Kira-kira ba bulan April, 30 M., Jesus mupuk ngagai Jerusalem. Mayuh orang ngagai kuta nya nyambut pengerami Paska. Ba pengerami tu, sida meri jelu nyadika pemeri ba rumah sembiang. Sekeda orang mai jelu, tang ke bukai meli jelu ba Jerusalem.

Lebuh Jesus ba rumah sembiang, iya meda orang bejualka jelu. Sida bedagang ngiga penguntung ke diri empu ba rumah sembiang Jehovah! Nya ngasuh Jesus amat ringat. Iya ngaga siti penyipat ari tali lalu muru bedus enggau sapi ari rumah sembiang nya. Iya nungkupka mija orang ke penukar duit, lalu mubuhka duit sida ba tanah. Jesus madah ngagai orang ke  nyual burung achang: ‘Bai utai tu ke luar! Badu agi ngaga rumah Apai aku nyadi rumah kedai!’

Orang ba rumah sembiang nya alit ati meda utai ke digaga Jesus. Murid Jesus lalu ingat utai ke dipadah pasal Messiah: ‘Aku deka bisi pengerindu ti dalam ngagai rumah Jehovah.’

Udah nya, ba taun 33 M., Jesus ngasuh rumah sembiang tuchi kedua kali. Iya enggai ngelakka orang enda bebasaka rumah Apai iya.