1-2. (a) Nama kebuah mayuh orang kemayaharitu tusah deka pechayaka sida ke bisi kuasa? (b) Nama deka dikerandauka kitai ba artikel tu?

 KEMAYAHARITU mayuh orang tusah deka pechayaka sida ti bisi kuasa. Perintah enggau undang-undang suah ngelindung orang ke kaya sereta ti bisi kuasa, tang enda meri mayuh bantu ngagai orang ke seranta. Bup Kudus madahka: “Aku meda semua utai tu lebuh aku berundingka utai ti dikereja di dunya tu, dunya alai sekeda orang ke bisi kuasa diau, alai orang bukai ke natka diri merinsa dipegai sida.” (P-jar. 8:9) Nambahka nya, sekeda tuai pengarap ngereja mayuh utai ti jai. Tu ngasuh sekeda orang enda agi pechayaka Petara. Nya alai lebuh kitai belajarka Bup Kudus enggau seseiku orang, kitai patut nulung iya pechayaka Jehovah sereta pengari Iya ba dunya tu.

² Taja pia, ukai semina pemelajar Bup Kudus ke patut belajar pechayaka Jehovah sereta gerempung Iya. Indah kitai ke udah lama nyembah Jehovah mega enda tau enda terus andal Jehovah seruran ngereja utai ti betul. Kekadang, pengarap kitai engka diuji. Dalam artikel tu, kitai deka berandauka tiga iti situasi ke ulih nguji pengarap kitai: (1) lebuh kitai macha sekeda cherita dalam Bup Kudus, (2) lebuh kitai nerima iring  ari gerempung Jehovah sereta (3) lebuh kitai napi penusah ba jemah ila.

 3. Baka ni pengarap kitai ngagai Jehovah diuji lebuh macha sekeda cherita dalam Bup Kudus?

 ³ Lebuh kitai macha Bup Kudus, kitai engka berunding nama kebuah Jehovah ngakim orang enggau chara ti enda sama, sereta kebuah Iya ngaga sesiti pemutus. Ambika chunto ba bup Penyampau, kitai macha pasal seiku lelaki orang Israel ke ngumpul kayu api ba Hari Sabat. Jehovah ngasuh iya diukum bunuh. Beratus taun pengudah utai nya nyadi, kitai macha ba bup 2 Samuel, Jehovah ngampunka Raja David taja pan iya udah ngereja pengawa butang enggau munuh orang. (P-pau. 15:32, 35; 2 Sam. 12:9, 13) Kitai engka berunding, ‘Nama kebuah Jehovah ngampunka David taja pan iya udah munuh orang sereta ngereja pengawa butang, tang ngasuh seiku lelaki ke ngereja dosa ti enda sebesai dosa David diukum bunuh?’ Kena nyaut tanya nya, kitai deka belajar tiga iti pekara ke patut dikingatka kitai lebuh macha Bup Kudus.

 4. Baka ni Pemungkal 18:20, 21 enggau Ulang Adat 10:17 negapka pengarap kitai pasal chara Jehovah ngaga pemutus?

⁴ Bup Kudus enda selalu meri semua penerang. Ambika chunto, kitai nemu David amat nesal ati ke ulah iya. (Mas. 51:2-4) Tang baka ni enggau lelaki ke ngelanggar adat bekaul enggau Hari Sabat? Kati iya nesal ati enggau ulah iya? Kati iya kala ngelanggar adat Jehovah sebedau nya? Kati iya enggai ninga tauka nulak jaku tangkan ke diberi? Bup Kudus nadai madah. Taja pia, kitai ulih andal Jehovah “endang lurus.” (U-dat. 32:4) Iya ngaga pemutus bepelasarka fakta. Mensia seruran ngaga pemutus ti salah laban sida bepanggai ba utai ke disebut orang, penemu ti salah pasal orang bukai tauka utai bukai. (Bacha Pemungkal 18:20, 21; Ulang Adat 10:17.) Majak kitai belajar pasal Jehovah enggau standard Iya, majak agi kitai deka pechayaka chara Iya ngaga pemutus. Kitai engka bisi tanya pasal sekeda ari cherita Bup Kudus ke dibacha kitai, lalu ukai semua tanya nya bisi saut. Taja pia, kitai nemu Jehovah “endang lurus dalam semua utai ti dikereja Iya.”—Mas. 145:17.

 5. Baka ni chara kitai ngakim ulih dikachau ketegal kitai enda sempurna? (Peda mega kutak “ Ketegal Enda Sempurna, Kitai Tusah Deka Ngakim enggau Betul.”)

 ⁵ Kitai enda ulih selalu ngakim enggau betul laban kitai enda sempurna. Petara nempa kitai ngambika ulih neladan pemanah Iya. Nya alai, kitai keran deka meda orang diintu enggau lurus. (P-kal. 1:26) Tang ketegal kitai enda sempurna, kitai engka ngembuan runding ti salah, taja pan kitai ngumbai diri udah bisi semua fakta. Kingatka baru pasal Jonah. Iya enda gaga ati lebuh Jehovah ngayanka pengasih ngagai orang ba Nineweh. (Jon. 3:10–4:1) Tang perundingka meh utai ke nyadi ketegal Jehovah udah ngayanka pengasih. Lebih ari 120,000 iku orang Nineweh ke nesal ati diselamatka! Pengujung iya, Jonah ke patut ngubah runding diri, ukai Jehovah.

 6. Nama kebuah Jehovah enda ibuh nerangka ngagai kitai pasal pemutus ke digaga Iya?

⁶ Jehovah enda ibuh nerangka pasal pemutus ke digaga Iya. Kelia menya, Jehovah ngemendarka bala nembiak Iya madahka asai ati sida bekaul enggau pemutus ke digaga Iya. (P-kal. 18:25; Jon. 4:2, 3) Lalu kekadang, Iya bisi nerangka kebuah Iya ngaga sesiti pemutus. (Jon. 4:10, 11) Tang iya ke amat, Jehovah enda ibuh nerangka ngagai kitai pasal pemutus ke digaga Iya. Ketegal Jehovah nya Penempa kitai, Iya enda ibuh minta pemendar kitai sebedau tauka pengudah Iya ngaga pemutus.—Isa. 40:13, 14; 55:9.

 7. Nama penanggul ke engka ditapi kitai, lalu nama kebuah?

⁷ Kitai nemu Jehovah seruran ngereja utai ti betul. Tang kitai engka tusah deka arapka orang ke ngarika Jehovah ba dunya. Kitai engka berunding sekalika sida ke ngiring gerempung Jehovah amat nitihka iring Jehovah tauka runding diri empu. Sida ke idup maya jeman Bup Kudus mega engka kala berundingka utai ti sama. Peratika baru chunto ke bisi ba  genteran 3. Kaban belayan lelaki ke ngelanggar adat Hari Sabat nya engka berunding sekalika Moses bisi minta iring ari Jehovah tauka enda sebedau ngeletak ukum bunuh ngagai lelaki nya. Lalu seiku ari kaban Uriah engka ngumbai David udah ngena penuduk iya ke nyadi raja kena ngelepaska diri ari diukum bunuh ketegal butang enggau bini Uriah. Nama ulih dipelajarka kitai? Jehovah udah arapka sida ke dipilih Iya ngiring ba gerempung sereta eklisia. Nya alai, enti kitai enda arapka sida, kitai enda ulih madahka diri arapka Jehovah.

 8. Nama utai ke sama entara utai ke ditulis ba Surat Kereja Rasul 16:4, 5 enggau eklisia Kristian kemayaharitu?

⁸ Kemayaharitu Jehovah ngiring gerempung Iya ba dunya nengah “ulun ke tetap ati sereta bepenemu-dalam.” (Mat. 24:45) Baka raban ti ngiring maya abad keterubah, ulun tu ngemataka nembiak Petara di serata dunya, lalu meri iring ngagai bala tuai gempuru. (Bacha Surat Kereja Rasul 16:4, 5.) Udah nya, bala tuai gempuru nentuka bala menyadi ba eklisia nitihka iring ti udah diberi. Enti kitai ngasika iring ti datai ari gerempung enggau bala tuai gempuru, kitai nunjukka diri arapka Jehovah.

 9. Ni maya kitai engka berasai tusah nitihka iring ari bala tuai gempuru, lalu nama kebuah?

⁹ Kekadang, kitai engka berasai tusah nitihka pemutus ke udah digaga bala tuai gempuru. Ambika chunto, dalam beberapa taun tu mayuh eklisia enggau pelilih udah diatur baru. Ba sekeda endur, bala tuai gempuru minta bala menyadi nitihka eklisia bukai ngambika penuduk ba Palan Gempuru dikena enggau manah. Enti kitai diasuh enggau eklisia  ti baru, kitai engka tusah deka ninggalka bala kaban enggau diri sebilik. Kati Jehovah ke meri iring ngagai bala tuai gempuru kena nentuka ni bagi menyadi ke patut dipindahka ngagai eklisia bukai? Enda. Ketegal nya kitai engka tusah deka nitihka iring ke diberi sida. Tang Jehovah udah arapka bala tuai gempuru ngaga pemutus ke baka tu, lalu kitai pan patut andalka sida. b

10. Nitihka Hebrew 13:17, nama kebuah kitai patut besaup enggau bala tuai gempuru?

¹⁰ Nama kebuah kitai patut besaup enggau bala tuai gempuru sereta nyukung pemutus ke digaga sida taja pan bisi maya pemutus nya ukai ti dikedekaka kitai? Enti kitai ngereja nya, kitai nyaga penyerakup entara nembiak Petara. (Eps. 4:2, 3) Eklisia deka mansang agi enti bala menyadi enggau baruh ati nitihka pemutus ke udah digaga raban tuai gempuru. (Bacha Hebrew 13:17.) Kelebih agi, kitai nunjukka diri pechayaka Jehovah lebuh kitai besaup enggau sida ti diasuh Jehovah nyaga kitai.—SKR. 20:28.

11. Nama ulih nulung kitai andal agi ke iring ti diberi bala tuai gempuru?

¹¹ Lebuh bala tuai gempuru berandau pasal sesiti pekara ke bekaul enggau eklisia, sida besampi minta roh kudus Jehovah. Sida mega mansik prinsip Bup Kudus sereta iring ari gerempung Jehovah enggau bejimat. Sida keran deka ngelantangka ati Jehovah lalu ngibun nembiak Petara enggau pemadu manah. Bala tuai gempuru nemu Petara beratika chara sida ngibun bala nembiak Iya. (1 Pet. 5:2, 3) Enti kitai ingatka utai tu, kitai deka andal agi ke iring ti diberi bala tuai gempuru. Perundingka tu: Taja pan dunya tu bepechah-belah ketegal enda sama bansa, pengarap sereta penemu politik, tang nembiak Jehovah mengkang beserakup nyembah Petara ti bendar. Tu semina ulih nyadi ketegal Jehovah merekatka gerempung Iya!

12. Nama sekeda utai ke diperatika bala tuai gempuru lebuh nentuka seseiku orang amat nesal ati tauka enda?

¹² Jehovah meri bala tuai gempuru tanggungjawap ti berat ngambika eklisia mengkang tuchi. Enti seiku menyadi Kristian ngereja penyalah ti besai, Jehovah deka bala tuai gempuru nentuka sekalika orang nya ulih mengkang ba eklisia tauka enda. Kena nentuka nya, sida patut nemu sekalika orang nya amat-amat nesal ati ke penyalah ti udah digaga iya. Iya engka madahka diri udah nesal ati, tang kati iya amat begedika utai ti udah digaga iya? Kati iya keran deka nyeliahka ari ngereja penyalah ti sama? Kati iya sanggup mutuska kaul enggau orang ke ngujungka iya ngereja penyalah? Bala tuai gempuru besampi ngagai Jehovah, beratika fakta sereta prinsip Bup Kudus. Pia mega, sida bebendar deka nemu asai ati orang nya pasal utai ke udah dikereja iya. Udah nya, baru sida ngaga pemutus sekalika orang nya ulih mengkang ba eklisia tauka enda. Ba sekeda kes, orang ke ngereja penyalah enda tau enda dibuai ari gerempung.—1 Kor. 5:11-13.

13. Nama pengirau ke engka diasaika kitai lebuh bakih tauka kaban belayan dibuai ari gerempung?

¹³ Ni maya pengarap kitai ngagai bala tuai gempuru diuji? Perundingka situasi tu. Enti orang ke enda rapat enggau kitai dibuai ari gerempung, kitai engka sedia nerima pemutus bala tuai gempuru. Tang baka ni enti orang ke dibuai ari gerempung nya kaban rapat kitai? Kitai engka irau bala tuai gempuru enda meresa semua fakta. Tauka kitai engka berunding sekalika sida ngaga pemutus sejalai enggau chara Jehovah. Enti utai tu nyadi,  nama ulih nulung kitai bisi runding ti betul bekaul enggau pemutus ke digaga bala tuai gempuru?

14. Nama ulih nulung kitai enti bala tuai gempuru mutuska orang ti rapat enggau kitai dibuai ari gerempung?

¹⁴ Kingatka, atur dibuai ari gerempung nya atur ti datai ari Jehovah. Atur tu meri penguntung ngagai eklisia lalu engka ulih nulung orang ke dibuai nya. Enti seiku orang ke bedosa sereta enda nesal ati agi dikemendarka enggau eklisia, iya engka mai menyadi Kristian ke bukai ngereja penyalah. (Gal. 5:9) Nambahka nya, iya engka enda sedar pemesai penyalah ke udah digaga iya. Pia mega, iya engka enda sedar kebuah iya patut ngubah ulah enggau runding ngambika ulih diterima Jehovah baru. (P-jar. 8:11) Nya alai lebuh seseiku orang dibuai ari gerempung, kitai pechaya bala tuai gempuru udah bejalaika tanggung pengawa sida enggau manah. Sida nemu, baka bala hakim maya jeman Israel kelia, sida “ukai ngakim ke mensia, tang ngakim ke Jehovah.”—2 Ban. 19:6, 7, NWT.

15. Nama kebuah kitai patut arapka iring ari Jehovah, kelebih agi kemayaharitu?

¹⁵ Pengujung dunya nyau majak semak. Nya alai, kitai enda tau enda arapka iring ari Jehovah kelebih agi diatu. Nama kebuah? Lebuh Penusah ti Besai nyadi, kitai engka nerima iring ti nyelai, tusah dimereti sereta tusah dititihka. Taja pan Jehovah nadai bejaku enggau kitai, tang Iya tentu deka meri iring nengah pengari Iya ba dunya tu. Maya nya kitai nadai agi awak deka kakang ati pasal iring ke diterima, tauka ngembuan runding: ‘Amat iring tu datai ari Jehovah, tauka kati nya pemutus ke digaga menyadi ke ngiring?’ Lebuh maya nya nyadi, kati nuan deka arapka Jehovah sereta gerempung Iya? Saut ke tanya nya ulih ditemu ari chara nuan nerima iring ari sida ke ngarika Jehovah diatu. Enti nuan pechayaka iring ti diterima kitai kemayaharitu, lalu sedia deka ngasi, nuan mega tentu deka ngereja utai ti sama lebuh Penusah ti Besai nyadi.—Luk. 16:10.

16. Baka ni pengarap kitai ngagai chara Jehovah ngakim deka diuji enda lama da agi?

¹⁶ Kitai mega patut berunding nama reaksi kitai lebuh Jehovah ngakim ba pengujung dunya ti jai tu. Diatu, kitai amat ngarapka orang ke enda nyembah Jehovah, nyengkaum kaban belayan kitai ke ukai Saksi deka nyembah Jehovah. Tang ba Armagedon, nengah Jesus, Jehovah deka ngaga pemutus bekaul enggau pengidup sida jemah ila. (Mat. 25:31-33; 2 Tes. 1:7-9) Ba maya nya, ukai kitai ke nentuka sapa ke layak nerima pengasih  Jehovah tauka enda. (Mat. 25:34, 41, 46) Kati kitai deka pechayaka pemutus Jehovah, tauka badu nyembah Jehovah laban enda setuju enggau pemutus Iya? Nya alai, tu meh maya kitai negapka pengarap ngagai Jehovah ngambika kitai ulih arapka Iya enggau pengabis ati jemah ila.

17. Nama penguntung ke diulih kitai ari chara Jehovah ngakim maya pengujung dunya tu?

¹⁷ Uji perundingka asai ati kitai ba dunya baru. Maya nya kitai deka ngasaika berekat ketegal chara Jehovah ngakim. Pengarap pelesu deka nadai agi. Pengawa dagang sereta perintah mensia ke suah nekan sereta merinsaka orang deka nadai agi. Kitai nadai agi napi penanggul ba pengerai, mansang tuai tauka mati. Nambahka nya, Sitan enggau bala melikat ke jai deka dikurung pengelama seribu taun. Pengawa jai sida mega deka nadai agi. (Pem. 20:2, 3) Ketegal kitai pechayaka Jehovah, kitai tentu deka beterima kasih ke semua utai ke udah digaga Iya!

18. Nitihka Penyampau 11:4-6 sereta 21:5, nama ulih dipelajarka kitai ari utai ke nyadi ba orang Israel?

¹⁸ Kati pengidup ba dunya baru deka nguji pengarap kitai pasal chara Jehovah ngatur sekeda pekara? Perundingka utai ke nyadi ngagai orang Israel enda lama pengudah sida pansut ari menua Ejip. Sekeda ari sida berengkah mutap ketegal lelengauka pemakai ba menua Ejip. Sida mega enda beterima kasihka mana ti udah disediaka Jehovah ngagai sida. (Bacha Penyampau 11:4-6; 21:5.) Kati kitai deka ngembuan runding ti sama enggau orang Israel pengudah Penusah ti Besai abis? Kitai enda nemu pemayuh pengawa ke patut digaga kena ngaduka dunya nyadi Paradais. Ketegal bisi mayuh pengawa ke patut dikereja, pengidup kitai terubah iya engka enda senang. Kati kitai deka mutap pasal utai ke disediaka Jehovah maya nya? Kingatka tu, enti kitai beterima kasihka utai ti disediaka Jehovah diatu, kitai tentu deka agi beterima kasihka utai ti disediaka Iya maya nya.

19. Nama udah dipelajarka nuan ari artikel tu?

¹⁹ Kitai patut andal Jehovah seruran ngereja utai ti betul. Kitai mega patut arapka orang ke dikearapka Iya bejalaika pesan Iya. Kingatka meh utai ke dipadah Jehovah nengah nabi Isaiah: “Panggaika pengarap kita ba Aku. Nya baru kita deka kering sereta likun.”—Isa. 30:15.