Ba Bukit Kana, Jesus udah madahka jaku sempama pasal sepuluh iku indu dara enggau pasal duit pirak. Diatu, Jesus madahka siti da agi sempama pasal bedus enggau kambin. Tu semua saut Jesus ngagai tanya ari bala rasul pasal tanda ti nunjukka iya pulai baru, enggau tanda pengujung dunya tu.

Jesus ngepunka jaku sempama nya enggau madahka: “Lebuh Anak Mensia datai dalam mulia iya enggau semua melikat, iya deka duduk ba kerusi diraja iya ti bemulia.” (Matthew 25:31) “Anak Mensia” dalam sempama tu, merujuk ngagai Jesus laban sebedau tu, iya suah ngena gelar nya lebuh nyebut pasal diri empu.—Matthew 8:20; 9:6; 20:18, 28.

Kemaya jaku sempama tu deka dikeamatka? Sempama tu deka dikeamatka ba jemah ila, lebuh Jesus “datai dalam mulia iya” enggau semua melikat lalu duduk “ba kerusi diraja iya ti bemulia.” Sebedau tu, Jesus kala madah “Anak Mensia datai ba atas remang ngena kuasa enggau mulia ti besai,” enggau bala melikat iya “sepengudah penusah nya nyadi.” (Matthew 24:29-31; Mark 13:26, 27; Luke 21:27) Nya alai, nama deka digaga Jesus lebuh iya datai dalam mulia iya?

Jesus madahka: “Lebuh Anak Mensia datai, . . . semua bansa deka digempuruka ba mua iya, lalu iya deka nyeraraka sida ari pangan diri, baka pengibun bedus ke nyeraraka bedus ari kambin. Bala bedus deka diengkah iya ba sepiak kanan iya. Tang bala kambin diengkah ba sepiak kiba iya.”—Matthew 25:31-33.

Nama deka nyadi ngagai bala bedus nya? Jesus madahka: “Udah nya, Raja deka bejaku ngagai orang ke ba sepiak kanan iya: ‘Datai kitu, kita ke udah diberekatka Apai aku, awakka kita bempu Perintah ti udah disedia ke kita kenyau ari penumbuh dunya.’” (Matthew 25:34) Nama kebuah sida deka diberekat?

 Raja nya nerangka: “Lebuh aku lapar, kita meri aku makai; lebuh aku aus, kita meri aku ngirup; kita enda ngelala aku, tang kita ngelaluka aku ngagai rumah kita; lebuh aku telanjai, kita meri aku gari; lebuh aku sakit, kita ngintu aku; lebuh aku dijil, kita ngabas aku.” Lebuh bala bedus, iya nya “orang ke lurus,” nanya Jesus kemaya sida ngereja pengawa ti badas nya, Jesus nyaut sida: “Lebuh kita ngereja nya ngagai siku ari menyadi aku ti pemadu mit, kita ngereja nya ngagai aku.” (Matthew 25:35, 36, 40, 46) Sida ukai ngereja utai ti badas tu ba serega, laban nadai orang ke sakit tauka lapar ba dia. Nya alai, orang ke lurus ngereja utai ti manah ngagai menyadi Jesus ke bisi ba dunya.

Nama deka nyadi ngagai raban kambin ke diengkah ba sepiak kiba Raja? Jesus madahka: “Udah nya, [Raja] bejaku ngagai orang ke ba sepiak kiba iya: ‘Rari ari tu, kita ke kena sumpah. Alai kita ngagai api ti enda nemu padam, ke udah disedia ke Sitan enggau ke bala melikat iya. Laban lebuh aku lapar, kita enda meri aku makai; lebuh aku aus, kita enda meri aku ngirup. lebuh kita enda ngelala aku, kita enda ngelaluka aku ngagai rumah kita; lebuh aku telanjai, kita enda meri aku gari; lebuh aku sakit enggau dijil, kita enda ngintu aku.’” (Matthew 25:41-43) Sida ba raban kambin nya patut diukum, laban sida nadai nunjukka pengibuh ngagai bala menyadi Kristus ke bisi ba dunya.

Ari sempama tu, bala rasul nemu lebuh Jesus ngakim orang, iya deka nentuka sekalika sesiku orang deka idup meruan belama iya tauka mati. Jesus madahka: “Nya alai [Raja] deka nyaut sida: ‘Enggau bendar aku madah ngagai kita: Enti kita enda ngereja nya ngagai siku ari menyadi aku ti pemadu mit, kita enda ngereja nya ngagai aku.’ Lalu sida tu deka mati belama iya. Tang sida ke lurus deka idup belama iya.”—Matthew 25:45, 46.

Nya alai, saut ari Jesus ngagai tanya bala rasul ulih nulung semua bala murid iya meresa ulah enggau pengawa sida.