Chunto iya, peratika sekeda jaku benabi tu:

• “Laban bansa siti deka beperang ngelaban bansa siti, lalu menua siti deka beperang ngelaban menua siti, lalu lapar pungkang enggau tanah berenyang deka nyadi ba mayuh bengkah endur.”—Matthew 24:7.

• ‘Ba hari ti penudi mayuh macham penusah deka nyadi. Laban orang deka semina berundingka diri empu aja, angkunka duit, temegah, sumbung, bejai orang, enda ngasika apai indai, enda nemu meri terima kasih, enda kudus, kasar enggau orang, nadai nemu siruka orang, bejakuka orang, enda nemu nagang diri, mangah, begedika utai ti badas, aum-juak, enda berunding ngereja utai, ngerigangka diri laban sumbung, semina deka ngelantangka diri lalu enda rinduka Petara.’—2 Timoti 3:1-4.

Sekeda orang ngumbai, jaku benabi tu ngambarka dunya tu deka anchur. Mensia enda ulih nagang penyai ke majak balat tu. Nitihka Bup Kudus, mensia endang nadai penemu sereta penau kena mutarka penanggul. Fakta tu bisi diterangka ba ayat di baruh:

• “Jalai ti dikumbai nuan jalai ti ngena, tau nuju ngagai pemati.”—Jaku Dalam 14:12.

• “Dunya alai sekeda orang ke bisi kuasa diau, alai orang bukai ke natka diri merinsa dipegai sida.”—Pengajar 8:9.

• “Nadai siku kami bisi kuasa atas seput diri empu.”—Jeremiah 10:23.

Enti mensia terus ditejuka ngereja nama-nama utai ke dikinginka sida, dunya tu tentu deka anchur. Tang nya sigi enda nyadi! Nama kebuah? Tu saut ari Bup Kudus:

• Petara “udah ngengkahka dunya tegap ba pugu iya, lalu iya enda dikinsitka.”—Masmur 104:5.

• “Serak siti diganti serak siti, tang dunya mengkang enda berubah.”—Pengajar 1:4.

• “Orang ke lurus deka bempu menua tu lalu diau ditu belama iya.”—Masmur 37:29.

• “Awakka gandum seruran mayuh di menua. Awakka bukit penuh laban utai ti ditanam.”—Masmur 72:16.

Ajar Bup Kudus tu meri saut ti terang. Mensia enda ulih punas ketegal pencemaran, kurang pemakai enggau ai, tauka penyakit berampit. Dunya mega enda ulih anchur taja bisi bom nuklear. Nama kebuah enda ulih? Laban semina Petara ke ngatur utai ke deka nyadi ngagai dunya tu jemah ila. Amat, Iya udah nejuka mensia nentuka jalai pengidup sida empu. Tang, sida deka ngetau asil ari pemutus sida empu. (Galatia 6:7) Dunya tu ukai baka kerita api ke enda ulih ditagang, lalu anchur abis. Petara udah netapka tatak naka ni mensia ulih ngenataika pengerusak.—Masmur 83:18; Hebrew 4:13.

Tang bisi utai bukai mega deka digaga Petara. Iya deka ngenataika mayuh pemaik. (Masmur 37:11) Tu semina lansa aja pasal pengadang jemah ila ti manah ke dipelajarka bejuta iku Saksi-Saksi Jehovah ari Bup Kudus.

Saksi-Saksi Jehovah bisi ba serata dunya. Sida nya lelaki sereta indu ke datai ari mayuh macham bansa enggau adat sereta umur. Sida nyembah Petara ti bendar, ke benama Jehovah lalu nama tu bisi ditulis dalam Bup Kudus. Sida enda irau pasal jemah ila, laban Bup Kudus madah, ‘Jehovah udah ngaga langit. Iya nya meh Petara! Iya nempa lalu ngaga dunya. Iya ngaga dunya tegap sereta tan. Iya nadai ngaga dunya nyadi endur ti sunyi nadai mensia, tang nyadi endur alai mensia diau. Nya meh Petara ti nyebut, “Aku tu Jehovah, lalu kita nadai petara bukai.”’—Isaiah 45:18.