Enda lama pengudah Jesus mandangka diri ngagai bala rasul iya, Peter mutuska deka berikan ba Danau Galili. Thomas, James, John enggau sekeda bala murid ke bukai nitihka iya. Semalam-malam sida berikan tang nadai bulih utai.

Tumu pagi hari siti, sida meda seiku lelaki bediri ba tebing. Iya ngangauka sida ari tebing: ‘Bisi kita bulih ikan?’ Sida nyaut: ‘Nadai!’ Ku lelaki nya: ‘Tibarka jala kita ari tisi kanan perau.’ Lebuh sida ngereja nya, jala penuh enggau ikan nyentukka sida enda ulih narit jala nya ngagai perau. Tekala nya, John nemu lelaki nya Jesus, lalu ku iya: ‘Tuan nya!’ Peter terus terejun ke ai lalu nyemerai ke tebing. Bala murid ke bukai nitih ngena perau.

 Lebuh sida datai ba tebing, sida meda ruti enggau ikan benung dipanggang ba api. Jesus ngasuh mai sekeda ikan sida kena nambahka pemakai. Udah nya ku iya: ‘Aram makai.’

Udah sida badu makai, Jesus nanya Peter: ‘Kati nuan rinduka aku lebih ari berikan?’ Saut Peter: ‘Au Tuan. Nuan nemu aku rinduka nuan.’ Ku Jesus: ‘Beri anak domba aku makai.’ Jesus nanya sekali agi: ‘Peter, kati nuan rinduka aku?’ Ku Peter: ‘Tuan, nuan nemu aku rinduka nuan.’ Ku Jesus: ‘Ibun bedus aku.’ Jesus nanya iya ketiga kali. Peter amat tusah ati. Ku Peter: ‘Tuan, nuan nemu semua utai. Nuan nemu aku rinduka nuan.’ Ku Jesus: ‘Beri bedus aku makai.’ Udah nya iya madah ngagai Peter: ‘Terus nitihka aku.’