1-2. (a) Nama dipadah Bup Kudus pasal Moses? Nama digaga Moses? (b) Nama kebuah kitai deka ngemansangka ati ti baruh?

 KU BUP KUDUS madah pasal Moses: “Nadai orang ke baruh agi ati ari iya di dunya tu.” (P-pau. 12:3) Kati Moses nya orang ke lemi, enda nemu ngaga pemutus, sereta takut lebuh dilaban orang? Tu meh utai ti dipadah sekeda orang pasal orang ke baruh ati. Tang penemu tu enda betul. Moses nya orang ti kering, nemu ngaga pemutus, sereta berani. Enggau saup ari Jehovah, iya berani mansang ngagai raja Ejip ti kering, nguluka kira-kira tiga juta iku orang nengah menua puang, sereta nulung bansa Israel ngalahka munsuh sida.

² Kitai enda napi penanggul ti sama baka Moses. Tang, ninting hari kitai begulai enggau orang tauka napi utai ke ngasuh kitai tusah deka baruh ati. Taja pia, kitai bisi kebuah deka ngemansangka kualiti tu. Jehovah besemaya “orang ke baruh ati deka bempu menua tu.” (Mas. 37:11) Kati nuan orang ke baruh ati? Kati orang bukai ngumbai nuan baruh ati? Sebedau nyaut dua iti tanya tu, kitai patut nemu reti baruh ati.

3-4. (a) Kualiti baruh ati nya baka nama? (b) Nama tiga iti kualiti ke diguna enti kitai deka baruh ati? Nama kebuah begunaka kualiti nya?

³ Kualiti baruh ati b nya baka siti gambar ti manah. Nama kebuah kitai ngumbai baka nya? Pelukis nyampur beberapa iti chura ti manah kena ngasilka gambar. Pia mega enggau kitai. Kitai begunaka beberapa iti kualiti ngambika baruh ati.  Kualiti nya baka nunduk, nelap, sereta berani. Nama kebuah kitai begunaka kualiti nya enti deka ngagaka ati Jehovah?

⁴ Orang ke baruh ati deka nunduk ngagai peneka Petara. Siti ari peneka Petara nya, Iya deka kitai nelap. (Mat. 5:5; Gal. 5:23) Lebuh kitai ngereja peneka Petara, Sitan pedis ati. Taja pan kitai baruh ati sereta nelap, mayuh orang ke enggi dunya Sitan begedika kitai. (Jhn. 15:18, 19) Nya alai, kitai patut berani ngelaban Sitan.

5-6. (a) Nama kebuah Sitan begedika orang ke baruh ati? (b) Nama tanya ke deka disaut kitai?

⁵ Orang ke baruh ati nya orang ke dikerinduka Jehovah. Ulah sida belaban enggau ulah Sitan ti sumbung. Jehovah begedika ulah ti sumbung. Nya alai, ulah orang ke baruh ati jauh amat bebida ari Sitan. Sida ngembuan kualiti ke tinggi agi ari enggi Sitan. Nya kebuah Sitan begedika sida. Tang kelebih agi, sida nunjukka Sitan nya bula. Nama kebuah? Laban enda ngira nama utai ke disebut tauka digaga Sitan, iya enda ulih nagang orang ke baruh ati nyembah Jehovah!—Jop 2:3-5.

⁶ Ni maya kitai tusah deka baruh ati? Nama kebuah kitai patut terus baruh ati? Kena nyaut tanya tu, kitai deka beratika chunto Moses, tiga iku orang Hebrew ke nyadi orang tangkap di menua Babilon, sereta Jesus.

7-8. Nama digaga Moses lebuh orang enda bebasaka iya?

⁷ Lebuh diberi kuasa: Orang ke ngembuan kuasa tusah deka mengkang baruh ati, kelebih agi lebuh orang ke dijaga sida enda bebasaka sida tauka ngumbai sida enda ngaga pemutus enggau manah. Kala tu nyadi ba nuan? Baka ni enti orang ke sebilik enggau nuan ngaga nuan baka nya? Nama deka digaga nuan? Peratika chara Moses mutarka penanggul nya.

⁸ Jehovah milih Moses nyadi tuai ke bansa Israel. Iya mega ngasuh Moses nulis adat ke sida. Tu nunjukka Jehovah nyukung Moses.  Taja pia, menyadi iya, Miriam seduai Aron, ngutuk iya lalu madahka iya enda patut jadi enggau bini iya. Enti sema orang bukai bisi penuduk baka Moses, sida tentu ringat sereta deka malas penyai. Tang Moses enda baka nya. Iya enda jampat ringat. Iya indah minta Jehovah ngeraika Miriam ke dibalut penyakit kulit. (P-pau. 12:1-13) Nama kebuah Moses ngereja semua nya?

9-10. (a) Baka ni Jehovah nulung Moses? (b) Nama ulih dipelajarka tuai bilik enggau tuai gempuru ari Moses?

⁹ Moses ngawakka diri dilatih Jehovah. Kira-kira 40 taun sebedau nya, iya ukai orang ke baruh ati lebuh agi sebilik enggau raja menua Ejip. Iya jampat ringat. Ketegal tu iya munuh seiku lelaki ke dikumbai iya ngereja utai ti enda patut. Moses ngumbai Jehovah nyukung utai ti digaga iya. Sepengelama 40 taun, Jehovah nulung Moses nemu iya ukai semina begunaka pemerani enti deka ngiring orang Israel. Tang iya mega begunaka ati ti baruh. Ngambika ulih baruh ati, Moses patut nelap sereta nunduk. Iya ngasika ajar nya lalu nyadi tuai ti badas.—P-sut. 2:11, 12; SKR. 7:21-30, 36.

¹⁰ Kemayaharitu, tuai bilik enggau tuai gempuru patut neladan Moses. Lebuh orang enda bebasaka kita, anang jampat ringat. Enggau baruh ati ngaku penyalah diri. (P-jar. 7:9, 20) Enggau naka ulih nitihka iring ari Jehovah bekaul enggau chara mutarka penanggul, lalu seruran nelap lebuh nyaut. (J-lam. 15:1) Tuai bilik enggau tuai gempuru ke baka nya ngagaka ati Jehovah, ngemansangka pemaik, lalu ulih nyadi teladan ti manah.

11-13. Nama teladan ti ditetapka tiga iku nembiak Hebrew nya?

¹¹ Lebuh diperinsa: Sepemanjai sejarah, pemerintah mensia udah merinsaka nembiak Jehovah. Sida nuduh kitai ngereja bemacham “penyalah.” Tang kitai deka ‘ngasika Petara, ukai ngasika mensia.’ (SKR. 5:29) Kitai engka dikelese, dijil, tauka dipalu. Tang ketegal bantu ari Jehovah, kitai enda ngelaban lalu mengkang nelap.

¹² Peratika utai ke nyadi ba Hananiah, Misael, enggau Asariah, tiga iku nembiak Hebrew ke dibuai ngagai menua Babilon. Sida netapka teladan ti manah ke kitai. c Lebuh raja Babilon ngasuh sida meremi nyembah engkeramba emas, sida enggau nelap nerangka  kebuah sida enggai ngereja nya. Sida mengkang nunduk ngagai Jehovah, taja pan raja Babilon ngasuh sida ditunu dalam serumbung api. Tekala nya, Jehovah nyelamatka sida taja pan sida enda ngarapka Iya ngereja nya. Sida sanggup nerima sebarang utai ke deka nyadi ngagai sida. (Dan. 3:1, 8-28) Sida nunjukka orang ke baruh ati nya berani. Nadai mensia tauka utai tauka atur, ulih nagang kitai ari nyembah Jehovah seiku aja.—P-sut. 20:4, 5.

¹³ Baka ni kitai ulih neladan tiga iku nembiak Hebrew nya lebuh penaluk kitai diuji? Kitai enggau ati ti baruh arapka Jehovah deka nyaga kitai. (Mas. 118:6, 7) Kitai nyaut orang ke nuduh kitai ngereja penyalah enggau chara ti bebasa sereta nelap. (1 Pet. 3:15) Lalu kitai bebendar enggai ngerusak kaul kitai enggau Jehovah.

14-15. (a) Nama utai ke ulih nyadi lebuh kitai balat tusah ati? (b) Nitihka Isaiah 53:7, 10, nama kebuah Jesus ulih dikumbai teladan ti pemadu manah bekaul enggau mandangka pemaruh ati taja pan ati iya balat tusah?

¹⁴ Lebuh ati balat tusah: Bisi mayuh pekara ke ngasuh ati kitai balat tusah. Kitai engka ngasaika nya sebedau ngambi peresa ba sekula tauka sebedau ngereja siti-siti pengawa. Ati kitai mega balat tusah lebuh berundingka chara berubat ke patut dikena. Endang enda senang deka baruh ati lebuh ati kitai balat tusah. Pekara ke enda kala nanggul kitai, nyau nyadi penanggul ba kitai. Jaku ke disebut kitai engka kasar, lalu munyi nyawa kitai bejaku engka tinggi. Enti kitai kala berasai baka nya, peratika teladan Jesus.

¹⁵ Beberapa bulan sebedau Jesus mati, ati iya balat tusah. Iya nemu diri deka balat merinsa lalu dibunuh enggau chara ti amat ngemaluka. (Jhn. 3:14, 15; Gal. 3:13) Indah iya empu bisi nyebut pasal tu. (Luk. 12:50) Beberapa hari sebedau mati, ku Jesus madahka: ‘Ati aku balat tusah.’ Ari jaku ke disebut iya lebuh iya besampi, iya nunjukka diri baruh ati sereta ngasika Petara. Ku iya besampi: ‘Apai, lepaska aku ari maya tu . . . laban nya meh kebuah aku udah datai ngagai maya tu. Apai, muliaka nama Nuan!’ (Jhn. 12:27, 28) Lebuh munsuh Petara datai, Jesus enggau berani nyerahka diri empu ngagai sida. Sida munuh iya enggau chara ti amat ngemaluka sereta chukup pedis. Taja pan Jesus balat tusah ati sereta merinsa, iya enggau baruh ati ngereja peneka Petara. Nya alai, Jesus ulih dikumbai teladan ti pemadu manah bekaul enggau mandangka pemaruh ati taja pan ati iya balat tusah!—Bacha Isaiah 53:7, 10.

16-17. (a) Nama utai ke digaga bala rasul ke ngasuh Jesus tusah deka baruh ati? (b) Baka ni kitai ulih neladan Jesus?

¹⁶ Ba malam kepenudi sebedau Jesus mati, bala rasul iya ngereja utai ke ngasuh iya tusah deka baruh ati. Uji gambarka penusah ati ke diasaika Jesus malam nya. Ulih iya mengkang tetap ati nyentuk ke iya mati? Enti iya enda tetap ati, nadai seiku pan orang tau bulih peluang idup belama iya. (Rom. 5:18, 19) Lalu keberat agi, ulah ti enda tetap ati ulih ngenyaika nama Apai iya. (Jop 2:4) Lebuh kepenudi iya Jesus makai enggau bala rasul, bala rasul “bekelikuhka sapa ari bala sida ke tau dikumbai pemadu besai.” Jesus udah suah ngerara sida pasal nya. Pia mega sebedau makai lemai nya! Tang Jesus enda pedis ati. Iya enggau nelap ngerara sida. Jesus ngingatka sida baru pasal ulah ke patut dikembuan sida. Lalu iya mega muji sida ketegal taluk nyukung iya.—Luk. 22:24-28; Jhn. 13:1-5, 12-15.

¹⁷ Nama deka digaga nuan enti sema nuan  napi utai ti sama? Kitai ulih neladan Jesus sereta mengkang nelap taja pan ati balat tusah. Enggau naka ulih ngasika pesan Jehovah ke ngasuh kitai “sabar enggau pangan diri.” (Kol. 3:13) Kitai deka ngasika pesan nya enti semua kitai nemu utai ti disebut sereta digaga kitai ulih ngemediska ati orang. (J-lam. 12:18; Jas. 3:2, 5) Lalu seruran muji pemanah ke dikembuan orang bukai.—Eps. 4:29.

18. Baka ni chara Jehovah nulung orang ke baruh ati? Tang nama patut digaga sida?

¹⁸ Kitai deka ngaga pemutus ti manah. Lebuh kitai tusah deka nemu utai ti patut digaga, Jehovah ulih nulung kitai ngaga pemutus ti manah. Tang Iya deka ngereja nya enti kitai baruh ati. Jehovah besemaya deka mendingka “sampi orang ke baruh ati.” (Mas. 10:17) Lalu Iya ukai semina deka mendingka sampi kitai. Bup Kudus madahka: “Iya nguluka orang ke baruh ati nengah jalai ti ngena lalu ngajar sida peneka Iya.” (Mas. 25:9) Jehovah nyediaka iring dalam Bup Kudus enggau litaricha d sereta nengah program ke dikeluarka “ulun ke tetap ati sereta bepenemu-dalam.” (Mat. 24:45-47) Kitai begunaka bantu ari Jehovah lalu patut baruh ati nerima nya. Kitai ngereja tu enggau belajarka utai ti disediaka Iya, sereta nitihka utai ti dipelajarka kitai.

19-21. Nama penyalah ke digaga Moses lebuh ba Kades? Nama utai ke ulih dipelajarka kitai ari nya?

¹⁹ Kitai deka nyeliah ari ngereja utai ti salah. Pikirka baru pasal Moses. Iya bepuluh-puluh taun udah baruh ati sereta ngerinduka ati Jehovah. Tang ba pengujung 40 taun bejalai ba menua puang, Moses enda agi baruh ati. Menyadi indu iya, ke nyelamatka nyawa iya ba menua Ejip, baru udah nadai lalu dikuburka ba Kades. Lalu orang Israel mutap baru, madahka sida enda diintu enggau manah. Sekali tu sida bekelikuh enggau Moses ketegal nadai ai. Taja pan Jehovah udah meri Moses kuasa kena ngaga kereja ajih lalu Moses udah lama nguluka sida enggau manah, tang sida agi mutap. Sida ukai semina  mutap ketegal nadai ai tang mega mutap pasal Moses. Sida nyalahka Moses lalu ngumbai diri aus ketegal iya.—P-pau. 20:1-5, 9-11.

²⁰ Moses balat ringat, lalu ngetu baruh ati. Ari ke bejaku ngagai batu baka ke diasuh Jehovah, Moses enggau ati ti pedis bejaku ngagai orang Israel lalu madahka diri deka ngaga kereja ajih. Moses malu batu dua kali lalu ai mayuh amat pansut. Iya ngereja penyalah ti besai ketegal sumbung sereta pedis ati. (Mas. 106:32, 33) Taja pan Moses enda baruh ati maya nya aja, tang tu ngujungka iya lenyau peluang tama ngagai Menua ti Udah Disemaya.—P-pau. 20:12.

²¹ Ari tu, bisi utai ke ulih dipelajarka kitai. Kesatu, kitai patut seruran baruh ati. Enti enda, kitai engka nyadi sumbung. Lalu tu ulih ngujungka kitai nyebut sereta ngereja utai ti beli. Kedua, ati ti tusah enda ulih nulung kitai mengkang baruh ati. Nya alai, kitai patut bebendar baruh ati taja pan ba maya ti balat tusah.

22-23. (a) Nama kebuah kitai patut terus baruh ati? (b) Nama ulih ditemu kitai ari jaku ba Sepaniah 2:3?

²² Kitai deka dilindung. Enda lama agi, Jehovah deka munaska semua orang ke jai ari bumi. Semina tinggal orang ke baruh ati aja. Bumi deka penuh enggau pemaik. (Mas. 37:10, 11) Kati nuan ulih enggau sida ke baruh ati nya? Ulih, enti nuan nitihka jaku Jehovah ba Sepaniah 2:3 (Bacha).

²³ Nama kebuah Sepaniah 2:3 madahka: “Nyangka ukur kita enda diukum”? Tu ukai reti Jehovah enda ulih ngelindung orang ke ngagaka ati Iya sereta dikerinduka Iya. Tang, nya nunjukka kitai patut ngereja siti-siti utai ngambika dilindung Iya. Kitai ulih selamat “lebuh Jehovah ngayanka pengeringat Iya” lalu idup belama iya enti kitai baruh ati sereta ngagaka ati Jehovah ari diatu.