Bisi nuan macha Menara Jaga taun tu? Enti pia, saut meh tanya ba baruh tu:

Baka ni chara kitai begulai enggau sida ke dipilih?

Kitai beterima kasihka pengarap sida. Tang kitai enda ngenuluka sida lebih agi ari orang bukai. Kitai nyeliah ari “ngelangkungka orang.” (Jud. 16) Kitai enda nanya utai ke bekaul enggau pengadang sida.—w20.01, lamb. 29.

Nama ke ngasuh nuan andal Jehovah ibuhka nuan?

Bup Kudus madahka, Jehovah nemu pasal nuan indah sebedau nuan ada. Iya ninga sampi nuan. Iya nemu runding enggau asai ati nuan, lalu ulah nuan ulih ngasuh Jehovah gaga tauka enda. (1 Ban. 28:9; J-lam. 27:11) Jehovah udah mai nuan ngagai Iya.—w20.02, lamb. 12.

Nama chunto ti nunjukka ni maya patut bejaku sereta maya enda patut bejaku?

Kitai gaga ati bejaku pasal Jehovah. Kitai bejaku enti bisi meda menyadi ngereja penyalah. Tuai gempuru mega ulih meri jaku lalau ngagai menyadi Kristian. Kitai enda bejaku (tauka madahka) penerang pasal pengawa kitai ke ditagang. Kitai enggai madahka pekara ke patut dipelalaika.—w20.03, lamb. 20-21.

Baka ni raban buntak ba Joel bagi 2 bebida ari raban buntak ba Pemandang bagi 9?

Joel 2:20-29 madahka, Petara deka muai seraban buntak lalu besemaya deka nganti utai ti udah dirusak raban buntak nya. Pengudah nya Petara nuangka roh kudus Iya. Nya dikeamatka pengudah Babilon nyerang Israel. Raban buntak ba Pemandang 9:1-11 ngambarka nembiak ti dipilih ke serega ba jeman kitai. Sida nusui pesan pasal pengawa ngukum ari Petara ke deka ninggang sistem dunya ti jai lalu ngasuh semua orang ke nyukung sistem nya enda nyamai ati.—w20.04, lamb. 3-6.

Sapa ke nyadi raja utara kemayaharitu?

Rusia enggau menua ke nyukung iya. Sida merinsaka nembiak Petara, nagang pengawa nginjil, lalu begedika bala Saksi. Raja utara enggau raja selatan besemekih enggau pangan diri.—w20.05, lamb. 13.

Kati ‘buah roh kudus’ nya semina semilan iti kualiti ke dipadah ba Galatia 5: 22, 23?

Enda. Roh kudus nulung kitai ngemansangka kualiti ke bukai, baka pengelurus. (Eps. 5:8, 9)—w20.06, lamb. 17.

Nama ulih nyadi enti nuan nepu utai ba media sosial?

Utai ke ditepu nuan ba media sosial ulih ngasuh orang bukai ngumbai nuan temegahka diri, ukai baruh ati.—w20.07, lamb. 6-7.

Nama ulih dipelajar orang Kristian ari chara orang berikan?

Orang berikan gawa nitihka maya sereta alai ikan ulih ditemu. Sida nemu ngena perengka ti ngena, lalu berani gawa taja pan gaya hari nemu berubah. Kitai mega ulih neladan orang berikan ba pengawa nginjil.—w20.09, lamb. 5.

Nama sekeda chara kitai ulih nulung pemelajar ngembuan pengerindu ti dalam ke Petara?

Kitai ulih meransang sida macha Bup Kudus ninting hari lalu belematika utai ke dibacha sida. Kitai mega ulih ngajar sida besampi.—w20.11, lamb. 4.

Sapa ti disengkaum “semua mensia deka idup dibai Kristus”?—1 Kor. 15:22.

Utai ke disebut rasul Paul ukai dituju ngagai semua mensia ke deka diangkatka idup baru. Tang dituju ngagai orang Kristian ke dipilih ke serega, ti udah “dikuduska dalam Jesus Kristus.” (1 Kor. 1:2; 15:18)—w20.12, lamb. 5-6.

Nama pengawa ke deka digaga sida ke berubah “dalam sekejap mata, lebuh terumpit ti penudi disepu”?—1 Kor. 15:51-53.

Sida deka nitihka Jesus lalu merintah semua bansa ngena sebatang besi. (Pem. 2:26, 27)—w20.12, lamb. 12-13.