Imam Besai Eli bisi dua iku anak lelaki ke nyadi imam ba langkau sembiang. Nama seduai iya Hopni enggau Pinehas. Seduai iya enda ngasika adat Jehovah, lalu amat jai enggau orang. Lebuh orang Israel meri pemeri ngagai Jehovah, Hopni enggau Pinehas suah ngambi dagin ti pemadu manah ke diri empu. Eli nemu ulah anak iya, tang iya enda nagang seduai iya. Kati Jehovah deka neju utai tu terus nyadi?

Taja pan Samuel jauh biak ari Hopni enggau Pinehas, iya enda nitihka ulah seduai iya. Jehovah amat gaga ati enggau Samuel. Ba siti malam, lebuh Samuel benung tinduk, iya ninga nyawa ngangauka nama iya. Iya dani lalu belanda ngagai Eli, ku iya: ‘Tu aku!’ Tang Eli nyaut, ‘Nadai aku ngangauka nuan. Tinduk meh nuan.’ Samuel pulai baru ngagai peninduk iya. Udah nya, nyawa nya ngangau baru. Lebuh Samuel ninga nyawa nya ketiga kali, nya baru Eli nemu Jehovah ke ngangauka Samuel. Eli madah ngagai Samuel, enti iya ninga nyawa nya baru, iya patut nyebut: ‘Bejaku meh Jehovah. Nembiak Nuan mending.’

Samuel pulai baru ngagai peninduk iya. Udah nya iya ninga: ‘Samuel! Samuel!’ Samuel lalu nyaut, ‘Bejaku meh. Nembiak Nuan mending.’ Jehovah madah ngagai Samuel: ‘Padah ngagai Eli Aku  deka ngukum sida sebilik. Iya nemu dua iku anak iya ngereja utai ti jai ba langkau sembiang tang iya enda nagang seduai iya.’ Pagi hari siti, Samuel muka pintu ngagai langkau sembiang, baka ke selalu digaga iya. Iya takut deka madah ngagai imam besai utai ke dipadah Jehovah. Tang Eli ngangauka iya: ‘Anak, nama utai ke dipadah Jehovah ngagai nuan? Padahka semua ngagai aku.’ Samuel lalu madah semua utai ngagai Eli.

Lebuh Samuel mansang besai, Jehovah seruran ngiring iya. Ari ujung menua nyentuk ngagai menua bukai, semua orang Israel nemu Samuel udah dipilih Jehovah nyadi nabi enggau hakim.