Kati nuan deka ngaga pansik kena nambahka penemu nuan pasal Bup Kudus? Kati nuan deka nemu pasal sekeda ayat, orang, endur, tauka utai ke dipadah ba Bup Kudus? Tauka nuan deka nemu sekalika Jaku Petara amat ulih nulung nuan mutarka penanggul ke ditapi nuan? Enti pia, datai meh ngagai librari ba Palan Gempuru.

Librari tu nyediaka utai ke beguna kena ngaga pansik. Endang amat, ukai semua litaricha pasal Bup Kudus ke dikeluarka Saksi-Saksi Jehovah bisi dalam bansa jaku nuan. Tang, librari ba Palan Gempuru bisi nyediaka mayuh litaricha ke baru. Librari tu mega engka nyediaka mayuh bengkah salin Bup Kudus, kamus enggau utai bukai ke dikena ngaga pansik. Nuan ulih ngena librari sebedau tauka pengudah begempuru. Enti bisi komputer disediaka, nuan mega ulih ngena Watchtower Library. Program elektronik tu ngembuan mayuh litaricha kami, lalu senang dikena ngaga pansik. Nuan semina naip subjek, leka jaku tauka ayat Bup Kudus enti deka ngaga pansik ngena program tu.

Librari tu beguna bendar ngagai pelajar ba Gempuru Pengidup enggau Pengawa Kristian. Nuan ulih ngena librari ba Palan Gempuru lebuh nuan nyediaka begian nuan. Tuai ti Nyaga Gempuru Pengidup enggau Pengawa Kristian megai pengawa nyaga librari tu. Iya betanggungjawap nentuka litaricha ke pemadu baru disimpan ba librari nya, lalu ditusun enggau manah. Iya tauka pengajar Bup Kudus nuan ulih nulung nuan baka ni ngiga utai ke diguna nuan. Taja pia, nadai bup tau dibai pansut ari Palan Gempuru. Kitai mega deka nyaga bup nya enggau manah sereta enda nulis utai ba bup nya.

Bup Kudus madahka, kena ngulihka penemu pasal Petara, kitai enda tau enda ngiga iya baka ke ngiga reta ti dilalaika. (Jaku Dalam 2:1-5) Librari ba Palan Gempuru ulih nulung nuan berengkah ngiga penemu tu.

• Nama perengka kena ngaga pansik ke bisi ba librari Palan Gempuru?

• Sapa ulih nulung nuan ngena librari enggau pemadu manah?