1. Baka ni pengidup nuan sebedau nuan belajar Bup Kudus?

 BAKA NI pengidup nuan sebedau nuan belajar Bup Kudus enggau Saksi-Saksi Jehovah? Mayuh ari kitai enda rindu ngenang baru pengidup nya. Dunya tu ke nentuka utai ti betul sereta salah. Nya kebuah runding enggau ulah kitai suba nitihka standard dunya. Enti pia, kitai ‘nadai pengadang, lalu nadai Petara di dunya tu.’ (Eps. 2:12) Tang lebuh kitai berengkah belajar Bup Kudus, pengidup kitai berubah!

 2. Nama utai ke ditemu nuan lebuh berengkah belajar Bup Kudus?

² Lebuh nuan berengkah belajar Bup Kudus, nuan nemu bisi Petara ke amat rinduka nuan. Lalu enti nuan deka ngelantangka ati Jehovah sereta nyembah Iya, nuan sedar nuan patut ngaga ubah ba pengidup sereta runding. Nuan mega patut belajar idup nitihka standard Iya.—Eps. 5:3-5.

 3. Nitihka Kolosi 3:9, 10, Jehovah deka kitai ngereja nama? Lalu nama deka dikerandauka kitai ba artikel tu?

³ Jehovah nya Penempa sereta Apai kitai. Nya alai, Iya bisi hak nentuka ulah ke patut dikembuan kitai. Sebedau kitai dibaptisa, Jehovah deka kitai bebendar “ngelengkaka pengidup ti lama, enggau semua pengawa iya.” b (Bacha Kolosi 3:9, 10.) Artikel tu deka nulung sida ke deka dibaptisa nyaut tiga iti tanya tu: (1) Nama reti “pengidup ti lama”?  (2) Nama kebuah Jehovah ngasuh kitai ngelengkaka pengawa nya? (3) Baka ni kitai ulih ngereja nya? Lalu artikel tu deka nulung kitai ke udah dibaptisa nyeliahka diri ari ngembuan runding sereta ulah ti lama.

 4. Nama utai ke digaga orang ke agi bisi ngembuan “pengidup ti lama”?

⁴ Orang ke agi ngembuan “pengidup ti lama” suah berunding sereta ngereja utai ti bedosa. Iya engka berundingka diri empu aja, jampat ringat, enda beterima kasih sereta sumbung. Iya engka rindu meda pornografi, cherita ti enda bemoral tauka ganas. Taja pia, iya tentu bisi sekeda sifat ti manah, lalu engka berasai besalah lebuh iya nyebut tauka ngereja ulah ti enda manah. Tang iya enda bebendar deka ngubah runding enggau ulah diri.—Gal. 5:19-21; 2 Tim. 3:2-5.

 5. Kati kitai ulih muai semua ulah tauka “pengidup ti lama”? Terangka. (Surat Kereja Rasul 3:19)

⁵ Semua kitai enda sempurna. Nya alai, kitai enda ulih muai semua pengingin sereta runding ti jai. Kekadang, kitai engka ngereja tauka nyebut utai ti salah lalu udah nya ngesalka penyalah diri. (Jer. 17:9; Jas. 3:2) Tang lebuh kitai muai ulah tauka “pengidup ti lama,” pengingin sereta ulah ti bedosa enda agi ulih nguasa kitai. Kitai nyadi orang ti baru.—Isa. 55:7; bacha Surat Kereja Rasul 3:19.

 6. Nama kebuah Jehovah deka kitai muai runding sereta ulah ti enda manah?

⁶ Jehovah deka kitai muai runding sereta ulah ti enda manah. Tu ketegal, Iya amat rinduka kitai lalu deka kitai ngembuan pengidup ti lantang. (Isa. 48:17, 18) Iya nemu enti kitai enda ngelaban pengingin ti salah, nya ulih ngemediska kitai sereta orang ke ngelingi kitai. Enti tu nyadi, Jehovah mega berasai tusah ati.

 7. Nitihka Rome 12:1, 2, nama pemutus ke ulih digaga kitai?

⁷ Sekeda ari kaban sereta diri sebilik engka bejaika kitai lebuh kitai ngaga ubah. (1 Pet. 4:3, 4) Sida engka madah kitai bisi hak ngereja utai ti dikedekaka kitai, lalu kitai enda ibuh nitihka jaku orang bukai. Tang orang ke nulak standard Jehovah kebendar iya enda bibas. Sida nitihka chara dunya ke dipegai Sitan. (Bacha Rome 12:1, 2.) Nya alai, semua  kitai patut ngaga pemutus: Kati kitai deka terus ngembuan ulah ti lama ti bedosa sereta nitihka dunya Sitan? Tauka kitai ngelakka Jehovah ngubah kitai nyadi orang ke manah agi?—Isa. 64:8.

 8. Nama ulih nulung kitai nyeliahka runding ti salah sereta ulah ti enda manah?

⁸ Jehovah nemu kena mutarka runding ti salah sereta ulah ti enda manah, tu begunaka awak enggau usaha. (Mas. 103:13, 14) Tang Jehovah meri kitai penemu-dalam, pengering sereta sukung ke diguna kitai kena ngaga ubah. Iya ngereja tu nengah Bup Kudus, roh kudus sereta gerempung Iya. Nuan tentu udah ngasaika tulung ari Iya. Diatu kitai deka beratika sekeda utai ke ulih digaga nuan ngambika nuan ulih muai ulah ti enda manah lalu ulih dibaptisa.

 9. Baka ni Bup Kudus ulih nulung nuan?

⁹ Kena meh Bup Kudus meresa diri empu. Bup Kudus baka cheremin. Bup Kudus ulih nulung nuan meresa chara nuan berunding, bejaku sereta ulah nuan. (Jas. 1:22-25) Pengajar Bup Kudus sereta menyadi Kristian ke tegap ba pengarap ulih meri nuan jaku lalau. Ambika chunto, sida engka ngena ayat Bup Kudus kena nulung nuan nemu pengering sereta pengelemi nuan. Sida ulih ngajar nuan ngiga artikel ke ngembuan jaku lalau ti ulih nulung nuan mutarka ulah ti enda manah. Lalu Jehovah seruran deka nulung nuan. Ketegal Iya nemu utai ba ati nuan, Iya nemu chara ti pemadu manah ulih nulung nuan. (J-lam. 14:10; 15:11) Nya alai, uji meh nyediaka awak macha Bup Kudus sereta besampi ngagai Jehovah ninting hari.

10. Nama dipelajarka nuan ari pengalaman Elie?

¹⁰ Andal meh standard Jehovah nya pemadu manah. Semua utai ke diasuh Jehovah kereja kitai nya ke pemanah kitai. Enti kitai nitihka standard Iya, kitai deka masa diri empu, bisi tuju ba pengidup sereta pengelantang ba ati. (Mas. 19:7-11) Tang, orang ke nulak standard Jehovah suah merinsa laban sida ngereja pengawa ti bedosa. Seiku lelaki ke benama Elie nulak standard Petara. Iya dibesaika apai indai ti rinduka Jehovah. Tang lebuh iya mansang besai, Elie milih kaban ti enda manah. Iya berengkah ngena dadah, ngembuan pengidup ti enda bemoral sereta ngenchuri. Elie madahka, nyau kelama iya jampat ringat sereta ganas. Elie ngaku, “Pandakka jaku, aku ngereja semua utai ke enda patut digaga aku enti aku orang Kristian.” Taja pia, Elie suah ingat utai ke dipelajar iya lebuh iya agi biak. Nyau kelama, iya berengkah belajarka Bup Kudus baru. Iya bebendar muai ulah ti enda manah. Nya alai, iya ulih dibaptisa ba taun 2000. Baka ni nitihka standard Jehovah udah nulung Elie ngembuan pengidup ti manah agi? Ku iya madah: “Diatu aku berasai lantang agi lalu ngembuan ati ti beresi.” c Utai ke nyadi ba Elie nunjukka, sida ke nulak standard Jehovah seruran ngemediska diri empu. Taja pia, Jehovah sedia deka nulung sida ngaga ubah.

11. Nama utai ke dipegedika Jehovah?

¹¹ Belajar begedika utai ti dipegedika Jehovah. (Mas. 97:10) Bup Kudus madahka Jehovah begedika ‘pendiau ti sumbung, dilah ti bula sereta jari ti munuh orang ke nadai penyalah.’ (J-lam. 6:16-19) Iya mega ‘begedika orang ke mangah sereta ke nipu orang.’ (Mas. 5:6) Jehovah amat begedika semua ulah ti jai tu nyentukka Iya ngerusak semua orang ti jai  ba jeman Noah. Tu ketegal sida udah ngemenuhka dunya tu enggau pengawa sida ke jai. (P-kal. 6:13) Peratika siti agi utai ti dipegedika Jehovah. Nengah nabi Malaki, Jehovah madahka Iya begedika sida ti ngaga pelan ngambika ulih nyarak kaling pengidup sida. Ketegal nya, Jehovah nulak sembah sida lalu deka ngakim sida.—Mal. 2:13-16; Heb. 13:4.

12. Nama reti “begedika penyai”?

¹² Jehovah dekaka kitai “begedika penyai.” (Rom. 12:9) Nama reti begedika sesiti utai? Ambika chunto, nama asai ati nuan lebuh orang meri nuan pemakai ke udah bari? Nuan tentu enda ulih nerima nya, lalu amat begedika nya. Baka nya mega, kitai patut begedika runding ti ngasuh kitai ngereja utai ti dipegedika Jehovah.

13. Nama kebuah kitai patut nyaga runding kitai?

¹³ Jaga meh runding nuan. Kitai suah ngereja utai ti diperundingka kitai. Nya alai, Jesus ngajar kitai nulak sebarang runding ke tau ngujungka kitai ngereja penyalah ti besai. (Mat. 5:21, 22, 28, 29) Kitai tentu deka ngelantangka ati Jehovah. Nya kebuah kitai deka jampat nulak sebarang runding ti enda manah!

14. Nama ulih ditemu orang ari jaku kitai, lalu nama tanya ke patut disaut kitai empu?

¹⁴ Jaga meh jaku nuan. Ku Jesus: “Utai ti pansut ari nyawa, datai ari ati.” (Mat. 15:18) Endang amat, orang ulih ngelala sapa kitai ari utai ke disebut kitai. Nya alai, tanya meh diri empu: ‘Kati aku nyeliahka diri ari bejaku bula, taja pan madah utai ti bendar nya ngenusahka aku? Enti aku udah bisi kaling pengidup, kati aku bejimat ngambika enda betundi enggau orang ke enda sama penempa? Kati aku nyeliahka diri ari ngena jaku ti enda menuku? Kati aku nyaut enggau chara ti nelap taja pan orang udah ngemediska ati aku?’ Jaku kitai tau disemaka baka ubung ke dijait lalu bejantil nyadi baju. Pia mega, jaku ti jai deka ngasuh ulah ti lama bejantil enggau kitai. Nya alai, enti kitai deka muai ulah ti lama, kitai patut badu agi ngena jaku ti kasar, enda menuku sereta bula.

15. Nama reti mantang pendiau kitai ti lama ba “tiang perinsa”?

¹⁵ Sanggup ngereja utai ti patut. Rasul Paul ngena siti sempama kena nunjukka ngaga ubah nya beguna. Iya madah, kitai patut mantang pendiau kitai ti lama ba “tiang perinsa.”  (Rom. 6:6, NWT) Jesus sanggup dipantang ba tiang perinsa ngambika ulih ngelantangka ati Jehovah. Baka nya mega, enti kitai deka ngelantangka ati Jehovah, kitai enda tau enda sanggup muai ulah sereta pengawa ti dipegedika Jehovah. Enti kitai ngereja semua utai tu, kitai ulih ngembuan ati ti beresi sereta bisi peluang idup belama iya. (Jhn. 17:3; 1 Pet. 3:21) Jehovah enda sekali-kali nukar standard Iya kena ngelantangka ati kitai. Tang kitai ke patut ngaga ubah lalu ngasika standard Iya.—Isa. 1:16-18; 55:9.

16. Nama kebuah nuan patut keran ngelaban pengingin ti salah?

¹⁶ Anang ngetu ngelaban pengingin ti salah. Taja pan nuan udah dibaptisa, tang nuan enda tau enda terus ngelaban pengingin ti salah. Perundingka pengalaman seiku lelaki ke benama Maurício. Lebuh iya agi biak, iya berengkah idup nyadi homoseksual. Nyau kelama, iya betemu enggau Saksi-Saksi Jehovah lalu berengkah belajar Bup Kudus. Pengudah iya ngaga ubah ba pengidup, iya dibaptisa kena taun 2002. Taja pan iya diatu udah nyembah Jehovah beberapa taun, iya madah: “Aku ngaku, kekadang aku agi belaban enggau pengingin ti salah.” Tang iya enda ngelakka utai tu ngasaka ati iya. Ku Mauricio: “Aku berasai lantang agi laban nemu lebuh aku enda ngereja pengingin ti salah tu, aku kebendar iya ngelantangka ati Jehovah.” d

17. Nama utai ke meransang nuan ari utai ke nyadi ba Nabiha?

¹⁷ Besampi meh minta tulung ari Jehovah. Bepanggai ba roh kudus Iya, ukai ba pengering diri empu. (Gal. 5:22; Plp. 4:6) Kitai patut bebendar muai pendiau ti lama lalu nentuka ulah lama nya enda pulai baru. Peratika utai ke nyadi ba seiku indu ke benama Nabiha. Apai iya ninggalka iya lebuh iya beumur enam taun. Ku iya, “Tu balat ngachau emosi aku.” Lebuh iya mansang besai, Nabiha nyadi orang ke jampat ringat sereta ganas. Udah nya, iya berengkah nyual dadah tang iya ditangkap lalu dianjung ngagai rumah jil pengelama beberapa taun. Saksi-Saksi Jehovah ke ngabas rumah jil berengkah belajar Bup Kudus enggau iya. Udah nya, Nabiha berengkah ngaga ubah ti besai ba pengidup iya. Ku iya madah, “Sekeda ari ubah nya senang digaga.  Tang aku berasai tusah deka badu nginsap.” Nabiha begunaka lebih ari setaun kena badu nginsap. Baka ni iya mujur ngereja nya? Ku Nabiha, “Ke pemadu penting, aku suah besampi ngagai Jehovah. Nya meh ke nulung aku mujur badu nginsap.” Diatu, iya madah ngagai orang bukai: “Aku andal, enti aku ulih ngaga ubah tu kena ngelantangka ati Jehovah, sapa-sapa pan ulih!” e

18. Nitihka 1 Korint 6:9-11, nama ubah ke udah digaga nembiak Petara?

¹⁸ Ba abad keterubah, sekeda orang ke dipilih Jehovah merintah enggau Kristus mega kala ngereja utai ti jai. Ambika chunto, sida ngereja pengawa butang, homoseksual sereta ngenchuri. Tang enggau tulung ari roh kudus Petara, sida mujur ngaga ubah. (Bacha 1 Korint 6:9-11.) Kemayaharitu, Bup Kudus mega udah nulung bejuta iku orang ngaga ubah ba pengidup. f Sida udah ngelengkaka tebiat ke tusah dibuai. Teladan sida nunjukka nuan mega ulih ngaga ubah sereta muai tebiat ti enda manah ngambika ulih dibaptisa.

19. Nama deka dikerandauka kitai ba artikel pengudah tu?

¹⁹ Kelimpah ari muai ulah ti lama, sida ke deka dibaptisa mega patut enggau bebendar ngerasukka ulah ti baru. Ba artikel pengudah tu, kitai deka berandauka baka ni kitai ulih ngereja nya lalu baka ni orang bukai ulih nulung kitai.