Chara Belajarka Bup Kudus Enggau Mujur sereta Ngerinduka Ati

TEBAH

JOSUA patut nguluka bansa Israel tama ngagai Menua ti Udah Disemaya. Tu enda senang. Taja pia, Jehovah meransang sereta ngeringka iya. Ku Jehovah madahka: “Anang enda kering sereta berani.” Jehovah madahka, Josua deka ngaga pemutus ti manah sereta ulih mujur enti iya macha sereta ngasika Adat.—Josua 1:7, 8.

Kitai idup ba ‘hari ti penudi ke mayuh macham penusah,’ nya alai pengidup kitai mega tusah. (2 Timoti 3:1) Enti kitai deka mujur baka Josua, kitai patut nitihka jaku ajar ke diberi Jehovah ngagai Josua. Kitai patut seruran macha Bup Kudus lalu ngena utai ti dipelajarka kitai ngambika ulih ngaga pemutus ti manah.

Sekeda ari kitai engka enda nemu chara belajarka Bup Kudus, tauka kitai engka enda rindu belajar. Tang, belajarka Bup Kudus kediri empu nya amat beguna. Seraya nuan meda kutak “ Kena Meh Chara Tu,” nuan deka tetemuka chara ke ulih nulung nuan bulih penguntung sereta rindu agi belajarka Bup Kudus.

Pemasmur belagu: “Iring aku nitihka pesan Nuan, laban aku rinduka iya.” (Masmur 119:35) Nuan mega ulih rindu belajarka Jaku Petara. Nuan deka bulih mayuh penemu ti manah seraya nuan majak belajarka Bup Kudus.

Taja pan nuan nadai nguluka siti bansa baka ke digaga Josua, tang nuan bisi penanggul diri empu. Nya alai, baka Josua, belajar sereta ngasika Jaku Petara. Enti nuan ngereja tu, nuan ulih ngaga pemutus ti manah lalu mujur.

KENA MEH CHARA TU

Besampi sebedau nuan belajar. Bup Kudus ngundan runding Jehovah, lalu ditulis ke penguntung nuan. Nya alai lebuh nuan macha Bup Kudus, minta Jehovah nulung nuan meretika utai ti dibacha nuan, ingatka iya, sereta ngena iya ngaga pemutus ti manah ba pengidup.—Esra 7:10.
Tanya diri empu lebuh nuan macha Bup Kudus tauka litaricha Bup Kudus. Ambika chunto: ‘Nama utai ti dipadah ba begian bup tu pasal Jehovah? Baka ni iya bekaul enggau tema Bup Kudus? Baka ni aku ulih ngena penemu nya nulung orang bukai?’
Belematika utai ti dibacha nuan. Ngetu enda lama, lalu berundingka utai ti udah dibacha nuan. Tanya diri empu: ‘Nama asai ati aku pasal utai ke dibacha aku? Nama kebuah iya ulih ngasuh aku berasai baka nya? Baka ni iya bisi kaul enggau utai ke udah nyadi ba aku suba, utai ke nyadi ba aku diatu, tauka utai ke engka nyadi ba aku jemah ila? Baka ni aku ulih ngena prinsip Bup Kudus tauka jaku lalau nya ba pengidup aku?’ (Jop 23:5; Masmur 49:3) Lebuh nuan belemati, uji pikirka nama kebuah Jehovah ngasuh nembiak Iya nyeliahka sekeda utai. Tauka pikirka nama penyadi enti orang ke dibacha nuan dalam Bup Kudus enda ngereja utai baka ti diasuh Jehovah.—Ulang Adat 32:28, 29.
Uji gambarka lebuh macha. Ambika chunto, ulih nuan ngambarka utai ke nyadi ba Josep lebuh bala menyadi iya nyual iya ngagai orang Ismail? (Pemungkal 37:18-28) Nama utai ke dipeda nuan? Didinga nuan? Sereta bau ke ulih disium nuan? Uji gambarka nuan nya seiku ari sida. Nama runding enggau asai ati sida? Lebuh nuan ngambarka utai nya, pengawa belajarka Bup Kudus deka meri nuan mayuh agi penguntung.
Kena perengka belajarka Bup Kudus ke udah disediaka gerempung kitai. Perengka tu ulih nulung nuan ngiga pansik. Pelajarka meh chara ngena perengka ke udah bisi dalam bansa jaku nuan, sekalika nengah online tauka dichelak. Ngambika ulih nemu baka ni ngena perengka tu enggau manah, nuan ulih minta orang ngajar nuan. Ambika chunto, Watchtower LIBRARI ONLINE tauka Bup Dikena Saksi-Saksi Jehovah Ngiga Pansik deka nulung nuan nemu utai ke udah ditulis pasal sekeda subjek sereta bisi nerangka mayuh ayat Bup Kudus. Nuan ulih macha apendiks New World Translation of the Holy Scriptures enti nya bisi dalam bansa jaku nuan. Apendiks ngembuan penerang ke beguna pasal geografi, kronologi, timbang enggau takar, sereta subjek ti bukai.
Kelansa batang pekara. Tu ulih nulung nuan ngingatka utai ke baru udah dipelajarka nuan. Tang manah agi, enti ulih bekunsika utai ti udah dipelajarka nuan enggau orang bukai. Kati bisi utai ke ulih dikena nuan ba pengawa nginjil? Enggau tu, nuan ulih ingatka batang pekara nya, lalu orang bukai mega bulih penguntung ari utai ti udah dipelajarka nuan.