1. Nama kebuah Jehovah nyemaka diri baka seiku indai?

 “KATI indu enda ingatka anak diri?” Tu meh tanya ke ditanya Jehovah maya jeman nabi Isaiah. Ku Petara madah ngagai nembiak Iya: “Enti sema indai enda ingatka anak diri, Aku deka seruran ingatka kita.” (Isa. 49:15) Jehovah enda seruran mandingka Diri baka seiku indai. Tang Jehovah ngena sempama seiku indai enggau anak kena nunjukka Iya amat sayauka nembiak Iya. Mayuh indai ngembuan asai ati ti sebaka enggau menyadi ke benama Jasmin. Iya madahka: “Lebuh indai nusuka anak iya, kaul seduai iya nyadi rapat sepemanjai idup.”

 2. Nama asai ati Jehovah lebuh seiku ari anak Iya badu nyembah Iya?

² Jehovah nemu lebuh seiku ari anak Iya enda agi datai begempuru sereta nginjil. Nya alai, Iya tentu tusah ati meda beribu iku nembiak Iya enda aktif b ninting taun.

 3. Nama dikedekaka Jehovah?

³ Mayuh ari menyadi Kristian kitai ke enda aktif bisi pulai baru ngagai eklisia. Kitai gaga ati ke sida! Jehovah deka sida pulai baru, pia mega enggau kitai. (1 Pet. 2:25) Baka ni kitai ulih nulung sida? Sebedau nyaut tanya tu, kitai patut nemu kebuah sida badu datai begempuru sereta nginjil.

 4. Nama nyadi ngagai sekeda menyadi ketegal ngenuluka kereja?

⁴ Sekeda menyadi kelalu ngenuluka kereja ba pengidup sida. Ku menyadi Kristian lelaki ke benama Hung c ari menua Asia: “Aku ngena mayuh jam enggau pengering ba kereja. Aku ngumbai, enti aku bisi mayuh duit, aku ulih nyembah Jehovah enggau manah agi. Nya alai, aku gawa lebih jam lalu tusah datai begempuru. Pengujung iya aku enda agi datai gempuru. Sitan ngena dunya tu ngelimpangka orang ngambika sida belubah-lubah ninggalka Jehovah.”

 5. Nama nyadi ngagai Menyadi Anne ketegal penanggul ke ditapi iya?

⁵ Sekeda menyadi Kristian berasai asa ati ketegal napi mayuh penanggul. Anne ari Britain bisi lima iku anak. Ku iya: “Seiku ari anak aku timpang pendiau ari ada. Udah nya, seiku anak indu aku dibuai ari gerempung lalu seiku anak lelaki berengkah sakit mental. Aku balat tusah ati nyentukka aku badu datai gempuru sereta nginjil. Tu ngujungka aku enda aktif.” Kitai berasai sinu enggau utai ke ditapi Anne sebilik sereta menyadi bukai ke napi penanggul ti sama.

 6. Nama kebuah enda nitihka Kolosi 3:13 ulih ngujungka seseiku orang badu begulai enggau bala menyadi Kristian?

⁶ Bacha Kolosi 3:13. Sekeda ari nembiak Jehovah bisi pedis ati enggau menyadi Kristian ba eklisia. Rasul Paul nemu kekadang kitai “enda nyamai ati” enggau pangan diri. Indah kitai engka napi utai ti enda lurus. Enti kitai enda bejimat, kitai engka nejuka pengeringat ngasuh kitai belubah-lubah enda begulai enggau bala menyadi. Peratika peneleba Pablo, seiku menyadi Kristian lelaki ari Amerika Selatan. Iya dituduh ngereja utai ti salah, lalu lenyau tanggung pengawa ba eklisia. Nama digaga iya? Ku Pablo: “Aku pedis ati lalu belubah-lubah badu begulai enggau menyadi Kristian.”

 7. Nama ulih nyadi enti seseiku orang berasai besalah?

⁷ Ketegal udah ngereja penyalah, seseiku orang engka betaun-taun berasai besalah lalu ngasaika diri enda ulih nerima pengerindu Petara. Taja pan iya udah nesal ati sereta udah diampun, iya engka agi ngasaika diri enda layak nyadi nembiak Petara. Seiku menyadi lelaki ke benama Francisco madahka: “Aku nerima disiplin ketegal ngereja ulah seks ti kamah. Taja pan aku bisi datai gempuru, tang aku berasai balat tusah ati lalu ngumbai diri enda layak begulai enggau nembiak Jehovah. Aku agi berasai besalah lalu ngasaika Jehovah enda ngampun aku. Nyau kelama, aku badu nginjil sereta datai gempuru.” Endang terang, mayuh utai ulih ngasuh bala menyadi badu nyembah Jehovah. Nama asai ati nuan pasal sida ke napi utai ti baka nya? Ulih nuan ngasaika penusah sida? Kelebih agi, baka ni asai ati Jehovah ngagai sida?

 8. Kati Jehovah enda ingatka orang ke kala nyembah Iya? Terangka.

⁸ Jehovah seruran ingatka orang ke nyembah Iya, taja pan sida ngetu begulai enggau menyadi Kristian. Iya mega ingatka pengawa ke udah dikereja sida ke Iya. (Heb. 6:10) Nabi Isaiah nulis sempama ke nunjukka chara Jehovah ibuhka nembiak Iya: “Iya deka ngibun nembiak Iya baka pengibun bedus. Iya deka ngempuruka sida lalu ngerendut sida, lalu mai sida.” (Isa. 40:11)  Baka ni asai ati Jehovah, Pengibun Bedus ti Badas, lebuh nembiak Iya ngetu nyembah Iya? Jesus nerangka asai ati Jehovah lebuh iya nanya bala murid: ‘Baka ni ku pikir kita? Enti orang siku bisi seratus iku bedus, lalu siku bedus nya lenyau, enda ke iya deka ninggalka sida ke semilan puluh semilan iku ba bukit, lalu bejalai ngiga siku ti lenyau nya? Lalu lebuh iya udah tetemuka bedus nya, enggau bendar aku madah ngagai kita, iya deka lebih agi gaga ati ke bedus siku nya ari ke sida ke semilan puluh semilan iku ti enda lenyau.’—Mat. 18:12, 13.

 9. Baka ni pengibun bedus ti manah kelia menya ibuhka bedus iya? (Peda gambar ba kulit majalah.)

⁹ Nama kebuah kitai nyemaka Jehovah baka pengibun bedus? Laban pengibun bedus ti manah kelia menya amat ibuhka bedus iya. Ambika chunto, David ngelaban singa sereta beruang kena ngelindung bedus iya. (1 Sam. 17:34, 35) Enti bisi seiku bedus lenyau, pengibun bedus tentu nemu. (Jhn. 10:3, 14) Iya deka ninggalka bedus bukai ba kandang tauka minta pengibun bukai nyaga raban bedus iya. Udah nya, iya ngiga bedus ke lenyau. Jesus ngena sempama tu kena ngajar kitai utai ti beguna bendar: “Baka nya meh Apai kita ti di serega enggai nejuka indah siku ari sida ke mit tu lenyau.”—Mat. 18:14.

10. Nitihka Esekiel 34:11-16, nama semaya Jehovah ke bedus Iya ti lenyau?

¹⁰ Jehovah sayauka tiap iku kitai, nyengkaum “orang ke pemadu mit” ke enda begulai enggau nembiak Iya agi. Nengah nabi Esekiel, Petara besemaya deka ngiga bedus Iya ti lenyau sereta nulung sida ngaduka kaul enggau Iya baru. Lalu Petara madahka enggau silik pasal utai ke deka dikereja Iya kena nyelamatka sida. Chara Iya ngereja nya sebaka enggau utai ke digaga pengibun bedus orang Israel enti bisi bedus lenyau.  (Bacha Esekiel 34:11-16.) Terubah, pengibun bedus ngiga bedus. Tu begunaka mayuh awak sereta pengering. Pengudah iya tetemuka bedus nya, iya mai pulai ngagai raban bedus. Enti bedus nya bakal tauka lapar, pengibun bedus deka malut bakal nya, ngangkat iya, sereta meri iya makai. Bala tuai gempuru nya pengibun ‘bala nembiak Petara.’ Sida patut nitihka chara ti sama ngambika ulih nulung menyadi Kristian ke ngetu begulai enggau eklisia. (1 Pet. 5:2, 3) Tuai gempuru ngiga sida, nulung sida pulai baru ngagai eklisia, sereta ngayanka pengerindu enggau nulung sida nyadi pangan Jehovah. d

11. Nama ditemu pengibun bedus ti manah?

¹¹ Pengibun bedus ti manah nemu bedus ulih lenyau. Enti seiku bedus ninggalka raban iya, pengibun bedus enda ngukum iya. Peratika baka ni Petara nulung sekeda nembiak Iya kelia menya ke enda ngereja utai ti diasuh Iya ketegal asai takut tauka asa ati.

12. Baka ni Jehovah nulung Jonah?

¹² Taja pan nabi Jonah rari ari pengawa ke diberi Jehovah, tang Jehovah enda terus nulak iya. Baka pengibun bedus ti manah, Jehovah nyelamat sereta nulung Jonah bulih pengering kena nembuka pengawa iya. (Jon. 2:7; 3:1, 2) Udah nya, Petara ngasuh labu ai tumbuh kena nulung Jonah meretika nyawa tiap iku mensia nya berega. (Jon. 4:10, 11) Nama ulih dipelajarka kitai? Tuai gempuru patut bebendar nulung menyadi Kristian ke enda aktif. Sida nguji nemu kebuah menyadi nya ngetu begulai enggau eklisia. Lebuh menyadi nya pulai baru ngagai Jehovah, tuai gempuru terus ngayanka pengerindu sereta pengibuh ngagai iya.

13. Nama ulih dipelajarka kitai ari chara Jehovah nulung penulis Masmur 73?

¹³ Penulis Masmur 73 berasai asa ati lebuh  iya meda orang jai seruran mujur. Iya berunding sekalika ngereja pengawa Petara bisi mai penguntung. (Mas. 73:12, 13, 16) Nama digaga Jehovah? Iya enda nganu pemasmur nya. Indah Iya ngasuh jaku pemasmur nya ditulis dalam Bup Kudus. Nyau kelama, pemasmur nya nemu ngembuan kaul ti manah enggau Jehovah nya pemadu berega. (Mas. 73:23, 24, 26, 28) Nama ulih dipelajarka kitai? Enti sema bisi menyadi belabuh ngasaika nadai penguntung nyembah Jehovah, tuai gempuru enda beguai ngakim iya. Tang sida nguji meretika kebuah menyadi nya berunding baka nya. Pengudah nemu kebuah iya, tuai gempuru ulih meransang iya ngena ayat Bup Kudus ti engkeman.

14. Nama kebuah Elijah begunaka bantu, lalu baka ni Jehovah nulung iya?

¹⁴ Nabi Elijah ngerarika diri ari Kuin Jesebel. (1 Raj. 19:1-3) Iya ngumbai semina iya seiku aja nabi Jehovah lalu ngasaika pengawa iya nadai guna. Elijah balat tusah ati nyentukka iya madahka diri deka mati. (1 Raj. 19:4, 10) Ari ke nganu iya, Jehovah nulung Elijah nemu iya enda kediri, iya ulih arapka kuasa Petara, sereta agi bisi pengawa ke ulih digaga iya. Jehovah mending enggau manah lebuh Elijah madahka pengirau diri lalu Jehovah meri iya pengawa ti baru. (1 Raj. 19:11-16, 18) Nama ulih dipelajarka kitai? Semua kitai, kelebih agi tuai gempuru patut nyaga bedus Jehovah enggau nelap.  Enda ngira enti orang nya madahka diri ringat tauka ngasaika diri enda layak nerima pengampun ari Jehovah, tuai gempuru patut ninga enggau manah lebuh iya madahka asai ati diri. Udah nya sida ulih nulung iya nemu, Jehovah sayauka iya.

15. Nitihka John 6:39, nama runding Jesus pasal bedus Apai iya?

¹⁵ Jehovah deka kitai ngembuan asai ati ke baka ni ngagai bedus Iya ti lenyau? Kitai ulih belajar ari teladan Jesus. Jesus nemu semua bedus berega ba mata Jehovah. Nya alai, Jesus enggau naka ulih nulung “bedus orang Israel ke tesat” pulai baru ngagai Jehovah. (Mat. 15:24; Luk. 19:9, 10) Pia mega, ketegal Jesus nya pengibun bedus ti manah, iya enggau naka ulih enda ngelenyauka indah seiku ari bedus Jehovah.—Bacha John 6:39.

16-17. Nama asai ati ke patut dikembuan tuai gempuru pasal nulung sida ke enda aktif? (Peda kutak “ Asai Ati Bedus ti Lenyau.”)

¹⁶ Rasul Paul meransang tuai gempuru ba eklisia Epesus nunda teladan Jesus. Ku iya: ‘Kita ulih nulung nyukung orang ke lemi, laban kitai ingatka jaku Tuan Jesus, laban iya empu ke nyebut, “Beberekat agi orang ke meri, ari orang ke nerima.”’ (SKR. 20:17, 35) Endang amat, tuai gempuru kemayaharitu bisi pengawa ti berat. Salvador, seiku tuai gempuru ba Sepanyol madahka: “Lebuh aku berundingka Jehovah amat ibuhka bedus Iya ti lenyau, aku diperansang enggau naka ulih nulung sida. Aku nemu Jehovah deka aku nyaga sida.”

¹⁷ Semua bala menyadi ke disebut ba artikel tu udah ditulung lalu pulai baru ngagai Jehovah. Lalu ke diatu, mayuh agi menyadi bukai ke enda aktif deka pulai baru. Artikel pengudah tu deka berandauka enggau silik baka ni kitai ulih nulung sida pulai baru ngagai Jehovah.