Ba menua Siria, bisi seiku anak mit indu orang Israel ke diau jauh ari menua iya. Iya ditabanka bala soldadu orang Siria ari apai indai iya lalu nyadi orang gaji bini seiku kepala soldadu ke benama Naaman. Anak mit indu nya nyembah Jehovah, taja pan orang ba endur nya enda nyembah Jehovah..

Naaman bisi penyakit kulit ti balat, lalu iya seruran berasai pedis. Anak mit indu nya amat deka nulung iya. Iya madahka bini Naaman: ‘Aku nemu seiku orang ke ulih ngeraika laki nuan. Ba menua Israel, bisi seiku nabi Jehovah ke benama Elisa. Iya ulih ngeraika laki nuan.’

Bini Naaman madah ngagai iya pasal utai ke disebut anak mit indu nya. Naaman sanggup nguji bemacham chara. Nya alai, iya mupuk ngagai rumah Elisa ba Israel. Naaman ngumbai Elisa deka ngambat iya baka orang ti dipebasa. Tang ari ke bejaku enggau iya empu, Elisa nganjung orang gaji iya ngagai Naaman lalu madahka  pesan tu: ‘Mupuk lalu masu diri nuan tujuh kali ba Sungai Jordan. Udah nya nuan deka gerai.’

Naaman amat asa ati. Ku iya: ‘Aku ngumbai nabi tu deka besampi ngagai Petara iya lalu ngeraika aku ngena chara ti ngalitka ati. Tang iya ngasuh aku ngagai sungai ba Israel. Sungai ba Siria manah agi ari sungai nya. Nama kebuah aku patut masu diri ba sungai nya?’ Naaman ringat lalu ninggalka rumah Elisa.

Bala orang gaji Naaman nulung iya berunding enggau manah. Ku sida: ‘Enda ke nuan sanggup nguji bemacham chara ngambika ulih gerai? Utai ke diasuh nabi nya mudah aja. Nama kebuah nuan enggai ngereja nya?’ Naaman mendingka sida. Iya ngagai Sungai Jordan lalu nyelam ba sungai nya tujuh kali. Pengudah ketujuh kali, Naaman pansut ari ai lalu gerai. Iya amat beterima kasih lalu pulai ngagai Elisa madahka asai ati iya. Ku Naaman: ‘Diatu aku nemu Jehovah Petara ti bendar.’ Ba runding nuan, baka ni asai anak mit indu orang Israel nya lebuh meda Naaman udah gerai?