Kaul ti rapat datai ari pengerindu. Mayuh agi nuan belajar pasal Jehovah, besai agi pengerindu nuan ke Iya. Lebuh pengerindu nuan ngagai Petara majak mansang, pengingin nuan deka nyembah Iya mega mansang. Tu meransang nuan deka nyadi murid Jesus Kristus. (Matthew 28:19) Lebuh nuan nyadi sebegian ari diri sebilik Saksi-Saksi Jehovah, nuan ulih ngasaika kaul ti rapat enggau Petara belama iya. Nama patut digaga nuan?

Nuan patut ngayanka pengerindu nuan ngagai Petara ari ngasika ukum Iya. ‘Laban reti rinduka Petara nya kitai ngasika pesan Iya. Lalu pesan Iya ukai utai ti mar dititihka kitai.’—1 Jhn. 5:3.

Titihka utai ke dipelajarka nuan. Jesus bisi cherita kena nerangka tu. Seiku lelaki ti pintar nirika rumah iya ba atas batu. Seiku lelaki ke beli nirika rumah iya ba atas pasir. Lebuh kabut ti besai datai, rumah ke didirika ba atas batu enda runtuh, tang rumah ke didirika ba atas pasir runtuh. Jesus madahka orang ke ningaka ajar iya lalu ngereja nya baka seiku lelaki ke pintar ti nirika rumah iya ba atas batu. Tang orang ke enda ningaka ajar iya lalu enggai ngereja nya baka seiku lelaki ke nirika rumah ba atas pasir. Ni bagi teladan lelaki nya ke deka dititihka nuan?—Matthew 7:24-27.

 Nyerahka diri. Tu reti iya nuan besampi ngagai Jehovah lalu madahka diri deka ngereja peneka Iya belama iya. Ngereja peneka Petara ngayanka nuan nya murid Jesus Kristus.—Matthew 11:29.

Dibaptisa. “Angkat nuan, lalu dibaptisa, ngambika dosa nuan dibuai, lalu besampi dalam nama Iya.”—SKR. 22:16.

Nyembah Petara enggau pengabis ati. ‘Kereja semua utai enggau pengabis ati kita, baka ke bekereja ke Petara, ukai ke mensia’—Kolosi 3:23.