1, 2. (a) Nama kebuah beratika teladan Noah, Daniel, enggau Jop ulih ngagaka ati kitai? (b) Nama nyadi lebuh Esekiel nulis jaku ba Esekiel 14:14?

 KATI nuan benung napi penusah ketegal penyakit, penanggul ba duit, tauka kena perinsa? Kati nuan tusah deka mengkang gaga ati gawa ke Jehovah? Enti pia, teladan Noah, Daniel, enggau Jop tentu ulih ngagaka ati nuan. Sida enda sempurna, napi penanggul baka kitai, lalu kekadang nyauka lenyau nyawa. Tang sida mengkang taluk ngagai Jehovah, lalu ba Iya sida nyadi teladan ti manah ba pengarap sereta ulah ti ngasi.—Bacha Esekiel 14:12-14.

² Ayat tema artikel tu ditulis Esekiel di menua Babilon ba taun 612 sebedau Jesus ada. a (Peda nota kaki.) (Esk. 1:1;  8:1) Ayat nya ditulis lima taun sebedau Jerusalem dirusak ba taun 607. Semina mimit aja orang ke neladan ulah Noah, Daniel, enggau Jop, lalu sida iya selamat lebuh Jerusalem dirusak. (Esk. 9:1-5) Entara sida nya Jeremiah, Baruk, Ebetmelek, enggau peturun Rekap.

 3. Nama deka diperatika kitai ba artikel tu?

³ Pia mega kemayaharitu, semina orang ke lurus baka Noah, Daniel, enggau Jop, deka diselamatka Jehovah lebuh dunya ti jai tu dirusak. (Pem. 7:9, 14) Nya alai aram kitai beratika kebuah sida dikena Jehovah nyadika teladan. Kitai deka berandauka (1) penanggul ke ditapi sida seiku-seiku, sereta (2) chara kitai ulih arap sereta ngasi baka sida.

4, 5. Nama penanggul Noah, lalu nama utai ti ngalitka ati pasal iya?

⁴ Nama penanggul Noah? Maya jeman Enok, orang endang udah jai. Sida nyebut “jaku jai” pasal Jehovah. (Jud. 14, 15) Penyai majak nyadi. Maya jeman Noah, “penyai udah ngelekai ngagai semua endur.” Bala melikat ti jai datai ke dunya. Sida mali diri nyadi mensia ngambika ulih bebini, lalu bisi anak ti jai sereta mangah. (P-kal. 6:2-4, 11, 12) Tang Noah bebida. Bup Kudus madahka ‘Noah ngelantangka ati Jehovah.’ Iya ngereja utai ti ngena sereta ‘idup sejalai enggau Jehovah.’—P-kal. 6:8-10.

⁵ Nama ulih ditemu kitai pasal Noah ari jaku nya? Kesatu, iya udah lama nyembah Jehovah enggau tetap ati ba dunya ti jai sebedau Bah Besai datai. Iya ukai nyembah Jehovah sepengelama 70 tauka 80 taun aja, tang 600 taun! (P-kal. 7:11) Kedua, nadai bala menyadi Kristian ke nulung sereta meransang iya baka kitai kemayaharitu. Indah bala menyadi iya empu nadai nyukung iya. b—Peda nota kaki.

 6. Baka ni Noah ngayanka pemerani?

⁶ Ba Noah, nyadi orang ke manah aja enda chukup. Iya berani madahka diri arapka Jehovah ngagai orang. Bup Kudus ngumbai iya “ngajar pasal pengelurus.” (2 Pet. 2:5) Rasul Paul madahka, Noah ngena pengarap nunjukka dunya tu patut diukum. (Heb. 11:7) Orang tentu ngelese sereta nguji nagang iya. Sida mega engka ngemba deka ngemediska iya. Tang Noah enda takutka orang. (J-lam. 29:25) Iya arapka Jehovah, nya alai Jehovah meri iya pemerani. Lalu Jehovah mega meri pemerani ti sama ngagai semua nembiak Iya ti tetap ati kemayaharitu.

 7. Nama penanggul Noah lebuh iya ngaga bandung?

⁷ Noah udah tetap ati ngagai Jehovah lebih ari 500 taun lebuh Jehovah ngasuh iya ngaga sebuah bandung ti besai. Bandung nya deka dikena nyelamatka sekeda orang enggau jelu maya Bah Besai. (P-kal. 5:32; 6:14) Noah tentu ngasaika pengawa ngaga bandung nya utai ti berat. Lalu iya nemu orang deka balat agi ngelese sereta ngenusahka pengidup iya. Tang Noah arap sereta ngasika Jehovah. ‘Noah . . . nitihka asuh Petara.’—P-kal. 6:22.

 8. Baka ni Noah bepanggai ba Jehovah lebuh nyediaka utai ti diguna diri sebilik?

 ⁸ Noah bisi siti agi penanggul. Iya patut nyediaka utai ke diguna anak bini iya. Sebedau Bah Besai, orang bebendar betanam. Pia mega Noah. (P-kal. 5:28, 29) Tang iya enda ngelakka utai ti diguna anak bini kelalu ngirauka iya. Iya seruran ngenuluka sembah ngagai Jehovah ba pengidup. Taja pan Noah kisuk ngaga bandung sepengelama 40 tauka 50 taun, iya mengkang beberatka Jehovah. Lalu 350 taun pengudah Bah Besai, iya agi beberatka Jehovah. (P-kal. 9:28) Noah endang teladan ti manah ba pengarap sereta ulah ti ngasi!

9, 10. (a) Baka ni kitai ulih neladan pengarap sereta ulah Noah ti ngasi? (b) Enti nuan keran ngasika adat Petara, nama deka diulih nuan?

⁹ Baka ni kitai ulih neladan pengarap sereta ulah Noah ti ngasi? Iya nya lebuh kitai ngenuluka Jehovah, ngetanka runding Iya pasal utai ti ngena, sereta ukai enggi dunya Sitan. (Mat. 6:33; Jhn. 15:19) Ketegal nya dunya enda rinduka kitai. Ambika chunto, ketegal kitai keran ngasika adat Petara pasal besetubuh sereta jadi melaki-bini, orang engka nyebut utai ti enda manah pasal kitai ba media massa. (Bacha Malaki 3:17, 18.) Baka Noah, kitai enda takutka orang. Kitai nangika Jehovah, iya nya, kitai bebasa sereta enggai ngelebuka ati Iya. Kitai nemu semina Iya aja ke ulih meri pengidup ti meruan belama iya.—Luk. 12:4, 5.

¹⁰ Tanya diri empu: ‘Kati aku mengkang ngereja utai ti dikumbai Jehovah ngena, taja pan orang ngelese tauka bejai aku? Kati aku arapka Jehovah ulih nyedia utai ti diguna ruang bilik aku, taja pan tusah ngulihka belanja?’ Enti nuan bepanggai sereta ngasika Jehovah baka Noah, Iya deka nyaga nuan.—Plp. 4:6, 7.

11. Nama penanggul besai ke ditapi Daniel enggau tiga iku pangan iya di menua Babilon? (Peda gambar ba pun artikel.)

¹¹ Nama penanggul Daniel? Daniel dipejal diau di menua Babilon ke penuh enggau petara pelesu sereta pengawa bemanang. Orang di menua nya ngemaruhka orang Judah, sereta ngeleseka sida enggau Petara sida, Jehovah. (Mas. 137:1, 3) Tu tentu ngenusahka ati Daniel sereta orang Judah ke bukai ti rinduka Jehovah! Pia mega, mayuh orang beratika Daniel enggau tiga iku pangan iya, Hananiah, Misael, sereta Asariah ketegal sida deka dilatih gawa ke raja Babilon. Sida diberi pemakai raja, ke nyengkaum pemakai ti enda diasuh Jehovah empa nembiak Iya. Tang Daniel enggai “ngamahka diri makai pemakai raja.”—Dan. 1:5-8, 14-17.

12. (a) Daniel nya orang ke baka ni? (b) Nama runding Jehovah pasal Daniel?

¹² Daniel bisi siti agi penanggul ti baka ke enda nganu iya. Iya amat landik, nya kebuah raja meri iya pangkat ti tinggi. (Dan. 1:19, 20) Tang Daniel enda sumbung tauka ngumbai penemu diri seruran betul. Iya mengkang baruh ati sereta enggai ngemesaika diri. Daniel suah madahka Jehovah ke nulung iya mujur. (Dan. 2:30) Uji pikirka: Maya nya Daniel agi biak, tang Jehovah udah ngumbai iya teladan ti manah sama baka Noah seduai Jop. Jehovah arap bendar ngagai Daniel! Lalu nya endang patut laban Daniel mengkang tetap ati sereta  ngasika Jehovah sepemanjai pengidup iya. Lebuh umur Daniel nyauka manggai 100 taun, ku melikat Petara madah ngagai iya: ‘Daniel, Petara rinduka nuan.’—Dan. 10:11.

13. Nama kebuah Jehovah nulung Daniel ngulihka pangkat ti tinggi?

¹³ Ketegal sukung ari Jehovah, Daniel nyadi pegawai tinggi ba Perintah Babilon dulu, lalu udah nya ba Perintah Media-Persia. (Dan. 1:21; 6:1, 2) Jehovah nentuka Daniel bulih pangkat ti tinggi ngambika Daniel ulih nulung nembiak Iya, baka ke digaga Iya ba Josep di menua Ejip sereta ba Ester enggau Mordikai di menua Persia. c (Peda nota kaki.) (Dan. 2:48) Esekiel enggau orang Judah bukai ke nyadi orang tangkap tentu gaga ati lebuh beratika chara Jehovah ngena Daniel nulung sida!

14, 15. (a) Baka ni penanggul kitai sama enggau enggi Daniel? (b) Nama ulih dipelajarka apai indai ari apai indai Daniel?

¹⁴ Baka ni kitai ulih neladan pengarap sereta ulah Daniel ti ngasi? Kitai diatu idup ba dunya ti penuh enggau ulah ti kamah sereta sembah ti pelesu. Orang udah dilimpangka Babilon ti Besai iya nya gerempung pengarap pelesu ba serata dunya, ke dikumbai Bup Kudus “endur alai antu diau.” (Pem. 18:2) Ketegal kitai baka orang kampar ba dunya tu, kitai bebida ari orang bukai. Lalu tu ngasuh orang rindu ngeleseka kitai. (Mrk. 13:13) Sama baka Daniel, aram meh kitai majak rapat enggau Petara kitai, Jehovah. Enti kitai baruh ati, ngasi sereta bepanggai ba Jehovah, kitai mega dikerindu Iya.—Hag. 2:7.

¹⁵ Apai indai ulih belajar ari teladan apai indai Daniel. Lebuh Daniel agi mit, mayuh orang di menua Judah jai. Tang iya rinduka Jehovah. Kati utai tu nyadi ke diri empu? Enda. Apai indai Daniel tentu ngajar iya pasal Jehovah. (J-lam. 22:6) Indah reti nama Daniel “Hakim aku nya Petara,” nunjukka apai indai iya rinduka Jehovah. (Dan. 1:6) Nya alai kita ke apai indai, sabar meh lebuh ngajar anak kita pasal Jehovah. Anang lemi semengat. (Eps. 6:4) Besampi enggau sida. Besampi ke sida.  Enggau naka ulih meh ngajar anak kita rinduka utai ti dikumbai Jehovah ngena, lalu Jehovah deka merekat kita.—Mas. 37:5.

16, 17. Nama penanggul ke ditapi Jop?

¹⁶ Nama penanggul Jop? Jop napi ubah ti besai ba pengidup. Sebedau napi penguji, Jop nya orang ke tebilang di Timur. (Jop 1:3) Iya amat kaya, lalu mayuh orang ngelala sereta amat bebasaka iya. (Jop 29:7-16) Taja pia, Jop enda ngumbai diri manah agi ari orang bukai tauka ngasaika diri enda begunaka Petara. Kitai nemu tu laban Jehovah ngumbai Jop “nembiak Aku” lalu madahka: ‘Nadai orang di dunya ke badas sereta lurus baka iya [Jop], ke nangika Petara sereta nyeliahka penyai.’—Jop 1:8.

¹⁷ Tang enda memukai, pengidup Jop ngenyit berubah. Ketegal lenyau semua utai, iya balat tusah ati lalu ngajihka diri mati. Diatu kitai nemu, Sitan ke ngasuh Jop ditinggang penusah. Sitan ngumbai Jop nyembah Jehovah ketegal deka bulih utai. (Bacha Jop 1:9, 10.) Jehovah enda ngumbai jaku tuduh tu utai ti mit. Nama digaga Jehovah kena nunjukka Sitan nya bula? Jehovah meri Jop peluang nunjukka penaluk diri sereta nunjukka diri amat nyembah Jehovah ketegal pengerindu.

18. (a) Nama utai ti ngerinduka ati nuan pasal Jop? (b) Nama ulih dipelajarka kitai pasal Jehovah ari chara Iya nyaga Jop?

¹⁸ Sitan ke nadai penyinu enda ngetu-ngetu nyerang Jop, lalu deka Jop ngumbai utai nya datai ari Petara. (Jop 1:13-21) Tiga iku orang ke ngumbai diri pangan Jop nyebut utai ti jai ngagai Jop. Sida madahka Jop nya jai lalu Petara benung ngukum iya. (Jop 2:11; 22:1, 5-10) Tang Jop mengkang taluk ngagai Jehovah. Jop mega kekadang bisi nyebut utai ti enda patut. (Jop 6:1-3) Jehovah nemu Jop nyebut utai tu laban iya tusah ati sereta berasai ditekan. Jehovah mega nemu Jop enda kala ninggalka Iya, taja pan Sitan nyerang sereta bejai Jop. Pengudah utai ti enda manah nya nadai agi, Jehovah merekat Jop dua kali lipat mayuh agi utai ari ti dikemisi iya sebedau nya lalu idup 140 taun da agi. (Jas. 5:11) Sepemanjai timpuh nya, Jop meruan nyembah Petara. Baka ni kitai nemu? Laban ayat tema kitai, Esekiel 14:14, ditulis beratus taun pengudah Jop mati.

19, 20. (a) Baka ni kitai ulih neladan pengarap sereta ulah Jop ti ngasi? (b) Baka ni kitai ulih ngayanka penyiru baka Jehovah ngagai orang bukai?

¹⁹ Baka ni kitai ulih neladan pengarap sereta ulah Jop ti ngasi? Enda ngira nama penanggul ke ditapi, kitai patut ngenuluka Jehovah ba pengidup. Kitai deka bepanggai sereta ngasika Iya enggau pengabis ati. Kitai bisi mayuh agi kebuah deka ngereja nya enti dibandingka enggau Jop. Pikirka utai ti ditemu kitai seharitu. Kitai nemu mayuh utai pasal Sitan sereta chara ke dikena iya ngelimpangka orang. (2 Kor. 2:11) Kelebih agi ari bup Jop, kitai nemu kebuah Petara ngemendarka pemerinsa nyadi. Ari bup Daniel, kitai nemu Perintah Petara ti di baruh iring Jesus Kristus nya perintah ti nyata. (Dan. 7:13, 14) Lalu kitai mega nemu, enda lama agi Perintah Petara deka merintah serata dunya lalu muai semua pemerinsa.

 ²⁰ Peneleba Jop mega nunjukka kitai patut ngayanka penyiru lebuh bala menyadi Kristian merinsa. Baka Jop, sida engka bisi nyebut utai ti enda patut. (P-jar. 7:7) Tang kitai enda patut bisi runding ti enda manah pasal sida tauka nuduh sida bisi ngereja utai ti salah. Kitai patut sinuka sida. Enggau chara tu, kitai neladan Apai kitai, Jehovah, ke ngembuan pengerindu sereta pengasih.—Mas. 103:8.

21. Baka ni jaku ba 1 Peter 5:10 ngingatka kitai pasal peneleba Noah, Daniel, enggau Jop?

²¹ Noah, Daniel, enggau Jop idup ba jeman ti bebida sereta napi penanggul ti enda sama. Taja pia, semua sida tan natka penanggul. Peneleba sida ngingatka kitai pasal jaku Peter: ‘Lalu lebuh kita udah natka pemerinsa nya enda lama, Petara ti pun semua pengasih, . . . deka ngaga kita nyadi baru [tauka “deka nembuka latih kita,” NW], ngering sereta negapka kita.’—1 Pet. 5:10.

22. Nama deka dipelajarka kitai pengudah artikel tu?

²² Jaku ba 1 Peter 5:10 mega nyadi ba nembiak Petara kemayaharitu. Jehovah madahka Diri deka negap sereta ngeringka nembiak Iya. Semua kitai deka Jehovah ngeringka kitai, lalu kitai deka meruan tegap sereta tetap ati ngagai Iya. Nya kebuah kitai patut arap sereta ngasi baka Noah, Daniel, enggau Jop. Ba artikel pengudah tu, kitai nemu sida ulih mengkang tetap ati ngagai Jehovah laban sida ngelala Iya enggau manah. Sida ulih “nemu reti semua utai” ti diasuh Iya. (J-lam. 28:5, NW) Lalu pia mega enggau kitai.