Suba kitai ngumbai baka nya ketegal utai ti dipadah ba ayat Hebrew 12:16, NW. Ayat nya madahka, Esau “enda beterima kasih ke utai ti kudus” lalu meri ngagai Jakop “hak iya ti nyadi anak tuai” ketegal pemakai ti mimit. Nya alai lebuh Jakop bulih hak nyadi anak tuai, kitai ngumbai iya ulih nyadi peturun Messiah.—Matthew 1:2, 16; Luke 3:23, 34.

Tang pengudah mansik cherita bukai dalam Bup Kudus, kitai nemu, orang ke nyadi peturun Messiah nya ukai semina orang ke nyadi anak tuai aja. Aram kitai beratika sekeda chunto:

Reuben nya anak tuai Jakop enggau Leah, lalu Josep nya anak tuai Jakop enggau Rachel. Pengudah Reuben ngereja ulah ti kamah, iya lenyau hak nyadi anak tuai. Hak nya diberi ngagai Josep. (Pemungkal 29:31-35; 30:22-25; 35:22-26; 49:22-26; 1 Bansa Israel 5:1, 2) Taja pia, Messiah ukai datai nengah Reuben tauka Josep. Iya datai nengah Judah, anak Jakop enggau Leah ti keempat.—Pemungkal 49:10.

Ayat ba Luke 3:32 bisi nyebut pasal lima iku agi peturun ti nuju ngagai Messiah, lalu semua sida nya anak tuai. Ambika chunto, Boas nya apai Obet, lalu Obet nya apai Jesi.—Rut 4:17, 20-22; 1 Bansa Israel 2:10-12.

David ukai anak tuai Jesi. Iya anak ti biak sekali ari sida lapan iku menyadi. Taja pia, Messiah datai nengah David. (1 Samuel 16:10, 11; 17:12; Matthew 1:5, 6) Peturun ti nuju ngagai Messiah pengudah David nya Solomon, taja pan Solomon ukai anak tuai David.—2 Samuel 3:2-5.

 Tu ukai reti nyadi anak tuai nya enda patut dikemeratka. Iya deka bulih ungkup ti enda diberi ngagai anak ke bukai. Iya deka nyadi tuai bilik, lalu bulih dua kali lipat reta pesaka.—Pemungkal 43:33; Ulang Adat 21:17; Josua 17:1.

Tang hak nyadi anak tuai ulih diberi ngagai anak ke bukai. Pengudah Abraham muru Ismail, hak nyadi anak tuai diberi ngagai Isak. (Pemungkal 21:14-21; 22:2) Lalu baka ke udah disebut ba atas, hak Reuben nyadi anak tuai diberi ngagai Josep.

Tang nama utai ti deka dipadah rasul Paul ba ayat Hebrew 12:16, NW? Ayat nya madah: “Bejimat meh ngambika nadai seiku kita ngereja ulah seks ti kamah tauka enda beterima kasih ke utai ti kudus baka Esau. Iya ngelepaska hak iya ti nyadi anak tuai ketegal pemakai ti mimit.”

Ba ayat nya, rasul Paul ukai ngenang pasal peturun ti nuju ngagai Messiah. Iya meri jaku tangkan ngagai orang Kristian. Iya ngasuh sida: “Gaga jalai kita rurus” ngambika ‘nadai siku kita enda bulih pengasih Petara.’ Reti nya sida nadai bulih pengasih Petara enti sida ngereja ulah seks ti kamah. (Hebrew 12:12-16) Sida deka baka Esau ke rindu ngemuaska pengingin diri sereta “enda beterima kasih ke utai ti kudus.”

Nitihka adat maya nya, Esau kekadang bisi peluang ngenjuk pemeri ngagai Jehovah. (Pemungkal 8:20, 21; 12:7, 8; Jop 1:4, 5) Tang Esau kelalu ngenuluka pengingin diri, nya alai iya sanggup nyerahka peluang nyadi anak tuai ketegal semangkuk bubur kachang. Jehovah bisi madahka, bala peturun Abraham deka napi pemerinsa. Esau engka deka nyeliah ari napi utai nya. (Pemungkal 15:13) Iya mega ngayanka diri enda beterima kasih ke utai ti kudus lebuh iya jadi enggau dua iku indu kapir, lalu utai tu balat ngenusahka ati apai indai iya. (Pemungkal 26:34, 35) Tang Jakop enda baka Esau. Jakop jadi enggau indu ke nyembah Jehovah!—Pemungkal 28:6, 7; 29:10-12, 18.

Nama ulih dipelajarka kitai ari Bup Kudus pasal peturun ti nuju ngagai Messiah? Sekeda ari sida nya anak tuai, lalu sekeda nya ukai. Orang Judah nemu pasal utai tu, lalu sida enda nyakal. Baka ni kitai nemu? Laban sida ngaku Jesus nya ari peturun David, anak Jesi ke biak sekali.—Matthew 22:42.