1-2. Nitihka Matthew 5:11, nama runding kitai pasal penguji?

 JESUS besemaya murid iya deka gaga ati. Iya mega nangkan sapa ke rinduka iya deka napi penguji. (Mat. 10:22, 23; Luk. 6:20-23) Kitai gaga ati ulih nyadi murid Kristus. Tang baka ni asai ati kitai lebuh diri sebilik nagang kitai nyembah Jehovah, enti perintah merinsaka kitai, tauka enti orang ke sama sekula tauka sama kereja nguji nekan kitai ngereja utai ti salah? Enti kitai berundingka tu, kitai deka berasai irau.

² Mayuh orang ngumbai, sida enda ulih gaga ati lebuh diperinsa. Tang Bup Kudus madah kitai ulih gaga ati. Ambika chunto, James madah lebuh kitai dituntung mayuh macham penguji, kitai patut gaga ati, ukai asa ati. (Jas. 1:2, 12) Lalu Jesus madah kitai patut gaga ati taja pan diperinsa. (Bacha Matthew 5:11.) Baka ni kitai ulih mengkang gaga ati lebuh napi penguji? Kitai ulih belajar ari surat ke ditulis James ngagai orang Kristian ba kurun keterubah. Kitai deka berandau dulu penanggul ke ditapi orang Kristian maya nya.

 3. Nama nyadi enda lama pengudah James nyadi murid Jesus?

³ Enda lama pengudah menyadi Jesus ke benama James nyadi murid Jesus, orang Kristian ba Jerusalem napi pemerinsa. (SKR. 1:14; 5:17, 18) Lebuh Stepen dibunuh, mayuh orang Kristian rari ari Jerusalem lalu “pambar ngagai serata menua Judea enggau Samaria,” nyentuk ngagai Saiprus enggau Antiok. (SKR. 7:58–8:1; 11:19) Bala murid Jesus napi mayuh penanggul. Taja pia, sida agi ransing madahka berita manah ba endur baru sida lalu mayuh eklisia udah ditumbuhka ba endur ke dipegai perintah Rome. (1 Pet. 1:1) Tang sida deka napi mayuh agi penusah!

 4. Nama agi penguji ke ditapi orang Kristian ba kurun keterubah?

 ⁴ Orang Kristian ba kurun keterubah napi bemacham penguji. Ambika chunto, ba taun 50 M., Raja Besai Rome iya nya Klaudius udah muru semua orang Judah ari nengeri Rome. Nya alai, orang Judah ke nyadi orang Kristian dipejal ninggalka rumah sida lalu pindah ngagai endur bukai. (SKR. 18:1-3) Ba taun 61 M., rasul Paul madah pasal bala menyadi Kristian ti dikeduan di mua orang mayuh, dikurung dalam rumah jil sereta utai sida dirampas. (Heb. 10:32-34) Lalu baka orang bukai, orang Kristian napi pengidup ti seranta sereta sakit.—Rom. 15:26; Plp. 2:25-27.

 5. Nama tanya ke deka disaut kitai?

⁵ Lebuh James nulis surat sebedau taun 62 M., iya udah nemu utai ke ditapi bala menyadi Kristian. Jehovah ngasuh James nulis surat ngagai orang Kristian kena meri sida jaku lalau ke nulung sida mengkang gaga ati lebuh napi penguji. Aram kitai berandauka surat James lalu nyaut tiga iti tanya tu: Nama kebuah orang Kristian ulih gaga ati taja pan napi penguji? Nama ke ulih ngasuh orang Kristian lenyau pengaga ati? Lalu baka ni penemu-dalam, pengarap sereta pemerani nulung kitai ngetanka pengaga ati enda ngira nama penguji ke ditapi kitai?

 6. Nitihka Luke 6:22, 23, nama kebuah orang Kristian ulih gaga ati taja pan napi penguji?

⁶ Mayuh orang ngumbai, sida deka gaga ati enti sida bisi pengerai ti manah, duit ti mayuh sereta pengelantang ba ruang bilik. Tang pengaga ati ke disebut James nya sebagi ari buah roh kudus Petara lalu ukai  bepanggai ba gaya pengidup kitai. (Gal. 5:22) Orang Kristian ulih gaga ati tauka bisi pengaga ati ti bendar enti iya nemu iya ngelantangka ati Jehovah sereta nitihka teladan Jesus. (Bacha Luke 6:22, 23; Kol. 1:10, 11) Pengaga ati kitai ulih disemaka baka api dalam lampu kelita. Api nya ulih terus mau taja pan bisi ribut tauka ujan. Kitai mega ulih terus gaga ati enda ngira nama utai nyadi ba pengidup kitai. Kitai enda lenyau pengaga ati enti kitai sakit, enda mayuh duit, dikeduan tauka disakal diri sebilik sereta orang bukai. Kitai ulih majak gaga ati tiap kali orang nguji ngelaban kitai. Lalu penguji ke ditapi kitai nunjukka kitai murid Jesus ti bendar. (Mat. 10:22; 24:9; Jhn. 15:20) Nya kebuah James nulis: “Menyadi, lebuh kita dituntung mayuh macham penguji, kita patut gaga ati.”—Jas. 1:2.

7-8. Nama kebuah pengarap kitai majak kering lebuh kitai diuji?

⁷ James madahka kebuah bukai orang Kristian sanggup betan lebuh napi penguji. Ku iya: “Lebuh pengarap kita diuji, iya ngadaka ati ti tan.” (Jas. 1:3) Penguji nya baka proses ngaga pedang. Lebuh pedang nya ditunu ba api sereta disepuh ba ai, pedang nya majak kering. Sama mega lebuh kitai tan napi penguji, pengarap kitai deka tegap. Nya kebuah James nulis: “Awak ka penetap ati meruan ba kita belama-lama, ngambi ka kita mansang sereta chukop manah dalam pengarap.” (Jas. 1:4, Bup Kudus Berita Manah Ka Rebak Diatu) Lebuh kitai ngasaika penguji nya ulih ngeringka pengarap kitai, kitai ulih betan enggau gaga ati.

⁸ Ba surat iya, James madahka sekeda utai ke ulih ngasuh kitai lenyau pengaga ati. Nama sekeda penanggul, lalu baka ni kitai ulih mutarka penanggul nya?

 9. Nama kebuah kitai begunaka penemu-dalam?

⁹ Penanggul iya: Enda nemu nama utai ke deka digaga. Lebuh kitai napi penguji, kitai minta Jehovah nulung kitai ngaga pemutus ke ngasuh Iya gaga ati, mai penguntung ke bala menyadi Kristian kitai lalu nulung kitai mengkang taluk ngagai Jehovah. (Jer. 10:23) Kitai begunaka penemu-dalam ngambika kitai nemu nama utai ke patut digaga sereta disebut ngagai orang ke ngelaban kitai. Enti kitai enda nemu nama utai ke deka digaga, kitai deka berasai asa ati, lalu kitai jampat lenyau pengaga ati.

10. Nitihka James 1:5, nama patut digaga kitai ngambika bulih penemu-dalam?

¹⁰ Kena mutarka iya: Minta penemu-dalam ari Jehovah. Enti kitai deka mengkang gaga ati lebuh napi penanggul, keterubah kitai patut besampi ngagai Jehovah meri kitai  penemu-dalam ke diguna kitai ngaga pemutus ti manah. (Bacha James 1:5.) Nama patut digaga kitai enti kitai ngasaika Jehovah enda nyaut sampi kitai tekala nya? Terus meh besampi ngagai Petara. Jehovah enda ringat lebuh kitai seruran minta penemu-dalam ari Iya. Apai kitai di serega meri enggau “gerah mudah” lebuh kitai besampi minta penemu-dalam kena kitai betan napi penguji. (Mas. 25:12, 13) Iya meda penanggul ke ditapi kitai, Iya nemu asai ati kitai lalu keran deka nulung kitai. Ketegal nya, kitai berasai gaga ati! Tang baka ni Jehovah meri kitai penemu-dalam?

11. Nama agi utai ke patut digaga kitai kena bulih penemu-dalam?

¹¹ Jehovah meri kitai penemu-dalam nengah Jaku Iya. (J-lam. 2:6) Ngambika bulih penemu-dalam, kitai patut belajarka Jaku Petara sereta litaricha ke bepelasarka Bup Kudus. Tang tu enda chukup! Kitai patut ngasika jaku lalau Petara. James nulis: “Anang semina mendingka jaku nya, . . . Kereja utai ti diasuh jaku nya.” (Jas. 1:22) Enti kitai nitihka jaku lalau Petara, kitai bulih pemaik, pengasih sereta nemu berunding. (Jas. 3:17) Kualiti tu ulih nulung kitai napi penanggul enggau gaga ati.

12. Nama kebuah beguna kitai nemu Bup Kudus enggau manah?

¹² Jaku Petara nya baka cheremin, ke nulung kitai nemu pengelemi diri lalu baka ni kitai ulih ngaga ubah. (Jas. 1:23-25) Ambika chunto, pengudah kitai belajarka Jaku Petara, kitai engka nemu diri jampat ringat. Enggau tulung ari Jehovah, kitai ulih ngaga ubah ngambika nelap lebuh bisi orang tauka penanggul ke ulih ngasuh kitai ringat. Ketegal kitai nelap, kitai enda kelalu irau lebuh napi penanggul. Tang kitai ulih berunding  enggau ngaga pemutus ti manah. (Jas. 3:13) Nya alai, amat beguna kitai nemu Bup Kudus enggau manah!

13. Nama kebuah kitai patut belajar ari teladan nembiak Petara ba Bup Kudus?

¹³ Kekadang, kitai semina belajar pengudah kitai ngaga penyalah. Tang tu chara ti tusah. Siti chara kitai bulih penemu-dalam iya nya belajar pasal pemujur sereta penyalah orang bukai. Nya kebuah James meransang kitai belajar ari teladan ke bisi ba Bup Kudus, baka Abraham, Rahap, Jop, enggau Elijah. (Jas. 2:21-26; 5:10, 11, 17, 18) Nembiak Jehovah ti tetap ati tu mujur napi penanggul ke ulih ngasuh pengaga ati sida lenyau. Teladan sida nunjukka kitai mega ulih mujur enti kitai bepanggai ba Jehovah.

14-15. Nama kebuah kitai patut mutarka asai ati ti kakang?

¹⁴ Penanggul iya: Kakang ati enggau utai ke dipechaya. Kekadang kitai tusah deka meretika sekeda utai ba Bup Kudus. Tauka Jehovah engka enda nyaut sampi kitai baka ke dikedekaka kitai. Tu engka ngasuh kitai kakang ati. Enti kitai enda mutarka nya, tu ulih ngasuh pengarap kitai lemi, lalu ngerusak kaul kitai enggau Jehovah. (Jas. 1:7, 8) Indah, kitai deka lenyau pengadang ke jemah ila.

¹⁵ Rasul Paul nyemaka pengadang kitai baka sauh. (Heb. 6:19) Sauh ulih nulung ngetanka kapal lebuh kabut nyadi, lalu nyeliahka kapal nya ari anyut ngagai endur ti bebatu. Tang sauh nya semina beguna enti rantai iya ke nyambung ngagai kapal nya enda putus. Enti rantai sauh nya bekarat, iya senang putus. Baka nya mega, kakang ati ti enda diputarka ulih ngasuh pengarap kitai senang lemi. Lebuh kitai napi penanggul, orang ke bisi kakang ati deka tusah arapka Jehovah ngamatka semaya Iya. Enti kitai nadai pengarap, kitai deka lenyau pengadang. James madah, orang ke kakang ati “baka gelumbang ti di tasik, ti dipuput lalu dikebuka ribut.” (Jas. 1:6) Nya alai, orang ke baka tu tusah deka ngasaika pengaga ati!

16. Nama patut digaga kitai enti kitai kakang ati?

¹⁶ Kena mutarka iya: Putarka asai ati ti kakang sereta keringka pengarap nuan. Maya jeman nabi Elijah, nembiak Jehovah kakang ati enggau utai ke dipechayaka sida. Elijah madah ngagai sida: ‘Ni pengelama baru kita deka ngaga pemutus penemu kita? Enti Jehovah nya Petara, sembah meh Iya. Tang enti Baal nya Petara, sembah meh iya!’ (1 Raj. 18:21) Sama mega enggau kemayaharitu. Kitai patut ngaga sekeda pansik kena nentu sekalika Jehovah nya Petara, Bup Kudus nya Jaku Iya, sereta Saksi-Saksi Jehovah nya nembiak Iya. (1 Tes. 5:21) Enggau ngereja nya, semua kitai ulih muai asai ati ti kakang sereta negapka pengarap kitai. Enti kitai begunaka tulung kena mutarka asai ati ti kakang, kitai ulih minta tulung ari tuai gempuru. Kitai patut mutarka asai ati ti kakang ngambika kitai ulih nyembah Jehovah enggau gaga ati!

17. Nama ulih nyadi enti kitai lenyau pemerani?

¹⁷ Penanggul iya: Lemi semengat. Bup Kudus madah: “Enti nuan lemi lebuh nuan dituntung penusah, pengering nuan deka lenyau.” (J-lam. 24:10, NWT) Leka jaku “lemi” dalam jaku Hebrew ulih mai reti “lenyau pemerani.” Enti nuan lenyau pemerani, nuan deka lenyau pengaga ati.

18. Nama reti betan?

¹⁸ Kena mutarka iya: Bepanggai ba Jehovah ke meri kitai pemerani kena betan. Enti kitai deka betan napi penguji, kitai begunaka pemerani. (Jas. 5:11) Leka jaku ke dikena James nyalin “tan ati” ngingatka kitai pasal seiku orang ke enda mindah ari endur  iya. Gambarka seiku soldadu ti berani lebuh iya diserang munsuh. Iya enda mindah tauka ngerarika diri lebuh diserang munsuh.

19. Nama utai ke dipelajar kitai ari teladan rasul Paul?

¹⁹ Rasul Paul netapka teladan ti pemadu badas pasal pemerani enggau tan ati. Kekadang iya berasai lemi. Tang iya ulih betan ketegal iya bepanggai ba Jehovah, ke meri iya pengering. (2 Kor. 12:8-10; Plp. 4:13) Kitai ulih ngembuan pengering sereta pemerani baka Paul enti kitai baruh ati minta tulung ari Jehovah.—Jas. 4:10.

20-21. Nama ulih dipechayaka kitai?

²⁰ Kitai ulih pechaya, penguji ke ditapi kitai ukai ukum ari Jehovah. James madahka: “Orang ke kena laban penguji, enda tau nyebut, ‘Aku diuji Petara,’ laban Petara enda ulih diuji penyai, lalu Iya Empu enda nguji orang.” (Jas. 1:13) Enti kitai arapka utai tu, kitai deka mengkang semak ngagai Apai kitai ti di serega.—Jas. 4:8.

²¹ Jehovah “enda berubah.” (Jas. 1:17) Lebuh orang Kristian abad keterubah napi penguji, Iya nulung sida. Lalu Iya mega deka nulung kitai kemayaharitu. Enggau bebendar meh minta Jehovah nulung nuan ngembuan penemu-dalam, pengarap sereta pemerani. Iya deka nyaut sampi nuan. Udah nya, nuan ulih pechaya Iya deka nulung nuan mengkang gaga ati taja pan napi penanggul.