Ari Jeriko, Jesus mupuk ngagai Betani. Pejalai nya enda senang laban iya patut bejalai penyauh 20 kilometer ari Jeriko kira-kira 250 meter baruh paras tasik, lalu ngagai Betani kira-kira 610 meter atas paras tasik. Lasarus enggau dua iku menyadi indu iya diau ba siti genturung pendiau ba Betani, di begian timur Bukit Kana kira-kira tiga kilometer ari Jerusalem.

Mayuh orang Judah udah datai ngagai Jerusalem laban sida deka ngintu Pengerami Paska. Sida datai tumu laban sida deka “nuchi diri nitihka Adat sebedau pengerami nya berengkah.” Sida patut nuchi diri enti udah negu orang ke udah mati tauka enti sida ngereja nama-nama utai ke ngasuh sida dikumbai enda tuchi. (John 11:55; Penyampau 9:6-10) Sekeda ari sida ke datai tumu begelumu ba Rumah Sembiang. Sida berandau enggau pangan diri pasal kati Jesus deka datai ngagai pengerami nya tauka enda.—John 11:56.

Sekeda orang madahka Jesus enda datai laban sekeda tuai pengarap deka nangkap lalu munuh iya. Bala tuai pengarap udah meri pesan, barang sapa ke nemu dini alai Jesus patut madah ngagai sida “ngambika sida ulih nangkap iya.” (John 11:57) Sebedau tu, sida nguji deka munuh Jesus pengudah iya ngangkatka Lasarus idup baru. (John 11:49-53) Nya kebuah sekeda orang ngumbai Jesus enda ngayanka diri ba mua orang mayuh.

Jesus datai ba Betani maya hari lima, “enam hari sebedau Pengerami Paska.” (John 12:1) Pengudah nya, Hari Sabat kena 8 Nisan berengkah lebuh mata panas padam hari lima, nyentukka maya mata panas padam ba hari enam. Nitihka Adat, orang enda tau bejalai lebuh Hari Sabat. Nya alai, Jesus tentu udah nembuka pejalai iya ari Jeriko ngagai Betani sebedau Hari Sabat. Maya nya, Jesus engka ngagai rumah Lasarus, baka ke kala digaga iya sebedau tu.

Simon mega diau ba Betani, lalu iya mai Jesus enggau bala kaban iya, nyengkaum Lasarus ngagai rumah iya begulai makai maya hari enam malam. Sebedau tu Simon kala “sakit lan,” lalu engka Jesus ke ngeraika iya. Ba rumah Simon, Marta bagas gawa nyediaka pemakai ke bala temuai. Lalu Maria deka ngayanka pengibuh ngagai Jesus. Tang utai ti dikereja iya ngasuh orang bukai pedis ati.

Maria muka sebutul alabaster, ke bisi “kira-kira setengah liter minyak wangi. Minyak wangi nya minyak nard ti tulin.” (John 12:3) Rega minyak wangi nya kira-kira 300 denari, sama enggau gaji setaun! Maria nuangka minyak wangi nya ba pala enggau kaki Jesus. Udah nya, Maria ngendas kaki Jesus ngena buk iya. Nyadi rumah nya penuh laban bau minyak wangi nya.

 Bala murid pedis ati lalu nanya: “Nama kebuah masau minyak wangi nya?” (Mark 14:4) Judas Iskariot mega enda rindu utai ke digaga Maria. Ku iya: “Nama kebuah minyak wangi nya enda dijual ngena rega 300 denari lalu duit nya diberi ngagai orang ke seranta?” (John 12:5) Kebendar iya, Judas enda ibuhka orang ke seranta. Tang iya suah ngenchuri duit ari kutak duit ke dipegai iya.

Jesus ngetanka Maria, lalu madahka: “Nama kebuah kita ngasuh indu tu tusah ati? Iya udah ngereja utai ti manah ke aku. Orang ke seranta deka seruran bisi enggau kita, tang aku enda seruran bisi enggau kita. Lebuh iya nuang minyak wangi nya ba tubuh aku, iya nyediaka aku ke deka dikubur. Enggau bendar aku madah ngagai kita: Enda ngira ba dini alai Berita Manah ditusui ba serata dunya, utai ke udah digaga indu tu pan deka ditusui, kena ngingatka iya.”—Matthew 26:10-13.

Jesus udah ba Betani lebih ari sehari, lalu berita pasal penatai iya udah ngelekai ngagai mayuh orang. Nya alai mayuh orang Judah datai ngagai rumah Simon, ukai semina deka meda Jesus tang sida mega deka meda Lasarus, “ke udah diidupka Jesus ari mati.” (John 12:9) Bala tuai imam belabuh ngiga chara munuh Lasarus enggau Jesus. Tu ketegal, sida ngumbai pengangkat Lasarus ari mati ngasuh mayuh orang arapka Jesus. Bala tuai imam nya amat jai!