1. Ni maya kitai nerima jaku lalau, lalu nama kebuah semua kitai begunaka nya?

 SEMUA kitai begunaka jaku lalau. Kekadang kitai empu engka minta jaku lalau ari orang ke dipebasaka kitai. Lalu bisi mega maya iya, sebedau kitai “ngereja penyalah,” bisi seiku menyadi ke ibuhka kitai deka meri jaku lalau. Tu ulih nulung kitai enda ngereja utai ke ngasuh kitai nesal dudi hari. (Gal. 6:1) Tauka kitai engka nerima jaku lalau pengudah kitai ngereja penyalah ti besai. Enda ngira nama kebuah kitai nerima jaku lalau nya, kitai enda tau enda mendingka jaku lalau ke diterima kitai. Enti kitai ngereja tu, nya ulih meri penguntung ngagai kitai lalu ulih nyelamatka nyawa kitai!—J-lam. 6:23.

 2. Nitihka Jaku Dalam 12:15, nama kebuah kitai patut ningaka jaku lalau?

² Ayat tema ba artikel tu meransang kitai ‘mendingka utai ti udah disebut orang ke bepenemu-dalam.’ (J-lam. 22:17) Nadai seiku pan mensia nemu semua utai. Tang tentu bisi orang bukai ke bepenemu agi ari kitai. (Bacha Jaku Dalam 12:15.) Nya alai lebuh kitai ningaka jaku lalau, nya nunjukka kitai baruh ati. Tu mega nunjukka kitai sedarka diri bisi tatak sereta begunaka tulung kena nyapai juluk ati. Roh kudus Jehovah ngiring Raja Solomon nuliska utai tu: “Enggau naka ulih giga semua jaku lalau, nya baru nuan deka mujur.”—J-lam. 15:22.

 3. Baka ni jaku lalau diberi ngagai kitai?

³ Kitai engka nerima jaku lalau ari seseiku orang. Engka seiku  tuai gempuru tauka menyadi lelaki ke layak meri jaku lalau madahka pasal utai ke patut dikemansangka kitai. Enti orang meri jaku lalau ti bepelasarka Bup Kudus ngagai kitai, nya nunjukka iya rinduka kitai. Nya alai, lebuh kitai ningaka jaku lalau sereta nitihka nya, tu nunjukka kitai beterima kasihka lalau ti diberi ngagai kitai. Tang jaku lalau mega engka diberi nengah chara bukai. Nama chara nya? Lebuh kitai macha Bup Kudus sereta litaricha kitai, engka bisi utai ke ngasuh kitai teketu, lalu berunding pasal ulah kitai. Udah nya, kitai deka diperansang ngaga ubah ba pengidup.—Heb. 4:12.

 4. Nitihka Pengajar 7:9, nama reaksi ke patut diseliahka kitai lebuh nerima jaku lalau?

⁴ Kitai engka tusah deka nerima sereta nitihka jaku lalau. Lalu kekadang kitai engka pedis ati lebuh diberi jaku lalau. Nama kebuah? Taja pan kitai ngaku diri enda sempurna, tang bisi maya iya kitai tusah deka nerima jaku lalau. Tu nyadi lebuh seseiku orang madahka penyalah kitai enggau nyemetak. (Bacha Pengajar 7:9.) Kitai engka bebendar ngumbai diri enda salah. Kitai mega engka ngumbai orang ke meri kitai jaku lalau bisi tuju ati ti enda manah. Tauka kitai balat ringat ngagai orang ke meri jaku lalau. Kitai engka ngiga penyalah iya lalu berunding: ‘Iya nadai hak meri aku jaku lalau! Iya pan bisi ngereja penyalah!’ Lalu enti kitai enda rinduka jaku lalau ke diberi nya, tu ngujungka kitai nulak lalau nya. Kitai engka ngaga pemutus minta jaku lalau ari orang bukai ketegal deka ningaka utai ti dikerinduka kitai aja.

 5. Nama deka dipejuraika kitai ba artikel tu?

⁵ Ba artikel tu, kitai deka berandauka sekeda orang dalam Bup Kudus ke nulak jaku lalau enggau sida ke nerima jaku lalau. Kitai mega deka berandauka utai ke ulih nulung kitai nerima jaku lalau sereta penguntung ke diulih ari nya.

 6. Nama dipelajarka kitai ari chara Raja Rehoboam nerima jaku lalau?

⁶ Peratika chunto Rehoboam. Lebuh iya nyadi raja orang Israel, bala rayat datai betemu enggau iya. Sida bisi siti peminta. Apai Rehoboam, iya nya Solomon, udah meri pengawa ti berat ngagai sida. Nya alai sida minta Rehoboam ngurangka pengawa sida. Terubah iya, Rehoboam ngereja utai ti manah. Iya minta penemu ari bala tuai orang Israel. Bala tuai madahka, enti iya mendingka peminta rayat iya, sida deka seruran nyukung iya. (1 Raj. 12:3-7) Taja pia, Rehoboam enda puas ati enggau penemu bala tuai nya. Nyadi, iya nanya penemu ari orang ke serambau enggau iya. Sida nya engka beumur dalam 40-an. Nya alai, sida udah bisi sekeda pengalaman ba pengidup. (2 Ban. 12:13) Tang jaku lalau ke diberi sida enda manah. Sida ngasuh Rehoboam nambahka agi pengawa rayat iya. (1 Raj. 12:8-11) Rehoboam nerima dua iti jaku lalau ti enda sama. Kebendar iya, Rehoboam ulih besampi dulu minta Jehovah madahka ni bagi penemu ke patut dititihka iya. Tang iya enda ngereja nya. Iya mutus deka nitihka penemu ari orang ke serambau enggau iya laban iya rindu agi enggau utai ke dipadah sida. Pengujung iya, pemutus ke digaga iya mai penusah ngagai diri empu sereta orang Israel. Kemayaharitu, kitai engka nerima jaku lalau ke ukai deka didingaka kitai. Tang enti jaku lalau nya bepelasarka Bup Kudus, endaka manah agi enti kitai nerima iya?

 7. Nama dipelajarka kitai ari chunto Raja Usiah?

⁷ Raja Usiah enggai nerima jaku lalau. Iya tama ngagai Rumah Sembiang lalu nunu menyan. Taja pia, pengawa tu semina ulih digaga bala imam. Bala imam madahka ngagai iya: ‘Usiah! Nuan nadai hak nunu menyan ke Jehovah. Semina imam ke ari peturun Aron aja,  ti udah dikuduska, tau ngereja pengawa nya.’ Nama digaga Usiah? Enti Usiah baruh ati nerima jaku lalau lalu ninggalka Rumah Sembiang tekala nya, Jehovah engka agi ulih ngampunka iya. Tang, “Usiah lalu ringat.” Ketegal iya raja, iya ngasaika diri bisi hak ngereja nama-nama utai nitihka peneka iya. Tang, Jehovah enda setuju enggau ulah iya. Nya alai, Jehovah ngukum Usiah enggau penyakit lan lalu terus baka nya “nyentuk ngagai pemati iya.” (2 Ban. 26:16-21) Chunto Usiah ngajar kitai, enti kitai nulak jaku lalau, Jehovah enggai nerima kitai enda ngira sapa kitai.

 8. Nama reaksi Jop lebuh diberi jaku lalau?

⁸ Ba Bup Kudus, bisi mega orang ke nerima jaku lalau. Peratika teladan Jop. Taja pan Jop nangika Petara, tang iya enda sempurna. Ketegal utai ke nyadi ba pengidup iya, iya bisi nyebut utai ke enda patut. Ketegal nya, iya nerima jaku lalau ari Elihu enggau Jehovah. Nama reaksi Jop? Iya nerima jaku lalau nya enggau baruh ati. Ku iya: “Aku bejakuka pasal utai ti enda ditemu aku . . . Aku malu ke semua utai ti udah disebut aku lalu aku nesal ati lalu ngerabu diri enggau amau enggau abus.” Jehovah merekatka Jop ketegal pemaruh ati iya.—Jop 42:3-6, 12-17.

 9. Nama reaksi Moses lebuh diberi jaku lalau, lalu nama kebuah iya teladan ti manah?

⁹ Moses bisi ngereja penyalah ti besai, lalu iya diberi jaku lalau. Bisi sekali, iya balat ringat lalu iya enda ngemuliaka Jehovah. Ketegal nya, Moses enda dikemendarka tama ngagai Menua ti Udah Disemaya. (P-pau. 20:1-13) Lebuh Moses minta Jehovah berundingka baru pasal pemutus Iya, Jehovah madah: “Anang nyebut nya agi ngagai Aku!” (U-dat. 3:23-27) Taja pia, Moses enda ringat. Iya nerima pemutus nya lalu Jehovah agi ngena iya ngiring orang Israel. (U-dat. 4:1) Jop enggau Moses nya teladan ti manah ke kitai. Seduai iya enda nulak jaku lalau ke diberi. Jop ngubah chara iya berunding lalu iya enda ngelaban lebuh diberi jaku lalau. Moses mengkang tetap ati taja pan iya lenyau peluang ti berega ba iya.

10. (a) Nitihka Jaku Dalam 4:10-13, nama penguntung enti kitai nerima jaku lalau? (b) Baka ni sekeda menyadi Kristian ngayanka sifat ti manah lebuh diberi jaku lalau?

¹⁰ Kitai tau bulih penguntung enti neladan Jop enggau Moses. (Bacha Jaku Dalam 4:10-13.) Mayuh menyadi Kristian nunjukka sifat ti manah lebuh diberi jaku lalau. Emmanuel, ti diau di Congo nerima jaku tangkan. Ku iya: “Bala menyadi lelaki ke tegap ba pengarap sedar kaul aku enggau Jehovah nyauka rusak. Nya alai, sida bebendar nulung aku. Aku nitihka lalau ke diberi sida lalu nya nulung aku nyeliahka mayuh penusah.” b Seiku pengerintis ke benama Megan, ti diau ba Kanada mega madahka: “Kekadang jaku lalau nya ukai utai ti deka didingaka aku, tang nya meh utai ke diguna aku.” Lalu Marko, ti diau di Croatia madahka: “Aku lenyau tanggung pengawa ba eklisia. Tang lebuh aku ngenang baru, aku sedar jaku lalau ke diterima udah nulung ngemanahka baru kaul aku enggau Jehovah.”

11. Nama dipadahka Menyadi Karl Klein pasal nerima jaku lalau?

¹¹ Menyadi Karl Klein mega nerima penguntung ketegal nitihka jaku lalau ti diberi. Iya kala nyadi seiku ari Raban ti Ngiring. Ba cherita pengidup iya, Menyadi Klein madahka iya kala nerima jaku lalau ari Joseph F. Rutherford. Seduai iya kaban ti rapat. Menyadi Klein ngaku, iya pedis ati enggau jaku lalau nya. Ku iya: ‘Lebuh betemu enggau Menyadi Rutherford, iya ngangauka aku, “Hello Karl!” Tang ketegal aku agi pedis ati, aku nyaut iya enggau  nyawa ti semadi. Rutherford madah ngagai aku, “Karl, bejimat! Sitan deka manjuk nuan!” Enggau malu aku pan nyaut iya, “Aku enda ringat enggau nuan, Menyadi Rutherford.” Tang iya nemu aku agi ringat lalu iya madah, “Nadai ngawa. Bejimat aja. Sitan deka manjuk nuan.” Utai ku iya endang amat! Lebuh kitai pedis ati enggau menyadi Kristian, kelebih agi maya iya nyebut utai ke patut, kitai meri peluang ngagai Sitan manjuk kitai.’ c (Eps. 4:25-27) Menyadi Klein nerima jaku lalau ke diberi Menyadi Rutherford, lalu seduai iya mengkang bekaban rapat.

12. Baka ni pemaruh ati ulih nulung kitai nerima jaku lalau? (Masmur 141:5)

¹² Nama ulih nulung kitai nerima jaku lalau? Kitai patut baruh ati. Kingatka, kitai enda sempurna lalu kekadang kitai ngereja utai ti beli. Baka ke udah dikerandauka kitai, Jop mega ngembuan runding ti salah. Tang udah nya, iya ngubah chara iya berunding lalu Jehovah merekatka iya. Nama kebuah? Laban Jop baruh ati. Iya nunjukka diri baruh ati lebuh iya nerima jaku lalau ke diberi Elihu ngagai iya, taja pan Elihu biak agi ari iya. (Jop 32:6, 7) Baka nya mega, kekadang kitai engka ngasaika jaku lalau enda patut diberi ngagai kitai, tauka tusah deka nerima jaku lalau ke diberi orang ke biak agi ari kitai. Tang pemaruh ati deka nulung kitai nerima jaku lalau. Seiku tuai gempuru ba Kanada madahka: “Chara kitai meda diri enda sama enggau chara orang meda kitai. Nya alai, baka ni kitai ulih ngaga pemansang enti orang nadai meri jaku lalau ngagai kitai?” Semua kitai patut ngemansangka diri ngambika ngembuan buah roh kudus Petara sereta landik agi ba pengawa nginjil enggau ngajar Berita Manah.—Bacha Masmur 141:5.

13. Nama asai ati ke patut dikembuan kitai lebuh nerima jaku lalau?

¹³ Kingatka, jaku lalau nya nunjukka pengerindu Petara. Jehovah deka utai ti pemadu badas ke kitai. (J-lam. 4:20-22) Iya nunjukka pengerindu ngagai kitai lebuh Iya meri jaku lalau nengah Bup Kudus, litaricha tauka seiku menyadi ke tegap ba pengarap. Hebrew 12:9, 10 madahka, Petara ngereja nya “ke penguntung kitai.”

14. Nama patut dikemeratka kitai lebuh diberi jaku lalau?

¹⁴ Perundingka pasal jaku lalau nya, ukai chara jaku lalau nya diberi. Kekadang kitai engka ngasaika jaku lalau ke diterima kitai tau diberi enggau chara ti manah agi. Sigi amat, orang ke meri jaku lalau patut ngereja nya enggau chara ti senang diterima. d (Gal. 6:1) Tang enti kitai ke diberi jaku lalau, kitai patut beratika  utai ke ulih dipelajar ari lalau ke diberi nya, enda ngira baka ni chara jaku lalau nya diberi ngagai kitai. Kitai ulih nanya diri empu: ‘Taja pan aku enda rindu enggau chara jaku lalau nya diberi, tang kati bisi utai ke ulih dipelajarka aku ari lalau nya? Ulih aku belajar ari jaku lalau nya lalu enda beratika pengelemi menyadi ke meri nya?’ Nya alai, manah agi enti kitai belematika jaku lalau ke diterima kitai ngambika tau bulih penguntung.—J-lam. 15:31.

15. Nama kebuah kitai patut minta jaku lalau?

¹⁵ Bup Kudus meransang kitai minta jaku lalau. Jaku Dalam 13:10 madahka: “Nuan amat pintar [‘bepenemu-dalam,’ NWT] enti nuan nemu minta jaku lalau.” Utai ke disebut ba ayat tu endang amat! Orang ke minta jaku lalau selalu iya jampat agi ngaga pemansang ari orang ke enda minta jaku lalau. Nya alai, bebendar meh minta jaku lalau.

16. Nama situasi ke begunaka kitai minta jaku lalau?

¹⁶ Ni maya kitai tau minta jaku lalau ari bala menyadi Kristian? Peratika sekeda situasi tu. (1) Seiku menyadi indu mai seiku penginjil ke udah mayuh pengalaman lebuh ngajar Bup Kudus. Udah nya iya minta jaku lalau ngambika ulih ngemansangka chara ngajar. (2) Seiku menyadi indu deka meli tanchut. Iya minta penemu ari seiku menyadi indu ke tegap ba pengarap lebuh milih tanchut ke deka dibeli. (3) Seiku menyadi lelaki keterubah iya diberi pengawa meri cheramah ba mua orang mayuh. Iya minta seiku menyadi lelaki ke mayuh pengalaman meri cheramah ningaka cheramah iya. Udah nya, iya minta jaku lalau ari menyadi nya ngambika ulih ngemansangka chara iya meri cheramah dudi hari. Indah menyadi lelaki ke udah betaun-taun meri cheramah mega ulih minta jaku lalau ari pencheramah ke bepeneleba agi. Lalu udah nya, iya tau nitihka jaku lalau ke udah diberi.

17. Baka ni kitai tau bulih penguntung ari jaku lalau?

¹⁷ Enda nemu kemaya, sekalika pagila tauka lusa, semua kitai tentu bisi nerima jaku lalau. Kitai engka bulih jaku lalau ari Bup Kudus, litaricha tauka ari menyadi Kristian ke tegap ba pengarap. Lebuh nya nyadi, kitai ulih ingat utai ke udah dipelajarka kitai ba artikel tu. Terus meh baruh ati. Kemeratka pesan ba jaku lalau nya, ukai chara jaku lalau nya diberi. Lalu titihka meh jaku lalau ke udah diterima nuan. Nadai seiku pan ari kitai ngembuan penemu-dalam kenyau ari ada. Tang lebuh kitai ‘mendingka jaku lalau, lalu nerima jaku ajar,’ Bup Kudus besemaya kitai deka “bulih penemu-dalam.”—J-lam. 19:20.