BA MUZIUM Bible Lands di Jerusalem, bisi siti lampang batu ti ngundan tulis ti digaga entara taun 700-600 Sebedau Masihi. Batu nya ditemu ba dalam gua ke dikena ngubur orang, enda jauh ari Hebron di Israel. Tulis ba atas batu nya: “Tulah meh Hagaf anak Hagav ku Yahweh Sabaot.” Baka ni utai ke ditulis tu nyukung utai ku Bup Kudus? Tu nunjukka ba maya jeman Bup Kudus, nama Petara Jehovah, ke ditulis ngena urup Hebrew YHWH udah dikelala sereta dikena ba pengidup besehari-hari. Ba maya nya, orang suah betemu enggau pangan diri tauka belalai ba gua ke dikena ngubur orang mati. Tulis bukai ke ditemu ba dinding gua ke baka nya nunjukka sida seruran nulis nama Petara sereta nama diri empu ti bekaul enggau nama Petara.

Ku Dr. Rachel Nabulsi ari University of Georgia madah pasal utai ke ditulis tu: “Nama YHWH seruran dikena ba utai ke ditulis. Tu ngajar kitai mayuh utai. . . . Tulis tu nunjukka nama YHWH seruran dikena ba pengidup orang Israel sereta Judah.” Tu nyukung utai ku Bup Kudus, iya nya nama Petara YHWH ke ditulis ngena urup Hebrew ayan beribu kali. Suah agi nama orang nya empu bisi nyengkaum nama Petara.

Leka jaku “Yahweh Sabaot,” ke ditulis ba atas batu nya mai reti “Jehovah ti Pemadu Bekuasa.” Tu nunjukka orang ba jeman Bup Kudus suah ngena nama Petara sereta rambai jaku “Jehovah ti Pemadu Bekuasa.” Tu nyukung Bup Kudus ke ngena rambai jaku “Jehovah ti Pemadu Bekuasa” 283 kali ba teks asal Sempekat Lama ke suah agi dikena Isaiah, Jeremiah, enggau Sekariah.