sebedau aku merinsa.”—Luke 22:15.

Kebendar iya, beberapa taun sebedau nya, pengawa nyuaka wain berengkah nyadi sebagi ari adat ke diintu maya Pengerami Paska. Nya alai, pengudah mangkuk disuaka ngagai Jesus, iya besampi meri terima kasih lalu madahka: “Ambi mangkuk tu lalu sadung ngagai tiap iku kita, laban aku madah ngagai kita: Berengkah ari diatu, aku enda agi ngirup wain nyentuk ngagai Perintah Petara datai.” (Luke 22:17, 18) Jaku Jesus terang nunjukka iya deka mati enda lama da agi.

Lebuh pengerami nya, Jesus bediri lalu ngengkahka gari luar iya ke tisi. Udah nya, iya ngambi kain tula sereta nuang ai ke dalam bisin. Ba jeman nya, orang ke bempu rumah deka ngasuh siku ulun masu kaki bala temuai iya. (Luke 7:44) Tang ba maya nya, orang ke bempu rumah nadai enggau sida. Nya alai, Jesus masu kaki bala murid iya. Iya ke amat, siku ari bala rasul ulih ngereja nya, tang nadai siku pan sanggup. Kati tiap iku rasul nya ngasaika diri manah agi ari rasul ke bukai? Enda ngira nama kebuah iya, sida berasai malu lebuh Jesus masu kaki sida.

Lebuh Jesus datai ngagai Peter, Peter madah: “Aku enda sekali-kali ngelakka nuan masu kaki aku.” Jesus nyaut iya: “Enti aku enda masu kaki nuan, nuan enda ulih enggau aku.” Lalu Peter madah ngagai Jesus: “Tuan, enti pia, anang semina masu kaki aku. Basu mega jari enggau pala aku.” Tang iya tentu tekenyit lebuh Jesus madah: “Barang sapa ke udah mandi, semina patut masu kaki iya laban semua tubuh iya udah beresi. Kita beresi, tang ukai semua kita beresi.”—John 13:8-10.

Jesus masu kaki semua 12 iku rasul, nyengkaum Judas Iskariot. Pengudah iya ngerasukka  gari luar iya lalu duduk baru, Jesus nanya: “Kati kita meretika utai ke udah digaga aku ke kita? Kita ngangauka aku ‘Pengajar’ enggau ‘Tuan.’ Amat utai ku kita nya laban aku endang Pengajar enggau Tuan kita. Nya alai, enti aku ke nyadi Tuan enggau Pengajar kita udah masu kaki kita, kita mega patut masu kaki pangan diri. Laban aku udah netapka teladan ke kita, kita mega patut ngereja utai ke udah dikereja aku ngagai kita. Enggau bendar aku madah ngagai kita: Nadai ulun ke besai agi ari tuan iya, lalu orang ke dikirumka enda besai agi ari orang ke ngirumka iya. Enti kita nemu utai tu, kita deka lantang ati enti kita ngereja nya.”—John 13:12-17.

Endaka chara Jesus ngajar pasal pemaruh ati amat negu ati? Bala murid Jesus enda patut ngenuluka diri empu, lalu ngumbai diri manah agi ari orang bukai sereta minta diri diintu. Tang sida patut nunda teladan Jesus, taja pia nya ukai reti sida patut seruran masu kaki orang bukai. Sida enda patut bepilih mata lebuh nulung orang bukai, lalu mesti sanggup ngintu orang bukai enggau baruh ati.