Apai aku ke benama John Mills, dibaptisa dalam taun 1913 ba New York City, lebuh iya beumur 25 taun. Menyadi Russell meri cheramah baptisa. Enda lama udah nya, apai ngagai pulau Trinidad. Dia, iya jadi enggau Constance Farmer, seiku Nembiak Bup Kudus ke ransing. Apai nulung bakih iya, William R. Brown, mandangka “Photo-Drama of Creation.” Seduai iya sama bekereja nyentuk ngagai Menyadi Brown enggau bini iya dianjung ngagai Afrika Barat ba taun 1923. Apai enggau indai, ke sama bisi peluang ngagai serega, terus gawa ke Jehovah ba Trinidad.

Semua kami menyadi bisi semilan iku. Menyadi kami ke tuai ngangkatka nama Menyadi Rutherford, ke nyadi presiden Watch Tower Bible and Tract Society. Lebuh aku ada kena 30 Disember 1922, aku ngangkatka nama Menyadi Woodworth, ke nyadi editor The Golden Age (diatu dikumbai Awake!). Apai indai nganjung kami menyadi ngagai sekula primari aja. Tang kelebih agi, seduai iya meransang kami netapka juluk ati gawa ke Jehovah. Indai aku landik nerangka pesan Bup Kudus. Apai rindu nusui cherita Bup Kudus, lalu ngelakunka nya ngambika kami ulih meretika cherita nya.

Utai ke digaga seduai iya meri asil ti manah. Ari lima iku kami menyadi ke lelaki, tiga iku ari kami tama Sekula Gilead. Tiga iku menyadi kami ke indu betaun-taun nyadi pengerintis ba Trinidad enggau Tobago. Ketegal latih sereta teladan manah ari apai indai, kami ‘baka kayu ti ditanam dalam rumah Jehovah.’ Jaku peransang seduai iya nulung kami mengkang ngereja pengawa ke Jehovah sereta galak ‘dalam Rumah Sembiang Petara kami.’—Mas. 92:13.

Pengawa nginjil diatur ba rumah kami. Bala pengerintis begempuru dia lalu suah berandau pasal Menyadi George Young, seiku pengerintis seberai tasik ari menua Kanada ke kala datai  ngagai Trinidad. Apai enggau indai gagit ati bejaku pasal Menyadi Brown enggau bini iya ke kala enggau seduai iya nginjil suba. Semua tu meransang aku berengkah nginjil lebuh aku beumur sepuluh taun.

Maya nya, majalah kitai enggau nyemetak madah pasal ajar pengarap ti pelesu, pengawa dagang ti amu, sereta perintah ti enda lurus. Nya alai ba taun 1936, bala paderi ngansak perintah Trinidad nagang semua litaricha Menara Jaga. Kami ngelalaika litaricha tang terus nyadung nya sampai abis. Kami nginjil ngena poster sereta surat mit lebuh bejalai sereta bebasikal bebala mayuh. Kami mega ngena kerita bunyi ari endur ke dikumbai Tunapuna. Kami nginjil indah ngagai endur ti jauh ba Trinidad. Nya ngerinduka ati kami! Pengawa nginjil ke baka tu meransang aku dibaptisa lebuh umur aku 16 taun.

Latih ke diberi apai indai enggau semua utai nya meransang aku deka nyadi pengerintis seberai tasik. Aku agi bisi pengeran ke baka nya lebuh aku mupuk ngagai pulau Aruba ba taun 1944, lalu gawa enggau Menyadi Edmund W. Cummings. Kami duai gagit ati laban ulih mai sepuluh iku orang datai ngintu pengawa Ngingatka Pemati Jesus ba taun 1945. Ba taun siti, eklisia ti keterubah berengkah ba pulau nya.

Enda lama udah nya, aku nginjil enda formal ngagai Oris Williams, ke sama gawa enggau aku. Iya bebendar ngetanka ajar ari jalai pengarap ke dititihka iya. Tang lebuh belajarka Bup Kudus, iya nemu pasal pemendar lalu dibaptisa kena 5 Januari 1947. Nyau kelama, kami lalu labuh pengerindu, udah nya jadi enggau pangan diri. Iya berengkah nyadi pengerintis ba bulan November 1950. Pengidup aku berubah pengudah kami duai jadi.

Ba taun 1955, kami duai dikangau ngagai Sekula Gilead. Kena nyediaka diri, kami badu kereja, nyual rumah sereta barang kami, lalu mupuk ninggalka Aruba. Kena 29 Julai 1956, kami tembu belajar ba kelas ke-27 Sekula Gilead lalu dianjung ngagai Nigeria.

Lebuh ngenang baru, Oris madahka: “Roh kudus Jehovah ulih nulung mutarka penanggul lebuh bejalaika pengawa nyadi pengerintis seberai tasik. Aku nadai kala berunding deka nyadi pengerintis seberai tasik. Aku rindu agi diau ba rumah lalu ngemesaika bala anak. Aku ngubah runding lebuh nemu pengawa nginjil patut dikemeratka. Pengudah tembu belajar ba Gilead, aku udah sedia nyadi pengerintis seberai tasik. Lebuh kami nepan kapal Queen Mary, Menyadi Worth Thornton, ke gawa enggau Menyadi Knorr, datai nyebut ‘Selamat jalai!’ Iya mega madahka kami deka gawa ba Betel. Aku bisi berasai mimit asa ati lebuh ninga berita nya. Tang aku jampat nelebaka diri lalu nyau kelama aku rindu gawa ba Betel. Dia, aku diberi bemacham pengawa. Pengawa ke pemadu dikerinduka aku iya nya nyadi penyambut temuai. Aku rinduka orang, lalu pengawa tu ngasuh aku betemu enggau bala menyadi ba Nigeria. Mayuh ari sida ke datai nya nyau kamah laban debu, lelak, aus, sereta lapar. Aku rindu ngintu sereta meri jaku peransang ngagai sida. Semua tu pengawa ke Jehovah lalu tu ngasuh aku gaga sereta puas ati.” Amat, tiap iti pengawa nulung kami bisi kaul ti manah enggau Jehovah.

Lebuh betemu baru enggau Menyadi Brown ba Trinidad dalam taun 1961, iya madahka utai ti ngerinduka ati ke nyadi ba Afrika. Aku madahka pemansang ke diulih kami ba Nigeria. Menyadi Brown mayuk aku lalu madah ngagai apai: “Johnny, nuan enda ulih ngagai Afrika baka Woodworth!” Ku apai nyaut: “Manah nya, Worth! Teruska pengawa nuan nya!” Jaku peransang ari orang ke udah lama dalam pemendar nambahka pengeran aku ke deka bebendar agi ngereja pengawa nginjil.

Ba taun 1962, aku bisi peluang nerima latih ba kelas ke-37 Sekula Gilead, sepengelama sepuluh bulan. Menyadi Wilfred Gooch, ke nyadi tuai ti ngemata pampang opis ba Nigeria, enggau kelas ke-38 lalu dianjung ke England. Udah nya aku nyadi tuai ti ngemata pampang opis ba Nigeria.  Aku nitihka teladan Menyadi Brown. Aku suah mindah jauh, lalu bekelala enggau bala menyadi ba Nigeria. Taja pan sida nadai mayuh utai ti dikemisi baka orang ke diau ba menua ke mansang agi, asai ati sida ti puas sereta gaga nunjukka pengidup ti bisi reti ukai bepanggai ba duit tauka reta tengkira. Taja pia sida tetap beresi, kemas, sereta manah dipeda lebuh datai begempuru. Lebuh sida ngagai konvensyen, mayuh ari sida datai nepan lori enggau bolekajas a (bas ke nadai dinding). Kesuah iya, bas nya bisi jaku sempama. Ambika chunto: “Gumpul seleka dua, ila penuh seraga.”

Jaku sempama nya amat! Kami duai Oris nulung bala menyadi ba Nigeria. Nya alai ba taun 1974, Nigeria nyadi menua ti keterubah ba luar Amerika Serikat ke bisi 100,000 iku penginjil. Nya asil ti chukup manah!

Lebuh pemansang tu nyadi, perang entara raban bansa benung nyadi ba Nigeria ari taun 1967 nyentuk ngagai 1970. Bebulan bala menyadi ba Biafran enda ulih betemu enggau bala menyadi ba pampang opis ke ba seberai Sungai Niger. Nya alai, kami mai litaricha sereta meri iring ngagai sida. Baka ke disebut ba pun cherita tadi, sampi enggau pengarap ngagai Jehovah, ngasuh kami suah meraka sungai nya enggau berani.

Aku agi ingatka penanggul ke ditapi lebuh meraka Sungai Niger. Kami berambunka nyawa nyeliahka bala soldadu, penyakit, sereta penusah ke bukai. Napi bala soldadu ari perintah udah chukup pedis, tang pedis agi napi bala soldadu ke ngelaban perintah. Bisi sekali maya malam hari, aku meraka Sungai Niger ti deras ngena perau ari Asaba ngagai Onitsha. Lalu udah nya meransang bala menyadi lelaki ke nyaga eklisia ba Enugu. Aku mupuk ngagai Aba, ngeringka bala tuai gempuru. Orang ke diau dia enda dikemendarka masang api maya lemai hari ngambika munsuh enda ulih meda sida. Ba Port Harcourt, kami jampat-jampat ngujungka gempuru ngena sampi lebuh bala soldadu ari perintah datai nyerang Biafran ke enda jauh ari alai kami begempuru.

Gempuru ke baka nya beguna bendar kena ngingatka bala menyadi pasal pengibuh Jehovah, sereta meri jaku lalau bekaul enggau neutral sereta penyerakup. Bala menyadi ba Nigeria mujur napi penusah maya perang nya. Sida mandangka pengerindu ti dalam ngagai pangan diri taja pan maya nya orang balat begedika raban bansa bukai. Sida ngetanka penyerakup. Endang ngagaka ati ulih meda sida mengkang beserakup ba maya ti tusah nya!

Ba taun 1969, Menyadi Milton G. Henschel nyadi chairman ba Gempuru Besai Entarabansa “Peace on Earth” ba Stadium Yankee, New York. Mayuh utai ti dipelajarka aku lebuh nyadi penulung iya. Tu endang maya ti ngena laban ba taun 1970 kami ngatur Gempuru Besai Entarabansa “Men of Goodwill” ba Lagos, Nigeria. Gempuru nya diatur enda lama pengudah perang badu. Pengawa nya ulih mujur ketegal berekat ari Jehovah. Maya nya bisi 17 iti bansa jaku dikena, lalu 121,128 iku orang datai. Menyadi Knorr enggau Henschel sereta bala menyadi bukai ke nepan bilun ari Amerika Serikat enggau England bisi peluang ti manah. Sida meda 3,775 iku orang dibaptisa ba gempuru besai nya. Nya meh penyampau ti pemadu besai pengudah Pentikos kelia! Sepemanjai idup aku, tu meh maya aku balat kisuk. Penyampau penginjil jampat amat nambah!

Dalam kandang lebih ari 30 taun aku ba Nigeria, bisi maya nya aku diasuh nyadi tuai ti ngabas sereta tuai ti ngemataka zon ba Afrika Barat. Aku rindu bejalaika pengawa nya. Bala pengerintis seberai tasik balat beterima kasih lebuh bulih jaku peransang sereta berasai dikeibuhka! Endang ngagaka ati ulih meransang sida, nulung sida nemu pengawa sida seruran dikenang! Ari pengawa tu aku belajar, ngayanka pengibuh ngagai bala menyadi nya chara dikena nulung sida nyembah Jehovah, sereta nulung gerempung Jehovah mengkang tegap sereta beserakup.

Semina bantu ari Jehovah ke ulih nulung aku  enggau Oris napi penanggul ke datai ari penyakit sereta perang entara raban bansa. Jehovah seruran merekatka kami duai. Oris madahka:

“Kami duai udah suah kena penyakit malaria. Bisi sekali, Worth luput lalu dibai ngagai sepital ba Lagos. Sida ba sepital madahka iya enda ulih idup. Tang aku balat beterima kasih ngagai Jehovah laban iya idup! Lebuh iya udah ngeleda, iya berandau pasal Perintah Petara enggau seiku misi lelaki ke benama Nwambiwe ke nyaga iya. Udah nya, kami duai Worth ngelawa iya, laban deka meransang iya rinduka Bup Kudus. Iya nerima pemendar lalu udah nya nyadi tuai gempuru ba Aba. Aku mega udah nulung mayuh orang nerima pemendar, nyengkaum orang ke balat arapka pengarap Islam, nyadi nembiak Jehovah ti taluk. Kami duai gaga ati ulih ngelala orang Nigeria, nemu adat, gaya pengidup, enggau bansa jaku sida.”

Bisi siti agi utai ti dipelajar: Ngambika ulih mujur gawa ke Jehovah ba menua bukai, kitai patut rinduka bala menyadi taja pan adat kitai enda sebaka enggau pangan diri.

Pengudah gawa ba Betel Nigeria, dalam taun 1987 kami duai nerima siti pengawa ti baru. Kami dianjung nyadi pengerintis seberai tasik ba pulau St. Lucia, Caribbean. Nya pengawa ti ngerinduka ati, tang bisi penanggul iya empu. Ba Afrika, orang ke lelaki tau ngembuan mayuh bini. Tang ba St. Lucia, indu enggau lelaki diau begulai taja pan bedau sah jadi melaki-bini. Jaku Petara meransang mayuh ari pemelajar Bup Kudus kami ngaga ubah.

Ketegal majak tuai, Raban ti Ngiring nganjung kami duai ngagai indu opis ba Brooklyn, New York, Amerika Serikat, dalam taun 2005. Ninting hari aku agi beterima kasih ngagai Jehovah laban udah meri aku bini ti badas baka Oris. Iya udah nadai ba taun 2015, lalu aku agi berasai puang ketegal nadai iya. Iya kaling pengidup ti mentas sereta ngembuan pengerindu. Aku sayau amat ke iya sepemanjai 68 taun kami begulai. Chara kami bulih pengelantang ba tikah enggau ba eklisia iya nya, bebasaka tuai bilik, ngampun pangan diri, meruan baruh ati, sereta ngayanka buah roh kudus.

Lebuh ati kami berasai asa tauka lemi, kami bepanggai ba Jehovah ngambika Iya merekatka semua utai ti udah dilengkaka kami. Seraya kami terus ngaga ubah, kami meda pemansang ba gerempung Jehovah sereta utai manah ke deka nyadi jemah ila!—Isa. 60:17; 2 Kor. 13:11.

Ba Trinidad enggau Tobago, Jehovah merekatka pengawa ti digaga apai indai aku sereta bala menyadi Kristian ke bukai. Nya alai nitihka riput ti pemadu baru, bisi 9,892 iku orang udah nyadi Saksi-Saksi Jehovah. Ba Aruba, mayuh bala menyadi nulung negapka eklisia ti udah alai aku suba. Diatu pulau nya bisi 14 buah eklisia. Ba Nigeria, penyampau penginjil udah nambah ngagai 381,398 iku orang. Lalu ba pulau St. Lucia, bisi 783 iku penginjil.

Diatu umur aku 90 lebih. Masmur 92:14 madahka, orang ke baka kayu ti ditanam dalam rumah Jehovah “agi bebuah lebuh sida nyau tuai lalu seruran gadung sereta kering.” Aku amat beterima kasih ke pengidup ti udah diberi Jehovah ngagai aku. Aku bebendar gawa ke Jehovah ngena pengidup aku nya. Latih ke diulih aku meransang aku gawa ke Jehovah enggau pengabis ati. Ketegal pengerindu Jehovah, Iya nulung aku ‘galak dalam Rumah Sembiang Petara [aku].’—Mas. 92:13.