DUA iku indu benung bejalai ba endur dagang di Baguio City, Filipina lebuh seduai iya tepedaka kart nginjil ba endur orang mayuh. Tang seduai enda mansang kia. Helen, seiku menyadi indu ke bediri sepiak kart nya tuchum ngagai seduai iya. Seduai iya neruska pejalai, tang agi ingatka tuchum Helen.

Pengudah nya, maya dua iku indu nya pulai ngagai rumah ngena bas, seduai iya bisi meda papan tanda jw.org ti besai ba sebuah Palan Gempuru. Sida ingatka tanda nya sama enggau tanda ba kart nginjil ke dipeda seduai iya tadi. Seduai nurun ari bas lalu meda jadual gempuru ke dilekat ba pagar Palan Gempuru.

Dua iku indu nya datai ngagai siti ari gempuru ba dia. Lalu seduai iya tekenyit meda Helen ba Palan Gempuru nya. Seduai iya terus ngelala Helen ketegal tuchum iya. Helen madahka, “Aku amat kesal lebuh seduai iya mansang ngagai aku. Aku berunding, engka aku bisi ngaga penyalah.” Tang dua iku indu nya nerangka ngagai Helen, seduai kala meda iya nginjil ngena kart sebedau tu.

Dua iku indu nya amat gaga ati enggau gempuru sereta berasai nyamai begulai enggau bala menyadi. Lebuh seduai iya meda bala menyadi meresika Palan Gempuru pengudah nya, seduai iya nanya sekalika sida ulih nulung. Seiku ari indu nya udah mindah ngagai menua bukai, lalu seiku da agi berengkah datai ke gempuru lalu belajarka Bup Kudus. Semua tu ketegal tuchum!