Benhadat, raja menua Siria, majak nyerang menua Israel. Tang raja Israel ulih ngerarika diri laban nabi Elisa udah tumu nangkan iya. Nya alai, Benhadat nguji deka nangkap Elisa. Iya nemu Elisa ba nengeri Dotan, lalu iya nganjung bala soldadu iya nangkap Elisa.

Soldadu Siria datai ba Dotan lebuh malam hari. Tumu pagi hari siti, orang gaji Elisa pansut lalu meda bala soldadu ngelulung nengeri nya. Iya nyadi takut lalu nyerauh: ‘Elisa, nama utai ti patut dikereja kitai?’ Saut Elisa: ‘Bala kitai mayuh agi ari bala sida.’ Tekala nya, Jehovah ngasuh orang gaji Elisa meda bukit ke ngelingi nengeri nya nyau penuh enggau kuda sereta kerita perang ti beapi-api.

Lebuh bala soldadu Siria nguji deka nangkap Elisa, iya besampi ngagai Jehovah minta tulung. Nya alai, Jehovah ngasuh sida saru nyentukka sida enda nemu penunga diri. Elisa madah ngagai bala soldadu: ‘Kita ba nengeri ti salah. Titihka aku, lalu aku deka nguluka  kita ngagai orang ke digiga kita.’ Sida nitihka Elisa nyentukka ngagai Samaria, endur raja Israel diau.

Tang lebuh sida nemu endur diri, nya udah laun. Raja menua Israel nanya Elisa: ‘Patut aku munuh sida?’ Kati Elisa ngena peluang tu malas penyai ngagai orang ke deka ngemediska iya? Enda. Ku Elisa: ‘Anang munuh sida. Beri sida makai ngirup, lalu asuh sida pulai ngagai menua sida empu.’ Nya alai, raja nyediaka pengerami makai lalu nganjung sida pulai.