Mayuh orang Israel berengkah nyembah patung baru, nya alai Jehovah nejuka orang Pilistin merintah menua sida. Tang agi bisi sekeda orang Israel ke rinduka Jehovah. Seiku ari sida nya, lelaki ke benama Manoah. Iya enggau bini iya nadai anak. Bisi sekali, Jehovah nganjung seiku melikat ngagai bini Manoah. Melikat nya bejaku: ‘Nuan deka bisi seiku anak lelaki. Iya deka ngelepaska orang Israel ari orang Pilistin. Iya deka nyadi orang Nasir.’ Nemu nuan sapa orang Nasir? Sida pengereja pengawa ke Jehovah ti spesial. Orang Nasir enda tau nguntin buk sida.

Nyau kelama, anak lelaki Manoah ada, lalu iya meri nama anak iya Samson. Lebuh Samson mansang besai, Jehovah meri iya pengering. Iya ulih munuh seiku singa ngena jari iya aja. Bisi sekali, Samson munuh 30 iku orang Pilistin kediri. Orang Pilistin begedika iya lalu ngiga jalai deka munuh iya. Ba siti malam lebuh Samson tinduk ba nengeri Gaza, sida mupuk ngagai pintu kuta lalu nganti iya dia ngambika sida ulih munuh iya pagi nya. Tang ba tengah malam, Samson dani lalu ngagai pintu kuta, ngenchabut pintu nya ari dinding kuta. Iya lalu ngesan pintu kuta nya nyentukka ngagai tuchung bukit ti ari atas nengeri Hebron!

Udah nya, orang Pilistin betemu enggau pangan indu Samson, Delilah, lalu madah: ‘Kami deka mayar nuan seribu seratus singkap duit pirak enti nuan nemu ari ni penatai pengering Samson. Kami deka nangkap iya lalu nyimpan iya dalam jil.’ Delilah dekaka duit nya, nya alai iya setuju. Keterubah, Samson enggai madah kebuah iya ulih nyadi kering. Tang Delilah majak nanya iya nyentukka iya madahka utai ti bendar ngagai Delilah. ‘Buk aku nadai kala diguntin laban aku orang Nasir,’ ku iya madahka Delilah. ‘Enti buk aku diguntin, pengering aku lenyau.’ Samson udah ngaga penyalah ti besai laban madahka ngagai Delilah, enda pia?

Tekala nya, Delilah madahka ngagai orang Pilistin: ‘Aku udah nemu!’ Iya ngasuh Samson tinduk ba pah iya. Udah nya iya mesan  seiku orang nguntin buk Samson. Delilah lalu manjung: ‘Samson! Orang Pilistin datai!’ Samson dani tang pengering iya udah lenyau. Orang Pilistin nangkap iya, ngasuh iya buta, lalu nyimpan iya ba rumah jil.

Bisi sekali, beribu iku orang Pilistin begempuru ba rumah sembiang petara sida Dagon, lalu manjung: ‘Petara kitai udah nyerahka Samson ngagai jari kitai! Bai Samson pansut! Awakka iya merindang kitai!’ Sida ngasuh Samson bediri entara tiang ti besai lalu ngeleseka iya. Samson besampi: ‘O Jehovah, beri aku pengering sekali agi.’ Maya nya, buk Samson tumbuh panjai baru. Iya ngeju dua iti tiang rumah sembiang nya enggau naka pengering iya. Bengunan nya runtuh lalu munuh semua orang ba rumah sembiang nya. Samson mega mati.