1-2. Nama sekeda penanggul ke ditapi nembiak Jehovah? Nama engka nyadi ba sida ketegal penanggul nya?

 PERATIKA utai ke nyadi ba menyadi Kristian kitai tu: Seiku menyadi lelaki ke biak kena penyakit ti raya. Seiku menyadi lelaki tengan umur ti bagas gawa udah dibuai kereja. Iya bebendar ngiga kereja tang lalu bedau bulih kereja. Seiku menyadi indu ti udah tuai majak enda ulih ngereja mayuh pengawa ke Jehovah.

² Enti sema nuan napi siti ari penanggul nya, nuan engka ngasaika diri enda beguna agi. Penanggul nya ulih ngasuh nuan tusah ati, ngembuan runding ti enda manah pasal diri empu, sereta ngeruga kaul nuan enggau orang bukai.

 3. Nama runding Sitan enggau orang ke nitihka iya pasal pengidup mensia?

³ Orang ba dunya tu ngayanka runding Sitan pasal pengidup. Sitan seruran ngumbai mensia nadai guna. Iya amat jai. Iya bebula madahka, Awa deka bibas enti Awa enda ngasika Petara taja pan Sitan nemu Awa deka mati enti enda ngasi. Sitan seruran nguasa pengawa dagang, politik, sereta jalai pengarap ba dunya tu. Nya kebuah mayuh orang dagang, bala pemerintah, enggau bala tuai pengarap mega enda bebasaka nyawa mensia sereta enda ibuhka asai ati orang.

 4. Nama deka dikerandauka kitai ba artikel tu?

⁴ Tang Jehovah enda baka Sitan. Jehovah deka kitai nemu, kitai beguna ba Iya. Iya mega nulung kitai napi sebarang utai  ke ngasuh kitai ngasaika diri enda beguna. (Mas. 136:23; Rom. 12:3) Artikel tu deka berandauka baka ni Jehovah nulung kitai napi pekara tu: (1) Lebuh kitai sakit, (2) lebuh kitai bisi penanggul ba penatai pemisi, enggau (3) lebuh umur ke majak tuai ngasuh kitai berasai enda beguna ngereja pengawa ke Jehovah. Tang sebedau nya, aram kitai berandauka kebuah kitai ulih andalka tiap iku kitai beguna ba Jehovah.

 5. Nama nunjukka mensia berega ba Jehovah?

⁵ Taja pan kitai ditempa ari amau tanah, tang ba Jehovah kitai amat berega. (P-kal. 2:7) Peratika sekeda kebuah ke nulung kitai arapka pekara tu. Iya nempa mensia ngambika ulih neladan kualiti Iya. Nya alai mensia ditempa manah agi ari utai bukai ke bisi ba dunya tu. (P-kal. 1:27) Iya mega ngasuh mensia nyaga dunya enggau jelu.—Mas. 8:4-8.

 6. Nama utai bukai ke nunjukka mensia ti enda sempurna berega ba Jehovah?

⁶ Indah pengudah Adam bedosa, Jehovah agi ngumbai mensia berega. Ketegal nya Iya meri anak ti dikesayauka Iya, Jesus, nyadika tebus kena ngelepaska kitai ari dosa. (1 Jhn. 4:9, 10) Nengah tebus Jesus, Jehovah deka ngidupka baru “orang ke lurus enggau ke enda lurus” ti udah mati ketegal dosa Adam. (SKR. 24:15) Bup Kudus nunjukka kitai berega ba Jehovah taja pan kitai sakit, seranta, tauka udah tuai.—SKR. 10:34, 35.

 7. Nama kebuah bukai ke ngasuh nembiak Jehovah pechayaka diri berega ba Iya?

⁷ Bisi kebuah bukai mega ke ngasuh kitai pechaya kitai tu berega ba Jehovah. Iya udah mai kitai semak ngagai Iya lalu beratika baka ni kitai udah nerima berita manah ari Bup Kudus. (Jhn. 6:44) Lebuh kitai berengkah ngerapatka kaul enggau Jehovah, Iya pan deka semak enggau kitai. (Jas. 4:8) Jehovah mega ngena awak sereta bebendar ngajar kitai, kena nunjukka kitai tu berega ba Iya. Iya ngelala tiap iku kitai lalu nemu baka ni kitai ulih ngemansangka diri. Iya mega deka ngerara kitai laban Iya sayauka kitai. (J-lam. 3:11, 12) Semua tu nunjukka kitai berega ba Jehovah!

 8. Baka ni jaku ba Masmur 18:27-29 ulih nulung kitai lebuh napi penanggul?

⁸ Sekeda orang ngumbai Raja David nya nadai guna, tang iya nemu Jehovah rindu ke iya lalu deka nulung iya. Tu nulung Raja David bisi runding ti positif lalu ulih betan napi penanggul. (2 Sam. 16:5-7) Pia mega enggau kitai kemayaharitu. Lebuh kitai berasai lemi tauka napi penanggul, Jehovah ulih nulung kitai ngembuan runding ti positif ngambika ulih betan. (Bacha Masmur 18:27-29.) Enti Jehovah nulung kitai, nadai utai ke ulih nekul kitai ari nyembah Iya enggau gaga ati. (Rom. 8:31) Diatu aram kitai berandauka tiga iti pekara ke ulih nulung kitai nemu, Jehovah rindu ke kitai lalu kitai berega ba Iya.

 9. Baka ni penyakit ulih ngachau emosi kitai?

⁹ Penyakit ulih ngachau emosi lalu ngasuh kitai ngasaika diri enda agi beguna. Kitai engka berasai malu lebuh orang nemu pengurang ke bisi ba kitai tauka lebuh kitai patut bepanggai ba tulung ari orang bukai. Indah lebuh orang enda nemu pasal kitai ke sakit, kitai engka belaban enggau asai ati ti malu laban kitai enda ulih ngereja sekeda pengawa baka ke udah. Ba maya ke baka tu, Jehovah deka meransang kitai. Baka ni Iya ngereja nya?

10. Nitihka Jaku Dalam 12:25, nama ulih nulung kitai lebuh kitai sakit?

¹⁰ Lebuh kitai sakit, “jaku ti siru” ulih ngelantangka ati. (Bacha Jaku Dalam 12:25.)  Dalam Bup Kudus, Jehovah udah madah mayuh utai ti manah kena ngingatka kitai tu berega ba Iya, taja pan kitai sakit. (Mas. 31:19; 41:3) Enti kitai suah macha Bup Kudus, Jehovah deka nulung kitai mutarka ati ti irau ketegal kitai sakit.

11. Baka ni seiku menyadi Kristian lelaki bulih tulung ari Jehovah?

¹¹ Peratika utai ke nyadi ba Jorge. Iya agi biak tang kena penyakit ti raya ke ngasuh iya majak lemi. Penyakit nya ngasuh iya berasai enda beguna. Ku iya madahka: “Penyakit aku balat ngachau tubuh enggau emosi aku. Tu ngasuh orang udu beratika aku. Aku empai sedia napi tu. Ketegal penyakit aku majak balat, pengidup aku tentu deka tusah agi. Ngenang nya ngasuh ati aku balat tusah lalu aku minta Jehovah nulung aku.” Baka ni Jehovah nulung Jorge? Ku iya madah: “Ketegal mayuh berunding, aku semina macha beberapa iti ayat aja ari bup Masmur. Ayat nya nunjukka Jehovah ibuhka nembiak Iya. Aku suah macha ayat nya ninting hari lalu bulih pengelantang ba ati. Nyau kelama, orang beratika aku suah agi tuchum. Indah sida madahka runding aku ti positif meransang sida. Ari nya aku nemu, Jehovah udah nyaut sampi aku! Iya udah nulung aku ngubah runding pasal diri empu. Aku berengkah beratika utai ke dipadah Bup Kudus bekaul enggau runding Iya pasal aku, taja pan aku sakit.”

12. Enti nuan bisi penyakit ti raya, baka ni nuan ngulihka tulung ari Jehovah?

¹² Enti nuan napi penyakit ti raya, kingatka meh, Jehovah nemu utai ke ditapi nuan. Minta Iya nulung nuan ngambika ulih ngembuan runding ti positif pasal diri empu. Udah nya, giga ayat ke ulih ngelantangka ati ba Bup Kudus. Peratika ayat ke nunjukka Jehovah ngumbai nembiak Iya berega. Lebuh nuan ngereja nya, nuan ulih meda Jehovah endang  manah ngagai semua orang ke nyembah Iya enggau tetap ati.—Mas. 84:11.

13. Baka ni asai ati tuai bilik enti iya lenyau kereja?

¹³ Tuai bilik deka nyediaka utai ti diguna diri sebilik. Tang baka ni enti menyadi Kristian ke lelaki ti nyadi tuai bilik dibuai kereja taja pan iya nadai ngereja nama-nama penyalah? Iya bebendar ngiga kereja tang lalu bedau bulih kereja. Ketegal napi penanggul tu, iya engka ngasaika diri enda beguna. Baka ni betatika semaya Jehovah ulih nulung iya?

14. Nama kebuah Jehovah deka ngamatka semaya Diri?

¹⁴ Jehovah seruran ngamatka semaya Diri. (Jos. 21:45; 23:14) Lalu Iya bisi kebuah ngereja nya. Keterubah, nya bekaul enggau nama Iya. Jehovah udah besemaya deka nyediaka utai ti diguna nembiak ke taluk, lalu Iya ngasaika patut ngamatka semaya Diri. (Mas. 31:1-3) Nambahka nya, Jehovah nemu kitai deka tusah ati sereta berasai asa enti Iya enda ibuhka kitai ke nyadi sebagi ari ruang bilik Iya. Iya besemaya deka nyediaka utai ke diguna kitai ba pengidup besehari-sehari sereta ba pengarap. Lalu nadai utai ulih nekul Iya ari ngamatka semaya nya!—Mat. 6:30-33; 24:45.

15. (a) Nama penanggul ke ditapi bala menyadi Kristian ba abad keterubah? (b) Nama ulih dipechaya kitai ari semaya ke disebut ba Masmur 37:18, 19?

¹⁵ Lebuh kitai nemu kebuah Jehovah deka ngamatka semaya Diri, kitai pechaya Iya deka nulung lebuh kitai napi penanggul ba penatai pemisi. Peratika chunto bala menyadi Kristian ba Jerusalem maya abad keterubah. Lebuh sida kena perinsa, sida pambar ngagai endur bukai. Tang bala rasul Jesus mengkang ba Jerusalem. (SKR. 8:1) Pikirka penanggul ke ditapi sida. Sida nadai penatai pemisi! Sida tentu lenyau rumah, kereja, enggau pengawa  dagang. Tang Jehovah enda ninggalka sida lalu sida mega enda lenyau pengaga ati. (SKR. 8:4; Heb. 13:5, 6; Jas. 1:2, 3) Jehovah nulung sida ke tetap ati nya, lalu Iya mega deka nulung kitai.—Bacha Masmur 37:18, 19.

16. Nama ke engka ngasuh kitai ngumbai sembah kitai ngagai Jehovah enda beguna agi?

¹⁶ Lebuh kitai majak tuai, kitai engka berengkah ngasaika diri enda ulih ngereja mayuh agi ke Jehovah. Raja David engka ngasaika tu lebuh iya majak tuai. (Mas. 71:9) Baka ni Jehovah nulung kitai?

17. Nama ulih dipelajarka kitai ari Menyadi Jheri?

¹⁷ Peratika utai ke nyadi ba seiku menyadi Kristian indu ke benama Jheri. Iya dikangau ngagai kelas ke bekaul enggau pengawa nyeruri bengunan teokratik ba Palan Gempuru, tang iya enggai enggau. Ku iya madah: “Aku udah tuai, balu, lalu nadai pengelandik ba pengawa nyeruri. Nadai Jehovah ulih ngena aku.” Malam sebedau kelas nya berengkah, iya bebendar besampi ngagai Jehovah. Hari siti, lebuh datai ba Palan Gempuru, iya agi berunding sekalika iya patut enggau kelas nya. Lebuh kelas nya benung dipejalaika, seiku pencheramah madahka pengelandik ke pemadu beguna iya nya, kitai deka diajar Jehovah. Ku Jheri ngenang: “Ba runding aku, ‘Aku bisi pengelandik ba nya!’ Aku berengkah nyabak lebuh nemu Jehovah nyaut sampi aku. Iya deka aku nemu, aku bisi utai ti berega ke tau diberi ngagai Iya lalu Iya deka ngajar aku ngereja pengawa ti beguna!” Lebuh ngenang baru, ku Jheri madah: “Aku berasai takut, enda diperansang sereta lemi lebuh datai ngagai kelas nya. Tang pengudah kelas nya, aku andalka diri empu, berasai diperansang, lalu ngasaika diri beguna ba Jehovah.”

18. Baka ni Bup Kudus nunjukka Jehovah mengkang ngumbai sembah kitai ngagai Iya beguna taja pan kitai majak tuai?

 ¹⁸ Lebuh kitai majak tuai, kitai pechaya Jehovah agi bisi pengawa ke deka diasuh Iya gaga kitai. (Mas. 92:12-15) Jesus bisi ngajar, taja pan utai ke ulih digaga kitai nya baka ke mit ba kitai, tang ba Jehovah nya beguna bendar. (Luk. 21:2-4) Nya alai gaga utai ke ulih digaga nuan. Ambika chunto, nuan ulih berandau pasal Jehovah, besampika bala menyadi Kristian, sereta meransang orang bukai mengkang tetap ati. Jehovah ngumbai nuan orang ke sama bekereja enggau Iya ketegal nuan deka ngasika Iya, ukai ketegal pengawa ke ulih digaga nuan.—1 Kor. 3:5-9.

19. Nama semaya ke bisi disebut ba Rome 8:38, 39?

¹⁹ Kitai gaga ati ulih nyembah Jehovah laban Iya Petara ti ngumbai nembiak Iya beguna sereta berega! Iya nempa kitai ngambika ngereja peneka Iya, lalu sembah ti bendar ngagai Iya ke ngasuh kitai gaga ati. (Pem. 4:11) Taja pan orang ba dunya engka ngumbai kitai enda beguna, tang Jehovah enda ngumbai kitai baka nya. (Heb. 11:16, 38) Kingatka meh, lebuh kitai berasai lemi ketegal sakit, bisi penanggul ba penatai pemisi, tauka majak tuai, nadai utai ke ulih nyeraraka kitai ari pengerindu Jehovah.—Bacha Rome 8:38, 39.