BAKA NI asai ati nuan lebuh nerima surat ari kaban ti manah? Timoti bisi nerima surat ari rasul Paul, ke dikumbai 2 Timoti. Timoti tentu keran deka ngiga endur ti sunyi ngambika iya ulih macha utai ke ditulis kaban iya. Engka Timoti berunding: ‘Nama berita Paul? Kati iya bisi jaku lalau ke aku bekaul enggau pengawa aku? Kati surat tu ulih nulung aku mujur ba pengawa nginjil sereta ngajar tauka nulung orang bukai?’ Timoti tentu deka tetemuka saut ngagai tanya tu. Tang ke diatu, kitai deka berandauka sekeda jaku lalau ti beguna ba surat tu.

Ba pun surat iya, Paul ngangauka Timoti ‘anak ke dikesayau.’ (2 Tim. 1:2) Tu ngasuh Timoti nemu, Paul amat ibuhka iya. Timoti nerima surat tu ba taun 65 Masihi. Iya engka beumur lebih ari 30 taun, lalu seiku tuai gempuru ti bepeneleba. Iya udah gawa enggau Paul lebih ari sepuluh taun lalu udah belajar mayuh ari Paul.

Timoti tentu balat diperansang lebuh iya nemu Paul tan napi penguji. Paul maya nya benung ditan ba rumah jil di Rome, lalu enda lama agi deka dibunuh. (2 Tim. 1:15, 16; 4:6-8) Timoti ulih meda pemerani Paul lebuh Paul madah: “Aku natka semua utai.” (2 Tim. 2:8-13) Baka Timoti, kitai mega bulih peransang ari teladan Paul.

Paul meransang Timoti ngumbai pengawa ke diberi Petara nya berega. Nya alai, Paul ngasuh Timoti ‘ngidupka pemeri Petara’ ti bisi dalam iya. (2 Tim. 1:6) Leka jaku “pemeri” ke dikena Paul nya ari leka jaku Gerika khaʹri·sma. Leka jaku tu mai reti pemeri ti enda layak diterima tauka diberi enggau pechuma. Timoti nerima pemeri tu lebuh iya diberi tanggung pengawa ba eklisia enggau chara ti ngalitka ati.—1 Tim. 4:14.

Nama patut digaga Timoti enggau pemeri nya? Dalam jaku Gerika, “ngidupka pemeri” nya ‘ngidupka pemeri Petara baka ngidupka api.’ Tu ngingatka Timoti pasal api ke dikena orang ba rumah.  Kekadang, api ba arang nya nyau deka padam. Nya alai, api nya patut diidupka baru. Siti kamus madahka, jaku Gerika (a·na·zo·py·reʹo) ke dikena Paul tau ngambarka “gagit sereta ransing lebuh ngereja pengawa.” Nya alai Paul meransang Timoti: ‘Enggau pengabis ati ngereja pengawa nuan!’ Kemayaharitu, kitai patut ngereja utai ti sama.

Dalam surat Paul, iya bisi madahka utai bukai ke ulih nulung Timoti mujur ngereja pengawa nginjil. Paul nulis: ‘Ngena saup roh kudus ke diau dalam kitai, jaga pesaka ti badas ti udah diserahka ngagai nuan.’ (2 Tim. 1:14) Nama pesaka nya? Nama pesaka ke udah diberi ngagai Timoti? Ba ayat ke sebedau nya, Paul nyebut pasal “jako ti bendar.” Tu dituju ngagai pemendar ke bisi ba Bup Kudus. (2 Tim. 1:13, Bup Kudus Berita Manah Ka Rebak Diatu) Ketegal Timoti orang Kristian, iya patut ngajar pemendar ngagai bala menyadi Kristian sereta orang ke ditemu iya lebuh nginjil. (2 Tim. 4:1-5) Pia mega, Timoti udah dipilih nyadi tuai gempuru kena ngibun bedus Petara. (1 Pet. 5:2) Iya ulih nyaga pesaka, iya nya pemendar ke patut diajar iya enti iya bepanggai ba roh kudus Jehovah sereta Jaku Iya.—2 Tim. 3:14-17.

Kemayaharitu, kitai bekunsika pemendar lebuh ngereja pengawa nginjil. (Mat. 28:19, 20) Kitai ulih nunjukka terima kasih ke pemendar ke diterima kitai enggau majak besampi sereta bisi belajarka Bup Kudus. (Rom. 12:11, 12; 1 Tim. 4:13, 15, 16) Kitai engka nerima pengawa nyadi tuai gempuru tauka gawa penuh jam ke Jehovah. Pengawa tu patut ngasuh kitai baruh ati sereta nulung kitai bepanggai ba Jehovah. Kitai ulih nyaga pesaka nya enti kitai ngumbai nya berega lalu bepanggai ba Jehovah kena nulung kitai nyaga nya.

Sebagi ari pengawa Timoti, iya nya ngelatih orang bukai. Nya alai Paul meransang Timoti: “Jaku ti udah didinga nuan ari aku . . . , serahka jaku nya ngagai orang ke tetap ati, ke ulih ngajar orang bukai.” (2 Tim. 2:2) Timoti ukai semina patut belajar ari bala menyadi Kristian lelaki, tang iya patut bekunsi penemu enggau sida. Tu meh utai ke patut digaga tuai gempuru ba eklisia kemayaharitu. Iya enda nyimpan penemu ke bekaul enggau pengawa ke digaga iya, tang sedia bekunsi penemu nya enggau bala menyadi lelaki ngambika sida ulih ngereja pengawa nya. Iya enda nangi sida landik agi ari iya. Nya alai, iya ukai ngajar pia-pia aja, tang nulung sida ngembuan penemu lalu nyadi orang Kristian ti tegap ba pengarap. Enggau chara nya, “orang ke tetap ati” ke diajar iya ulih mai penguntung ngagai bala menyadi ba eklisia.

Timoti tentu amat beterima kasihka surat ke diterima iya ari Paul. Kitai ulih ngambarka iya suah macha surat nya lalu berundingka chara iya ulih ngena jaku lalau nya lebuh iya ngereja pengawa iya.

Kitai mega deka nitihka jaku lalau nya. Baka ni chara iya? Kitai bebendar ngidupka pemeri baka ngidupka api, nyaga pesaka kitai, lalu bekunsi penemu enggau orang bukai. Enggau chara nya, baka Paul ke meransang Timoti, kitai ulih “ngereja semua pengawa [kitai].”—2 Tim. 4:5.