1-2. Nama reti tebus, lalu nama kebuah kitai begunaka tebus?

 ADAM nya mensia ti sempurna. Lebuh iya ngereja dosa, iya lenyau peluang idup belama iya, ukai semina ke diri empu tang mega ke bala peturun iya. Utai ke digaga Adam endang salah. Iya empu milih deka ngereja dosa. Tang baka ni enggau bala peturun iya? Sida nadai ngereja penyalah. (Rom. 5:12, 14) Adam patut mati ketegal utai ke digaga iya. Tang kati Jehovah ulih ngereja nama-nama utai ngambika bala peturun Adam ulih idup belama iya? Au! Enda lama pengudah Adam bedosa, Jehovah berengkah madahka baka ni Iya deka nyelamatka bala peturun Adam ari dosa enggau pemati. (P-kal. 3:15) Ba maya ti udah ditetapka, Jehovah deka nganjung Anak Iya ari serega lalu ‘nyerahka nyawa diri kena nebus orang mayuh.’—Mrk. 10:45; Jhn. 6:51.

² Nama reti tebus? Lebuh disebut ba Sempekat Baru, tebus reti nya rega ke patut dibayar Jesus kena mulaika utai ke udah dilenyauka Adam. (1 Kor. 15:22) Nama kebuah kitai begunaka tebus? Ba Adat Moses, standard pengelurus Petara begunaka nyawa balas nyawa. (P-sut. 21:23, 24) Adam lenyau pengidup iya ti sempurna. Nitihka standard pengelurus Petara, Jesus nyerahka nyawa iya ti sempurna. (Rom. 5:17) Enggau chara nya, iya nyadi “Apai ti Meruan belama iya” ngagai orang ke arapka tebus.—Isa. 9:6; Rom. 3:23, 24.

 3. Nitihka John 14:31 enggau 15:13, nama kebuah Jesus sanggup nyerahka nyawa iya ti sempurna?

³ Jesus sanggup nyerahka nyawa diri ketegal pengerindu iya ti besai ke Apai iya ti di serega sereta ke kitai. (Bacha John 14:31; 15:13.) Ketegal pengerindu, iya keran deka tetap ati nyentukka pengujung idup iya, lalu nembuka peneka  Apai iya. Asil iya, tuju asal Jehovah ke mensia enggau dunya deka dikeamatka. Ba artikel tu, kitai deka berandauka (1) kebuah Petara nejuka Jesus balat diperinsa sebedau iya mati, (2) pasal seiku penulis Bup Kudus ke ngumbai tebus nya amat berega, (3) baka ni kitai ulih ngayanka diri beterima kasih, sereta (4) baka ni kitai ulih ngenalamka asai terima kasih ke tebus ti udah disediaka Jehovah enggau Jesus ke kitai.

 4. Terangka baka ni Jesus mati.

⁴ Gambarka utai ke nyadi ba Jesus sebedau iya mati. Iya ulih minta tulung ari bala melikat kena nyaga iya. Tang, iya enda ngereja nya. Iya nejuka soldadu Rome nangkap lalu malu iya. (Mat. 26:52-54; Jhn. 18:3; 19:1) Sida ngena penyipat ke ulih ngerait tubuh iya. Tu ngujungka Jesus balat telih. Udah nya, sida ngasuh iya ngesan tiang ti berat. Jesus nguji ngirit tiang nya ngagai endur alai iya deka diukum mati. Tang ketegal iya nadai pengering, nya alai soldadu Rome nya ngasuh seiku agi lelaki nulung Jesus ngesan tiang. (Mat. 27:32) Lebuh Jesus datai ba alai endur iya deka diukum mati, bala soldadu mantang jari enggau kaki iya ba tiang. Lebuh soldadu negika tiang nya, pemerat tubuh Jesus tentu ngasuh jari enggau kaki iya ke dipantang ba tiang balat telih. Bala kaban iya tusah ati sereta indai iya nyabak. Tang bala tuai orang Judah ngeleseka iya. (Luk. 23:32-38; Jhn. 19:25) Jesus merinsa bejam-jam. Ketegal iya dipantang ba tiang, jantung enggau lempuang iya tusah deka bejalai enggau manah, lalu nya ngasuh iya tusah deka enseput. Jesus nemu diri udah tetap ati, lalu sebedau iya mati, iya besampi ngagai Jehovah kali ke penudi. Iya udah nya ngendukka pala lalu ngapuska seput. (Mrk. 15:37; Luk. 23:46; Jhn. 10:17, 18; 19:30) Jesus mati enggau chara ti balat merinsa sereta ngenyaika nama iya!

 5. Ba Jesus, nama pekara ke balat agi ari chara iya dibunuh?

⁵ Ba Jesus, chara iya diukum mati enda sebalat jaku tuduh ke diterima iya. Iya diukum mati ketegal dituduh bejaku busung, iya nya orang ke enda bebasaka Petara tauka nama Petara. (Mat. 26:64-66) Jaku tuduh tu amat ngenusahka ati Jesus nyentukka iya ngarapka Apai iya ngelepaska iya ari dikemaluka enggau chara tu. (Mat. 26:38, 39, 42) Nama kebuah Jehovah nejuka Anak Iya ti dikesayau merinsa sereta mati? Aram kitai berandauka tiga iti kebuah.

 6. Nama kebuah Jesus patut dipantang ba tiang perinsa?

⁶ Kesatu, Jesus dipantang ba tiang ngambika ulih ngelepaska orang Judah ari sumpah. (Gal. 3:10, 13) Sida dibaruh sumpah ketegal sida besemaya deka ngasika Adat Petara, tang sida enda ngamatka semaya nya. Sida mega patut mati ketegal sida peturun Adam. (Rom. 5:12) Adat Petara ke orang Israel madahka, enti orang udah ngereja penyalah, iya patut diukum bunuh lalu bangkai iya deka digantung ba sebatang tiang. b (U-dat. 21:22, 23; 27:26) Ketegal Jesus dipantang ba tiang, nya alai orang Judah ulih dilepaska ari sumpah. Lalu pemati iya ulih nulung sida, taja pan sida nulak iya.

 7. Nama kebuah kedua Petara ngemendarka Anak Iya diperinsa?

⁷ Kedua, Petara ngemendarka Anak Iya diperinsa kena nyikap Jesus nyadi Imam Besai  ke jemah ila. Jesus kala ngasaika amat tusah deka ngasika Petara lebuh balat diuji. Iya berasai amat ditekan nyentukka iya besampi “ngena sabak ti inggar, sereta enggau ai mata.” Ketegal Jesus kala berasai balat tusah ati, iya ulih meretika utai ke diguna kitai lalu “ulih nulung [kitai]” lebuh kitai “kena laban penguji.” Kitai beterima kasih ke Jehovah laban milih Imam Besai ti pengasih ke nemu “sinu ati ke pengelemi kitai”!—Heb. 2:17, 18; 4:14-16; 5:7-10.

 8. Nama kebuah ketiga Petara nejuka Jesus diuji enggau balat?

⁸ Ketiga, Jehovah nejuka Jesus diperinsa enggau balat ngambika ulih nyaut tanya ti beguna: Ulih mensia mengkang tetap ati ngagai Jehovah taja pan balat diuji? Sitan madahka enda! Iya madahka mensia semina nyembah Petara ketegal deka bulih utai. Lalu Sitan pechaya sida enda rinduka Jehovah, baka Adam. (Jop 1:9-11; 2:4, 5) Ketegal Jehovah pechaya Jesus deka mengkang tetap ati, Iya nejuka Anak Iya diuji enggau balat. Jesus mengkang tetap ati lalu nunjukka Sitan nya pemula.

 9. Nama teladan ke udah ditetapka rasul John ke kitai?

⁹ Mayuh pengarap orang Kristian ditegapka ketegal ajar pasal tebus. Sida terus nginjil taja pan balat diperinsa sereta napi penanggul ba pengidup sida. Peratika chunto rasul John. Iya enda ngetu nginjil madahka pemendar pasal Kristus sereta tebus. Iya ngereja pengawa nya lebih ari 60 taun. Lebuh iya nyauka beumur 100 taun, perintah Rome ngumbai iya deka ngaga pengachau. Nya alai, sida muai iya ngagai pulau Patmos. Nama penyalah ke udah digaga iya? ‘Ketegal jaku Petara enggau ketegal saksi Jesus.’ (Pem. 1:9) John udah netapka teladan ti manah ba pengarap sereta ulih betan napi penanggul!

10. Baka ni utai ke ditulis John nunjukka iya beterima kasih ke tebus?

¹⁰ Ba bup ke ditulis John dalam Bup Kudus, iya nulis pasal pemesai pengerindu iya ke Jesus sereta asai terima kasih iya ke tebus Jesus. Iya bejaku lebih ari 100 kali pasal tebus tauka penguntung ke dibai ari tebus. Ambika chunto, John nulis: “Enti orang ngereja dosa, kitai endang bisi siku Penyaup ke bejaku ngagai Apai ngarika kitai, iya nya Jesus Kristus ti lurus.” (1 Jhn. 2:1, 2) Utai ke ditulis John mega nekanka kebuah nya beguna ‘besaksi ka Tuan Jesus.’ (Pem. 19:10, Bup Kudus Berita Manah Ka Rebak Diatu) Endang amat, John amat beterima kasih ke tebus. Baka ni kitai mega nunjukka diri beterima kasih ke tebus?

11. Nama utai ke ulih nulung kitai nyeliah ari ngereja dosa?

¹¹ Nyeliah ari ngereja dosa. Enti kitai amat beterima kasih ke tebus, kitai enda madah: ‘Lebuh aku diuji, aku enda ibuh nagang diri. Aku ulih terus ngereja penyalah lalu udah nya minta ampun.’ Tang lebuh kitai diuji ngereja penyalah, kitai patut madah: ‘Enggai! Pengudah semua utai ke udah digaga Jehovah enggau Jesus ke aku, aku enggai sekali-kali ngereja utai ke baka tu.’ Enti kitai napi penanggul tu, kitai ulih minta pengering ari Jehovah, lalu besampi ngagai Iya: ‘Anang nejuka aku napi penguji.’—Mat. 6:13.

12. Baka ni kitai ulih ngena jaku lalau ba 1 John 3:16-18?

¹² Rinduka bala menyadi Kristian. Lebuh kitai nunjukka pengerindu, tu nunjukka  kitai beterima kasih ke tebus. Nama kebuah? Ketegal Jesus meri pengidup iya ukai semina ke kitai aja, tang mega ke bala menyadi Kristian. Enti iya besedia mati ke sida, tu nunjukka sida mega berega ba mata iya. (Bacha 1 John 3:16-18.) Kitai nunjukka pengerindu ngagai bala menyadi Kristian ari chara kitai ngintu sida. (Eps. 4:29, 31–5:2) Ambika chunto, kitai nulung sida lebuh sida sakit tauka lebuh sida napi penanggul, nyengkaum pengerusak alam. Tang, nama patut digaga kitai lebuh bala menyadi Kristian ngereja tauka nyebut utai ke ngemediska ati kitai?

13. Nama kebuah kitai patut ngampun orang bukai?

¹³ Kati nuan bisi pedis ati ngagai menyadi Kristian? (Lew. 19:18) Enti bisi, titihka jaku lalau tu: ‘Sabar enggau pangan diri, lalu ampun pangan diri enti kita bisi enda nyamai ati ngagai pangan diri. Baka Jehovah ke udah ngampun kita, baka nya mega kita ngampun pangan diri.’ (Kol. 3:13) Tiap kali kitai ngampunka bala menyadi, kitai nunjuk ngagai Apai ti di serega, kitai amat beterima kasih ke tebus. Baka ni kitai ulih terus ngenalamka asai beterima kasih ke pemeri ari Petara?

14. Nama siti chara ke ulih ngenalamka asai terima kasih kitai ke tebus?

¹⁴ Beterima kasih ke Jehovah pasal tebus. Ku Joanna ke beumur 83 taun ari India madahka: “Aku berunding amat beguna nyebut pasal tebus ba sampi ninting hari lalu beterima kasih ngagai Jehovah pasal nya.” Ba sampi nuan, perundingka enggau silik pasal penyalah ke udah digaga nuan, lalu minta Jehovah ngampunka nuan. Endang amat, enti nuan udah ngereja penyalah ti besai, nuan mega begunaka tulung ari tuai gempuru. Sida deka mendingka nuan, lalu meri jaku lalau ari Bup Kudus enggau pengerindu. Sida deka besampi enggau nuan lalu minta Jehovah ngampunka nuan ngambika bisi kaul ti manah enggau Jehovah baru.—Jas. 5:14-16.

15. Nama kebuah kitai patut ngiga awak kena macha pasal tebus lalu belematika iya?

¹⁵ Belematika pasal tebus. Ku seiku menyadi indu ke benama Rajamani ke beumur 73 taun: “Lebuh aku macha pasal pemerinsa Jesus, ai mata aku labuh.” Nuan mega engka berasai sinu lebuh berunding pasal  baka ni Anak Petara balat merinsa. Tang majak nuan belematika pasal tebus Jesus, dalam agi pengerindu nuan ke iya enggau Apai iya. Kena nulung nuan belematika tebus, kati nuan ulih ngena topik tu maya belajarka Bup Kudus?

16. Nama penguntung lebuh kitai ngajar orang pasal tebus? (Peda gambar ba mua majalah.)

¹⁶ Ngajar orang pasal tebus. Tiap kali kitai madah ngagai orang pasal tebus, asai beterima kasih kitai deka majak nambah. Kitai bisi perengka ngajar ke ulih dikena ngajar orang kebuah Jesus mati ke kitai. Ambika chunto, kitai ulih ngena pelajar 4 ba brosur Berita Manah Ari Petara! Pelajar tu betajuk “Sapa Jesus Kristus?” Tauka kitai ulih meda pelajar 5 ari bup Nama Ulih Dipelajarka Kitai Ari Bup Kudus? Pelajar tu betajuk “Tebus—Pemeri Petara ti Pemadu Berega.” Ninting taun, kitai ulih ngenalamka asai terima kasih kitai ngagai tebus enggau datai ngagai pengawa Ngingatka Pemati Jesus lalu enggau ransing mai orang enggau kitai. Jehovah meri kitai peluang ngajar orang bukai pasal Anak Iya. Endaka tu basa ti besai ari Jehovah?

17. Nama kebuah tebus nya pemeri ti pemadu besai ke mensia?

¹⁷ Kitai bisi kebuah ti manah ngemansangka sereta ngenalamka asai terima kasih ke tebus. Kesatu, kitai bisi kaul ti rapat enggau Jehovah taja pan kitai enda sempurna. Kedua, pengawa Sitan deka dirusak. (1 Jhn. 3:8) Lalu ketiga, tuju asal Jehovah ke dunya deka dikeamatka. Dunya deka nyadi Paradais. Semua orang ke ditemu nuan deka rinduka Jehovah sereta nyembah Iya. Aram meh kitai ngena pengidup ninting hari kena nunjukka asai beterima kasih ke tebus, iya nya pemeri Petara ti pemadu besai ke mensia!