1-2. (a) Nama kebuah kitai enda patut tekenyit lebuh sembah kitai ngagai Jehovah ditagang? (b) Nama deka dipejuraika kitai ba artikel tu?

 BA TAUN 2018, lebih ari 223,000 iku menyadi Kristian kitai diau ba menua ke alai pengawa kitai ditagang tauka balat disekat. Tu enda ngenyitka ati. Baka ke udah dipelajar ba artikel sebedau tu, sida ke nyembah Jehovah nemu diri deka diperinsa. (2 Tim. 3:12) Enda ngira dini alai kitai diau, piak ti bekuasa engka ngenyit nagang semua pengawa ke bekaul enggau sembah kitai ngagai Petara Jehovah.

² Enti perintah ba menua ke alai nuan diau deka nagang sembah nuan ngagai Jehovah, nuan engka berundingka tanya tu: ‘Enti kitai diperinsa, kati nya nunjukka Jehovah enda merekatka pengawa kitai? Kati pengawa nagang nya deka ngujungka kitai badu nyembah Jehovah? Kati aku patut pindah ngagai menua bukai ngambika ulih bibas nyembah Jehovah?’ Ba artikel tu, kitai deka bejuraika tanya nya. Kitai mega deka berandauka chara kitai ulih terus nyembah Jehovah taja pan pengawa kitai ditagang lalu berandauka utai ke patut diseliahka kitai.

 3. (a) Nitihka 2 Korint 11:23-27, nama pemerinsa ke ditapi rasul Paul? (b) Nama dipelajarka kitai ari chunto Paul?

³ Enti perintah nagang sembah kitai ngagai Jehovah, kitai engka ngumbai Jehovah enda merekatka pengawa kitai. Tang kingatka meh, pengawa nagang nya ukai nunjukka Jehovah enda lantang ati enggau pengawa kitai. Peratika chunto rasul Paul. Petara Jehovah tentu lantang ati ke iya. Paul bisi peluang  nulis 14 iti surat ke bisi ba Sempekat Baru, lalu iya mega dikumbai rasul ke orang bansa bukai. Taja pia, iya balat diperinsa. (Bacha 2 Korint 11:23-27.) Ari utai ke nyadi ba Paul, kitai belajar, bisi maya nya Jehovah nejuka nembiak Iya ke tetap ati diperinsa.

 4. Nama kebuah dunya begedika kitai?

⁴ Jesus nerangka kebuah kitai patut ngadang diri deka diperinsa. Iya madahka kitai deka dipegedi laban kitai ukai enggi dunya. (Jhn. 15:18, 19) Pemerinsa ke ditapi kitai ukai nunjukka Jehovah enda merekatka pengawa kitai. Tang, nya nunjukka kitai benung ngereja utai ti ngena!

 5. Kati mensia bisi kuasa nagang sembah kitai ngagai Jehovah? Terangka.

⁵ Mensia nadai kuasa nagang sembah kitai ngagai Jehovah, Petara ti Pemadu Bekuasa. Mayuh orang udah nguji nagang tang enda mujur. Peratika utai ke nyadi maya Perang Dunya II. Maya nya, perintah ba mayuh menua balat merinsaka nembiak Petara. Pengawa bala Saksi-Saksi Jehovah ukai semina ditagang raban Nazi ba menua Jerman tang mega ditagang perintah ba Australia, Kanada, sereta menua ke bukai. Taja pia, peratika utai ke nyadi. Lebuh perang nya berengkah ba taun 1939, penyampau bala saksi di serata dunya 72,475 iku. Lebuh perang nya ngetu ba taun 1945, riput nunjukka, enggau berekat Jehovah, penyampau Saksi-Saksi Jehovah ba serata dunya nambah ngagai 156,299 iku. Penyampau tu nambah dua kali lipat!

 6. Nama utai manah ke nyadi lebuh kitai diperinsa? Padahka siti chunto.

⁶ Pengawa nagang ulih meransang kitai keran agi deka nyembah Jehovah lalu enda takut ngereja nya. Ambika chunto, sepasang laki bini ke bisi anak ti agi biak diau ba menua ke alai pengawa kitai ditagang perintah. Ari ke nyadi takut lalu ngurangka sembah ngagai Jehovah, seduai iya berengkah nyadi pengerintis biasa. Bini iya indah badu kereja taja pan begaji besai. Laki iya madahka, pengawa nagang nya ngasuh mayuh agi orang deka nemu pasal Saksi-Saksi Jehovah. Ketegal tu, iya senang agi deka ngepunka pengawa belajarka Bup Kudus. Pengawa nagang nya meri asil ti manah ngagai orang bukai. Seiku tuai gempuru ke diau ba menua ti sama madahka, mayuh orang  ke badu nyembah Jehovah nyau berengkah datai begempuru baru sereta nginjil.

 7. (a) Nama dipelajarka kitai ari Adat Lewi 26:36, 37? (b) Nama deka digaga nuan lebuh pengawa kitai ditagang?

⁷ Lebuh munsuh nagang kitai nyembah Jehovah, sida deka kitai takut lalu badu nyembah Iya. Kelimpah ari pengawa nagang, sida engka ngerembaika cherita bula pasal kitai, nganjung orang ke gawa ari perintah nyerungkai rumah kitai, mai kitai ngagai kot, tauka ngejil sekeda ari bala kitai. Sida ngarapka tu ulih ngenakutka kitai laban sida udah mujur ngejil sekeda ari kitai. Enti kitai takut ke sida tauka utai ke digaga sida, kitai engka lenyau pengeransing nyembah Jehovah tauka enggai agi nyembah Iya. Kitai tentu enggai nyadi baka sida ke dipadah ba Adat Lewi 26:36, 37. (Bacha.) Kitai enggai nejuka asai ati ti takut ngasuh kitai lenyau pengeransing nyembah Jehovah tauka badu nyembah Iya. Kitai bepanggai ba Jehovah enggau pengabis ati, mengkang sabar lalu enggai kelalu irau. (Mas. 56:3) Kitai besampi minta iring ari Jehovah. Ketegal Jehovah nulung kitai, indah perintah mensia ti pemadu bekuasa pan enda ulih nagang kitai ari nyembah Iya enggau tetap ati.—Heb. 13:6.

 8-9. (a) Nama pemutus ti patut digaga tiap iku orang Kristian kediri empu tauka ke diri sebilik? (b) Nama nulung orang ngaga pemutus ti manah?

⁸ Enti perintah ba menua alai nuan diau nagang sembah nuan ke Jehovah, nuan engka berunding sekalika nuan patut pindah ngagai menua bukai tauka enda. Tu pemutus ke patut digaga kediri empu. Sebedau ngaga pemutus nya, nuan ulih mansik utai ti digaga bala menyadi Kristian ba abad keterubah lebuh sida diperinsa. Pengudah Stepen dibunuh, bala murid Jesus ba Jerusalem pindah ngachir ngagai Judea enggau Samaria. Sekeda nya ngagai Poenisia, Saiprus, enggau Antiok. (Mat. 10:23; SKR. 8:1; 11:19) Nuan mega ulih mansik pasal utai ke digaga Paul lebuh bala murid Jesus diperinsa. Iya mutuska deka diau ba endur alai pengawa nginjil ditagang taja pan tu tau nganu nyawa iya, laban iya deka nginjil lalu ngeringka bala menyadi ba endur nya.—SKR. 14:19-23.

⁹ Nama dipelajarka kitai ari chunto tu? Tiap iku tuai bilik patut ngaga pemutus kediri empu sekalika deka pindah tauka enda. Tang sebedau ngaga pemutus nya, iya patut besampi lalu berundingka enggau dalam pasal diri sebilik sereta utai ke tau nyadi ba sida sebilik. Ba pekara tu, tiap iku orang Kristian patut “mai ma diri empu.” (Gal. 6:5) Kitai enda tau ngakim orang ketegal pemutus ke digaga sida.

10. Nama iring ke deka diberi pampang opis sereta bala tuai gempuru?

¹⁰ Baka ni kitai ulih terus nyembah Jehovah lebuh pengawa kitai ditagang? Pampang opis deka meri iring ngagai bala tuai gempuru pasal chara bulih utai ti ngeringka pengarap, chara begempuru, sereta chara nginjil. Enti pampang opis enda ulih ngiga bala tuai gempuru, nya baru tuai gempuru deka nulung nuan sereta bala bukai ba eklisia ngambika ulih terus nyembah Jehovah. Sida deka ngiring kitai bepelasarka utai ti dipadah ba Bup Kudus sereta litaricha kitai.—Mat. 28:19, 20; SKR. 5:29; Heb. 10:24, 25.

11. Nama kebuah nuan ulih pechaya nuan deka seruran bulih semua utai ti diguna nuan kena ngeringka pengarap? Nama ulih digaga nuan kena nyaga Bup Kudus sereta litaricha Bup Kudus?

¹¹ Jehovah besemaya, nembiak Iya deka bulih semua utai ke diguna sida kena ngeringka pengarap. (Isa. 65:13, 14; Luk. 12:42-44) Nya  alai, nuan ulih pechaya gerempung Iya deka meri nuan utai ti diguna nuan ngambika mengkang tetap ati. Nama ulih digaga nuan? Lebuh pengawa kitai ditagang, giga endur ti manah alai ngelalaika Bup Kudus sereta litaricha Bup Kudus ke bukai ti dikemisi nuan. Bejimat meh, anang sekali-kali ninggalka litaricha elektronik tauka ke dichelak ba endur ke senang ditemu orang. Tiap iku kitai patut enggau naka ulih mengkang tegap ba pengarap.

12. Baka ni tuai gempuru ulih ngatur gempuru ngambika orang enda nemu utai ti digaga kitai?

¹² Baka ni enggau pengawa begempuru ninting minggu? Bala tuai gempuru deka ngatur nuan ngambika begempuru enggau chara ti enda ditemu orang. Sida engka ngasuh nuan begempuru dalam raban ti mit, lalu sida engka deka suah ngubah maya enggau endur begempuru. Nuan ulih nulung ngelindung bala menyadi Kristian ke datai begempuru ari chara nuan bejaku, iya nya, enda kelalu ragak lebuh datai tauka ninggalka alai endur begempuru. Nuan mega engka patut ngena gari biasa ngambika enda diperatika orang.

13. Nama ulih dipelajarka kitai ari bala menyadi Kristian ba menua Soviet Union?

¹³ Utai ke bekaul enggau pengawa nginjil bebida ari siti endur enggau endur ke bukai. Taja pia, semua kitai rinduka Jehovah sereta rindu madah ngagai orang pasal Perintah Iya. Nya alai, kitai deka ngiga chara kena nginjil. (Luk. 8:1; SKR. 4:29) Seiku pakar sejarah ke benama Emily B. Baran madah pasal pengawa nginjil Saksi-Saksi Jehovah ba menua Soviet Union: “Lebuh perintah nagang Saksi-Saksi Jehovah nginjil ngagai orang bukai, bala Saksi berengkah bejaku enggau orang ke diau berimbai enggau sida, orang ke sama gawa, sereta bala bakih. Lebuh bala Saksi dijil ketegal tu, sida nginjil ngagai orang jil ke bukai.” Taja pan pengawa sida ditagang, bala menyadi kitai ba menua Soviet Union enda ngetu nginjil. Enti sema pengawa nginjil ba endur nuan diau ditagang, arapka nuan ulih neladan chunto sida!

14. Nama ulih dipelajarka kitai ari Masmur 39:1 bekaul enggau utai ke patut diseliahka?

¹⁴ Bejimat lebuh bekunsika penerang. Lebuh pengawa kitai ditagang, kitai patut nemu ni “maya enda bemunyi.” (P-jar. 3:7) Kitai patut ngelindung penerang ti patut dilalaika baka nama bala menyadi Kristian kitai, endur begempuru, chara nginjil, sereta chara kitai nerima utai ti ngeringka pengarap. Kitai tentu enggai madahka utai tu ngagai piak bekuasa tauka bekunsika nya enggau bala bakih tauka kaban belayan ba menua kitai tauka ba menua bukai. Enti kitai enda nitihka atur tu, kitai deka ngenusahka bala menyadi Kristian kitai.—Bacha Masmur 39:1.

15. Nama chara ke dikena Sitan ngachau kitai? Lalu, nama patut digaga kitai?

 ¹⁵ Anang ngelakka penanggul ti mit mechah-belahka kitai. Sitan nemu ruang bilik ti bepechah-belah enda tan. (Mrk. 3:24, 25) Iya seruran deka nguji ngasuh kitai bepechah enggau pangan diri. Enggau chara tu, iya ngarapka kitai deka belaban enggau pangan diri, ukai ngelaban iya.

16. Nama ulih dipelajarka kitai ari chunto Menyadi Gertrud Poetzinger?

¹⁶ Indah orang Kristian ti tegap ba pengarap patut bejimat ngambika enda kena panjuk tu. Peratika chunto pasal dua iku menyadi Kristian indu ti dipilih ke serega, iya nya, Gertrud Poetzinger enggau Elfriede Löhr. Seduai iya dijil enggau bala menyadi Kristian indu ke bukai ba kem Nazi. Gertrud kepapas ke Elfriede ti meri jaku peransang ngagai bala menyadi Kristian indu ke bukai ba kem nya. Udah nya, Gertrud berasai malu enggau ulah diri lalu besampi minta tulung ari Jehovah. Ku iya nulis: “Kitai patut belajar nerima orang bukai ke ngembuan pengelandik tauka tanggung pengawa ke lebih agi ari kitai.” Baka ni iya mutarka asai ati iya ti kepapas? Gertrud beratika pemanah ke dikembuan Elfriede. Enggau chara tu, iya bulih kaul ti manah baru enggau Elfriede. Seduai iya bela mujur napi pemerinsa ba kem nya lalu nyembah Jehovah enggau tetap ati nyentuk ke pengujung nyawa seduai iya ba dunya tu. Kitai ulih nyeliahka diri ari panjuk ke tau ngasuh kitai bepechah-belah enti kitai bebendar nguji mutarka penanggul enggau bala menyadi Kristian kitai.—Kol. 3:13, 14.

17. Nama kebuah kitai patut seruran nitihka iring ari gerempung Jehovah?

¹⁷ Seruran nitihka iring. Enti kitai nitihka iring ari menyadi Kristian lelaki ke megai tanggung pengawa, kitai deka nyeliahka penanggul. (1 Pet. 5:5) Ambika chunto, ba siti menua ke alai pengawa kitai ditagang, bala menyadi Kristian lelaki ke megai tanggung pengawa meri iring ngagai bala menyadi ngambika sida nginjil enggau chara enda formal. Tang, sida enda tau nyadung litaricha ke dichelak. Taja pia, seiku menyadi Kristian lelaki ke nyadi pengerintis ba endur nya enda nitihka iring tu. Nama penyadi? Enda lama pengudah iya enggau sekeda ke bukai tembu nginjil, sida ditasat polis. Kebendar iya, bisi orang ke gawa ari perintah benung beratika sida lalu mujur ngumpul litaricha ke udah disadung sida. Nama dipelajarka kitai ari tu? Kitai patut nitihka iring taja pan kitai enda setuju. Jehovah seruran merekatka kitai lebuh kitai sama bekereja enggau bala menyadi Kristian lelaki ke udah diasuh Iya nguluka kitai.—Heb. 13:7, 17.

18. Nama kebuah kitai enda tau netapka atur ti enda patut?

 ¹⁸ Anang netapka atur ti enda patut. Enti bala tuai gempuru netapka atur ti enda patut, sida deka ngenusahka orang bukai. Menyadi Juraj Kaminský madahka utai ke nyadi lebuh pengawa kitai ditagang ba Czechoslovakia suba: “Pengudah mayuh tuai gempuru ditangkap, sekeda ke enda ditangkap ke ngulu ba eklisia enggau bejalaika pengawa ngabas eklisia, berengkah netapka atur ti enda patut ngagai bala menyadi Kristian kitai.” Jehovah enda meri kitai hak netapka atur ngagai bala menyadi Kristian kitai. Sida ke ngaga atur ti enda patut nya ukai ngelindung bala menyadi Kristian tang ‘merintah pengarap sida.’—2 Kor. 1:24.

19. Nitihka 2 Bansa Israel 32:7, 8, nama kebuah kitai ulih nyadi berani enda ngira nama utai ti digaga Sitan?

¹⁹ Munsuh kitai ti pemadu besai, Sitan, deka seruran nguji merinsaka nembiak Jehovah ke tetap ati. (1 Pet. 5:8; Pem. 2:10) Sitan enggau sida ke nyukung iya deka nguji nagang kitai ari nyembah Jehovah. Tang, taja pan kitai engka takut, kitai enggai badu nyembah Jehovah. (U-dat. 7:21) Jehovah setanah enggau kitai lalu Iya deka terus nyukung kitai taja pan pengawa kitai ditagang.—Bacha 2 Bansa Israel 32:7, 8.

20. Nama utai ti keran deka digaga nuan?

²⁰ Arapka kitai ngembuan pengeran ti sama baka bala menyadi Kristian kitai ba abad keterubah, ke madah ngagai bala pemerintah maya jeman sida: ‘Sekalika kami, di mua Petara, patut mendingka kita, lalu enda mendingka Petara, awakka kita empu berunding, laban kami enda ulih nagang diri bejakuka pasal utai ti udah dipeda enggau didinga kami.’—SKR. 4:19, 20.