1-2. (a) Nama utai ke engka diasaika kitai lebuh berunding pasal pengidup sereta pengawa nginjil Jesus? (b) Nama deka dikerandauka kitai dalam artikel tu?

 LEBUH orang ti dikesayauka kitai nadai, kitai amat lelengauka iya! Terubah iya, kitai engka berasai amat tusah ati lebuh ngenang baru maya sebedau orang ti dikesayauka kitai nadai, kelebih agi lebuh orang ti dikesayauka kitai merinsa sebedau iya nadai. Taja pia, pengudah sesiti timpuh, kitai engka berasai gaga ati baru lebuh kitai ngenang pasal utai ke udah diajar iya ngagai kitai tauka pasal utai ti dipadah tauka dikereja iya kena meransang kitai tauka ngasuh kitai gaga ati.

² Baka nya mega, kitai berasai tusah ati lebuh macha pasal pemerinsa enggau pemati Jesus. Kelebih agi maya musin Ngingatka Pemati Jesus, kitai deka ngena awak berunding pasal pemesai reti genselan tebus Jesus. (1 Kor. 11:24, 25) Taja pia, kitai berasai gaga ati lebuh berunding pasal semua utai ke disebut sereta dikereja Jesus lebuh iya ba dunya. Kitai mega diperansang lebuh kitai berunding pasal utai ti benung dikereja iya diatu sereta utai ti deka dikereja iya ke kitai jemah ila. Belematika semua utai tu sereta pengerindu iya ke kitai ulih meransang kitai ngayanka asai ati ti beterima kasih nengah chara ti praktikal, baka ke deka dipeda kitai dalam artikel tu.

 3. Nama kebuah kitai beterima kasih ke genselan tebus?

³ Kitai berasai beterima kasih lebuh kitai berunding pasal pengidup sereta pemati Jesus. Lebuh Jesus ba dunya, iya ngajar orang pasal utai ti manah ti deka dikereja Perintah Petara. Kitai rindu enggau utai ti diajar Bup Kudus pasal genselan tebus sereta utai ti manah ke datai ari genselan tebus nya. Kitai amat  beterima kasih ke genselan tebus laban genselan tebus nya muka jalai ngambika kitai tau bulih kaul ti rapat enggau Jehovah enggau Jesus. Sida ke arapka Jesus mega bisi harapan idup belama iya sereta ulih betemu baru enggau orang ti dikesayauka sida ke udah nadai. (Jhn. 5:28, 29; Rom. 6:23) Nadai utai ti dikereja kitai ke ngasuh kitai layak nerima berekat tu. Kitai mega enda ulih malas utai ti udah dikereja Jehovah enggau Kristus ke kitai. (Rom. 5:8, 20, 21) Tang kitai ulih nunjukka pemesai asai ati ti beterima kasih ngagai seduai iya. Baka ni?

 4. Baka ni Maria Magdalin ngayanka diri beterima kasih ke utai ti udah dikereja Jesus ke iya? (Peda gambar.)

⁴ Peratika teladan siku indu bansa Judah ke benama Maria Magdalin. Iya amat merinsa laban tujuh iku melikat ti jai benung merinsa iya. Iya tentu ngasaika nadai orang ulih nulung iya. Nya alai, gambarka asai ati iya lebuh Jesus ngelepaska iya ari bala melikat ti jai nya! Maria Magdalin amat beterima kasih lalu tu meransang iya nyadi murid Jesus sereta ngena awak, pengering, enggau utai ti dikemisi iya kena nyukung Jesus ba pengawa nginjil. (Luk. 8:1-3) Taja pan Maria amat beterima kasih ke utai ti udah dikereja Jesus ke iya, tang iya engka bedau nemu pasal utai bukai ti besai agi ti deka dikereja Jesus ke iya jemah ila. Jesus deka nyerahka pengidup iya ke mensia ‘ngambika genap iku orang ke arapka iya’ ulih ngembuan pengidup ti meruan belama iya. (Jhn. 3:16) Taja pia, Maria agi ngayanka diri beterima kasih ke Jesus enggau mengkang tetap ati. Lebuh Jesus merinsa ba tiang perinsa, Maria bediri semak dia laban iya ibuhka Jesus sereta deka ngelantangka ati orang bukai ke bisi dia. (Jhn. 19:25) Pengudah Jesus mati, Maria enggau dua iku indu ke bukai mai rempah ngagai kubur Jesus lalu ngunsut rempah nya ba bangkai Jesus. (Mrk. 16:1, 2) Jehovah meri Maria berekat ti besai laban iya tetap ati ngagai Jesus. Jesus betemu sereta berandau enggau Maria pengudah Jesus diangkatka idup baru. Mimit aja bala murid iya ke bisi peluang ti baka nya.—Jhn. 20:11-18.

 5. Baka ni kitai ulih ngayanka diri beterima kasih ke semua utai ti udah dikereja Jehovah enggau Jesus ke kitai?

 ⁵ Kitai mega ulih ngayanka diri beterima kasih ke semua utai ti udah dikereja Jehovah enggau Jesus ke kitai. Kitai ulih ngena awak, pengering enggau duit kitai kena gawa ke Jehovah. Ambika chunto, kitai ulih nulung nirika bengunan ti dikena nyembah Jehovah sereta nentuka bengunan nya dijaga.

 6. Nama kebuah kitai ulih ngumbai genselan tebus nya pemeri ke tiap iku kitai?

⁶ Lebuh kitai berunding pasal pemesai pengerindu Jehovah enggau Jesus ke kitai, kitai mega deka diperansang rinduka seduai iya. (1 Jhn. 4:10, 19) Kitai deka rindu agi ke seduai iya lebuh kitai nemu Jesus mati ke tiap iku kitai. Rasul Paul ngaku utai tu lalu ngayanka asai ati iya ti beterima kasih lebuh iya nulis ngagai bala menyadi ba Galatia: “Anak Petara . . . rinduka aku sereta udah nyerahka nyawa diri ke aku.” (Gal. 2:20) Ketegal Jesus mati ke kitai, Jehovah ulih mai kitai datai semak ngagai Iya ngambika kitai ulih nyadi pangan Iya. (Jhn. 6:44) Ati kitai amat ditegu lebuh nemu Jehovah bisi meda utai ti manah ba kitai lalu iya udah mayar rega ti besai ngambika kitai ulih dikumbai pangan Iya. Tu negapka agi pengerindu kitai ke Jehovah enggau Jesus. Nya alai, kitai patut nanya diri empu, ‘Pengerindu nya deka meransang aku ngereja nama?’

 7. Baka ke dipeda ba gambar, baka ni semua kitai ulih ngayanka pengerindu kitai ke Jehovah enggau Jesus? (2 Korint 5:14, 15; 6:1, 2)

⁷ Pengerindu kitai ke Jehovah enggau Kristus meransang kitai ngayanka pengerindu ngagai orang bukai. (Bacha 2 Korint 5:14, 15; 6:1, 2.) Siti chara kitai ngayanka pengerindu iya nya, ransing ba pengawa nginjil. Kitai bejaku enggau semua orang ke ditemu kitai. Kitai enda nyeliah ari bejaku ngagai sesiku orang ketegal sida datai ari bansa ti bebida. Pia mega kitai  bejaku ngagai semua orang enda ngira sekalika sida kaya sereta bepelajar tauka miskin sereta enda bepelajar. Enggau chara tu kitai deka gawa sejalai enggau tuju Jehovah ti “dekaka semua macham orang diselamatka sereta bulih penemu ti betul pasal pemendar.”—1 Tim. 2:4.

 8. Baka ni kitai ulih ngayanka pengerindu ngagai bala menyadi Kristian kitai?

⁸ Kitai mega ngayanka pengerindu kitai ke Jehovah sereta Kristus lebuh kitai ngayanka pengerindu ngagai bala menyadi Kristian. (1 Jhn. 4:21) Kitai amat ibuhka utai ti diguna sida sereta nulung sida lebuh sida napi penanggul. Kitai ngelantangka ati sida lebuh sida lenyau orang ti dikesayau, ngabas sida lebuh sida sakit, lalu bebendar meransang sida lebuh sida tusah ati. (2 Kor. 1:3-7; 1 Tes. 5:11, 14) Kitai terus besampika sida laban kitai nemu “sampi ke disebut orang ke lurus enggau bebendar, bisi kesan ti besai.”—Jas. 5:16.

 9. Nama siti agi chara kitai ulih ngayanka pengerindu ngagai bala menyadi Kristian kitai?

⁹ Kitai mega ngayanka pengerindu ngagai bala menyadi Kristian kitai lebuh kitai bebendar ngetanka kaul ti manah enggau sida. Kitai nguji neladan chara Jehovah ngampun orang bukai. Jehovah sanggup ngawakka Anak Iya mati ke dosa kitai. Nya alai, kitai patut sanggup ngampunka bala menyadi Kristian lebuh sida ngereja penyalah ngagai kitai. Kitai tentu enggai nyadi baka siku ulun ti jai ke bisi dipadah ba siti ari sempama Jesus. Taja pan tuan iya udah muai utang iya, tang ulun nya enda ngampun siku ulun ke bukai ke berutang mimit aja enggau iya. (Mat. 18:23-35) Enti nuan bisi salah faham enggau sesiku orang dalam raban gempuru, ulih nuan dulu bebaik enggau iya sebedau enggau pengawa Ngingatka Pemati Jesus? (Mat. 5:23, 24) Enti nuan ngereja nya, nuan nunjukka diri bisi pengerindu ti besai ngagai Jehovah enggau Jesus.

10-11. Baka ni bala tuai gempuru ulih ngayanka pengerindu ngagai Jehovah enggau Jesus? (1 Peter 5:1, 2)

¹⁰ Baka ni bala tuai gempuru ulih ngayanka pengerindu ngagai Jehovah enggau Jesus? Siti chara ti penting iya nya, ngibun bala bedus Jesus. (Bacha 1 Peter 5:1, 2.) Jesus madahka utai tu enggau terang lebuh iya bejaku ngagai rasul Peter. Pengudah Peter madahka diri enda ngelala Jesus tiga kali, Peter engka keran deka nunjukka diri rinduka Jesus. Pengudah Jesus diangkatka idup baru, iya nanya Peter: “Simon anak John, kati nuan sayauka aku?” Kitai nemu Peter tentu deka ngereja sebarang utai kena nunjukka pengerindu iya ngagai Tuan iya. Jesus madah ngagai Peter: “Ibun bala anak bedus aku.” (Jhn. 21:15-17) Lalu nyentuk ngagai pengujung pengidup iya, Peter enggau bepengerindu ngintu bala bedus Jesus. Tu nunjukka iya bisi pengerindu ngagai Jesus.

¹¹ Bala tuai gempuru, ba musin Ngingatka Pemati Jesus, baka ni nuan ulih nunjukka jaku Jesus ngagai Peter nya penting ba nuan? Nuan ulih nunjukka pemesai pengerindu nuan ngagai Jehovah enggau Jesus enti nuan meri awak meransang bala menyadi Kristian sereta ngereja mayuh agi kena nulung bala menyadi ke enda aktif pulai baru ngagai Jehovah. (Esk. 34:11, 12) Nuan mega ulih nguji meransang pemelajar Bup Kudus sereta orang bukai ti bisi minat ke datai ngagai pengawa Ngingatka Pemati Jesus. Kitai dekaka sida berasai diterima lebuh sida datai laban kitai arap sida mega deka nyadi murid Jesus.

12. Nama kebuah berundingka utai ti disebut Jesus ba malam sebedau iya mati meri kitai pemerani? (John 16:32, 33)

¹² Ba malam sebedau Jesus mati, iya madah ngagai bala murid iya: “Kita deka napi  penusah ti balat ba dunya tu, tang anang takut! Aku udah ngalahka dunya.” (Bacha John 16:32, 33.) Nama udah nulung Jesus ngayanka pemerani lebuh bala munsuh ngemba iya? Lalu nama nulung iya mengkang tetap ati nyentukka mati? Iya bepanggai ba Jehovah. Jesus nemu bala murid iya deka napi penguji ti sama. Nya alai, iya minta Jehovah nyaga sida. (Jhn. 17:11) Nama kebuah tu meri kitai pemerani? Laban Jehovah kering agi ari semua munsuh kitai. (1 Jhn. 4:4) Jehovah meda semua utai. Kitai andal enti kitai bepanggai ba Jehovah, Iya ulih nulung kitai napi asai ati ti takut lalu nulung kitai ngayanka pemerani.

13. Baka ni Josep ari Arimatea ngayanka pemerani?

¹³ Peratika chunto Josep ari Arimatea. Orang Judah amat bebasaka iya. Iya siku ari Raban Kunsil Orang Judah. Tang, lebuh Jesus bejalaika pengawa nginjil ba dunya, Josep enda ngayanka pemerani. John madahka, Josep nya murid Jesus “tang iya enda madah ngagai orang bukai pasal nya laban iya takutka orang Judah.” (Jhn. 19:38) Taja pan Josep bisi minat ngagai pesan pasal Perintah Petara, tang iya ngelalaika pengarap iya ngagai Jesus ari orang bukai. Iya engka takut enggaika orang bukai enda bebasaka iya agi enti sida nemu iya udah nyadi murid Jesus. Tang Bup Kudus madahka, pengudah Jesus mati, Josep “meranika diri betemu enggau Pilate, lalu minta bangkai Jesus.” (Mrk. 15:42, 43) Josep enda agi belalai pasal iya ke nyadi murid Jesus.

14. Nama patut digaga nuan enti nuan benung belaban enggau asai ati ti takut ke mensia?

¹⁴ Kala nuan takut ke mensia baka Josep? Ba sekula tauka endur gawa, kati nuan kekadang berasai malu deka madahka diri siku ari Saksi-Saksi Jehovah? Kati nuan kakang ati deka nyadi penginjil tauka deka dibaptisa laban nuan irauka runding orang bukai pasal nuan? Anang nejuka asai ati nya nagang nuan ari ngereja utai ke ditemu nuan betul. Bebendar meh besampi ngagai Jehovah. Minta Iya meri nuan pemerani kena ngereja peneka Iya. Seraya nuan meda chara Jehovah nyaut sampi nuan, nuan deka nyadi kering sereta berani agi.—Isa. 41:10, 13.

15. Pengudah Jesus pegari ba mua bala murid iya, pengaga ati sida meransang sida ngereja nama? (Luke 24:52, 53)

¹⁵ Bala murid Jesus amat tusah ati lebuh iya mati. Gambarka nuan ba situasi sida. Sida ukai semina lenyau kaban ti dikesayau tang sida mega ngasaika diri udah lenyau harapan. (Luk. 24:17-21) Taja pia, lebuh Jesus pegari ba  mua sida, iya ngena awak nulung sida meretika baka ni iya ngamatka jaku benabi dalam Bup Kudus. Iya mega meri sida pengawa ti penting. (Luk. 24:26, 27, 45-48) Lebuh Jesus niki ke serega 40 hari udah nya, bala murid iya enda agi tusah ati tang sida amat gaga ati. Sida amat gaga ati laban sida nemu Jesus udah diangkatka idup baru lalu iya deka nulung sida ngereja pengawa ti udah diberi iya ngagai sida. Pengaga ati sida meransang sida terus muji Jehovah.—Bacha Luke 24:52, 53; SKR. 5:42.

16. Baka ni kitai ulih neladan bala murid Jesus?

¹⁶ Baka ni kitai ulih neladan bala murid Jesus? Kitai ulih tetemuka pengaga ati lebuh nyembah Jehovah ukai semina ba musin Ngingatka Pemati Jesus tang mega sepemanjai taun. Kena ngereja tu kitai patut ngenuluka Perintah Petara dalam pengidup kitai. Ambika chunto, mayuh orang udah ngubah jadual kereja sida ngambika ulih nginjil, datai begempuru, sereta belajarka Bup Kudus ba diri sebilik enggau tetap. Sekeda orang engka ngumbai ngembuan reta tengkira nya deka nulung sida nyadi beguna agi ba raban gempuru tauka ulih ngagai endur ke begunaka mayuh agi penginjil. Tang ke bukai enda setuju enggau penemu tu lalu sida milih enggai ngembuan reta tengkira ti baka nya. Taja pan kitai begunaka pengeliat ati kena terus nyembah Jehovah tang Iya besemaya deka meri kitai berekat ti besai enti kitai ngenuluka peneka Perintah Petara ba pengidup kitai.—Jlam. 10:22; Mat. 6:32, 33.

17. Nama utai ti keran deka digaga nuan ba musin Ngingatka Pemati Jesus taun tu? (Peda gambar.)

¹⁷ Kitai enda sabar deka ngintu pengawa Ngingatka Pemati Jesus kena Hari Dua, 4 April. Taja pia, anang nganti nyentuk ngagai hari nya baru nuan deka berunding pasal pengidup enggau pemati Jesus sereta pengerindu ke udah diayanka iya enggau Jehovah ngagai kitai. Kena meh tiap iti peluang ba musin Ngingatka Pemati Jesus kena berunding pasal nya. Ambika chunto, tetapka awak kena macha sereta belematika utai ke nyadi baka ke ditulis ba carta “Minggu Jesus ti Penudi ba Dunya (Begian 1 enggau 2),” ke bisi ba Bup Kereja Kena Gempuru Pengidup enggau Pengawa Kristian Kitai kena bulan September 2019. Lebuh nuan macha pasal pengidup Jesus, giga meh ayat Bup Kudus ti ulih negapka asai ati nuan ti beterima kasih, pengerindu, pemerani, sereta pengaga ati nuan. Udah nya, giga chara ti nyemetak kena nuan ngayanka asai ati ti beterima kasih. Nuan ulih andal Jesus deka beterima kasih ke semua utai ti udah dikereja nuan kena ngingatka iya maya musin Ngingatka Pemati Jesus.—Pem. 2:19.