1. Nama dipadah Jesus pasal pengaya di serega?

 UKAI semua utai ti pemadu berega ulih dipeda. Lebuh Jesus meri Ajar ba atas Bukit, iya madahka pengaya ti di serega berega agi ari reta tengkira. Udah nya, iya mega madahka: “Laban dia alai pengaya kita, dia meh alai ati kita.” (Mat. 6:19-21) Enti sesiti utai nya berega ba kitai, kitai bebendar ngulihka iya. Kitai nyimpan “pengaya” di serega lebuh kitai ngembuan nama ti manah ba mata Jehovah. Jesus madahka pengaya ke baka nya enda ulih dirusak tauka dichuri.

 2. (a) Nitihka 2 Korint 4:17, 18, nama utai ke diasuh rasul Paul gaga kitai? (b) Nama deka dipejuraika kitai ba artikel tu?

² Rasul Paul ngasuh kitai “merening . . . ngagai utai ti enda ulih dipeda.” (Bacha 2 Korint 4:17, 18.) Utai ti enda ulih dipeda nya nyengkaum semua utai manah ke deka diulih kitai ba dunya baru Petara. Ba artikel tu, kitai deka bejuraika empat iti pemeri ti enda ulih dipeda ke meri penguntung ngagai kitai diatu. Pemeri nya nyengkaum nyadi pangan Jehovah, besampi, saup ari roh kudus Jehovah, sereta sukung ari Jehovah, Jesus enggau bala melikat ba pengawa nginjil. Kitai mega deka bejuraika chara kitai ngayanka diri beterima kasihka pemeri ti enda ulih dipeda tu.

 3. Nama pemeri ke pemadu berega ti enda ulih dipeda, lalu nama kebuah kitai ulih ngembuan pemeri nya?

³ Pemeri ke pemadu berega ti enda ulih dipeda nya, nyadi pangan Jehovah. (Mas. 25:14) Baka ni Petara ti kudus ulih nyadi pangan mensia ti bedosa? Iya ngena genselan tebus Jesus ke “muai dosa” mensia. (Jhn. 1:29) Ari pun Jehovah udah nemu, tuju Iya ke deka nyelamatka mensia nengah Jesus deka dikeamatka. Nya kebuah Jehovah ulih nyadi pangan mensia, nyengkaum sida ke idup sebedau Jesus mati.—Rom. 3:25.

 4. Sapa pangan Jehovah kelia menya?

⁴ Peratika sekeda penyembah kelia menya ke nyadi pangan Jehovah. Abraham nya orang ti ngembuan pengarap ti tegap. Lebih ari 1,000 taun pengudah Abraham nadai, Jehovah ngumbai iya “pangan Aku.” (Isa. 41:8) Reti nya, taja pan orang udah lama mati, Jehovah agi ngumbai sida pangan Iya. Ba Jehovah, Abraham baka ke agi idup. (Luk. 20:37, 38) Siti agi chunto nya Jop. Lebuh semua bala melikat begempuru di serega, Jehovah enggau ati ti andal ngumbai Jop ‘lurus . . . , ke nangika Petara sereta nyeliahka penyai.’ (Jop 1:6-8) Lalu nama asai ati Jehovah pasal Daniel, ke nyembah Iya enggau tetap ati pengelama kira-kira 80 taun ba menua orang kapir? Lebih ari sekali, melikat madahka Petara rinduka Daniel ke udah tuai nya. (Dan. 9:23; 10:11, 19) Kitai pechaya Jehovah keran deka ngangkatka bala pangan ti dikerinduka Iya idup baru.—Jop 14:15.

 5. Nama patut digaga enti deka nyadi pangan rapat Jehovah?

⁵ Kemayaharitu, bejuta iku orang bisi kaul ti rapat enggau Jehovah. Mayuh sida ke lelaki, ke indu, sereta bala anak mit di serata dunya nunjukka diri amat nyadi pangan Jehovah nengah ulah sida. Jehovah “ngaga orang ke lurus nyadika pangan [rapat] Iya.” (J-lam. 3:32) Ketegal arapka genselan tebus Jesus, kitai ulih nyadi pangan Jehovah sereta nyerahka pengidup diri ngagai Iya lalu dibaptisa. Enggau tu, kitai bela enggau bejuta iku menyadi Kristian ngembuan kaul ti rapat enggau Petara ti Pemadu Tinggi di dunya raya!

 6. Baka ni chara kitai ulih beterima kasihka peluang nyadi pangan Petara?

⁶ Baka ni chara kitai ulih beterima kasihka peluang nyadi pangan Petara? Abraham enggau Jop mengkang tetap ati ngagai Jehovah lebih ari seratus taun. Baka seduai iya, kitai mega enda tau enda mengkang tetap ati taja pan udah lama nyembah Jehovah. Baka Daniel, kitai patut ngenuluka kaul ti manah enggau Jehovah lebih ari nyawa diri empu. (Dan. 6:7, 10, 16, 22) Enggau saup ari Jehovah, kitai ulih tan natka penanggul lalu mengkang nyadi pangan Iya.—Plp. 4:13.

 7. (a) Nitihka Jaku Dalam 15:8, nama asai ati Jehovah lebuh ninga sampi kitai? (b) Baka ni Jehovah nyaut sampi kitai?

⁷ Siti agi pemeri ti enda ulih dipeda iya nya, besampi. Pangan ti rapat rindu bekunsi sereta madahka asai ati enggau pangan diri. Kati kitai enggau Jehovah baka nya? Au! Jehovah bejaku enggau kitai nengah Bup Kudus. Iya madahka runding sereta asai ati Iya nengah Bup Kudus. Kitai berandau enggau Iya nengah sampi, lalu ulih madahka runding sereta asai ati diri ngagai Iya. Jehovah tentu gaga ati lebuh ninga sampi kitai. (Bacha Jaku Dalam 15:8.) Ketegal Jehovah nya Pangan ti rinduka kitai, Iya mega nyaut sampi kitai. Kadang-kadang Iya jampat nyaut kitai. Tang bisi maya nya, kitai patut suah agi besampi  pasal siti-siti pekara. Taja pia, kitai pechaya Iya deka nyaut ba maya sereta enggau chara ti ngena. Saut ari Iya engka enda sama enggau utai ke disadang kitai. Ambika chunto, Iya engka enda muai penguji ke ditapi kitai, tang Iya meri kitai penemu-dalam enggau pengering ngambika “tan natka penguji nya.”—1 Kor. 10:13.

 8. Baka ni chara kitai beterima kasihka pemeri ulih besampi?

⁸ Baka ni chara kitai beterima kasihka pemeri ulih besampi? Siti chara nya, kitai ngasika iring ari Jehovah ke ngasuh kitai “seruran besampi.” (1 Tes. 5:17) Jehovah enda ngansak kitai besampi. Iya bebasaka hak kitai ti ulih bibas milih lalu meransang kitai “majak besampi.” (Rom. 12:12) Nya alai, kitai patut suah besampi ninting hari kena nunjukka diri beterima kasihka pemeri nya. Dalam sampi, kitai mega patut nyebut terima kasih sereta muji Jehovah.—Mas. 145:2, 3.

 9. Baka ni asai ati seiku menyadi lelaki pasal sampi, lalu baka ni asai ati nuan pasal sampi?

⁹ Lama agi kitai nyembah Jehovah, mayuh agi peluang kitai ulih meda chara Iya nyaut sampi kitai. Tu ngasuh kitai deka agi beterima kasihka pemeri ulih besampi. Ambika chunto, menyadi lelaki ke benama Chris udah gawa penuh jam ke Jehovah pengelama 47 taun. Ku iya: “Aku rindu besampi ngagai Jehovah maya tumu pagi. Maya nya, semua utai agi sunyi. Lebuh aku meda mata panas niki sereta manchar ngagai ai embun, tu ngasuh aku beterima kasih ke semua pemeri ari Iya, ti nyengkaum peluang ulih besampi. Pengudah besampi sebedau tinduk, aku ulih berasai lantang ketegal ngembuan ati ti beresi.”

10. Nama kebuah kitai ngumbai roh kudus Jehovah amat berega?

¹⁰ Siti agi pemeri ti enda ulih dipeda iya  nya, roh kudus. Jesus ngasuh kitai terus minta roh kudus ngena sampi. (Luk. 11:9, 13) Nengah roh kudus, Jehovah meri kitai “kuasa ti besai” sereta nulung kitai tan natka penguji.—2 Kor. 4:7; SKR. 1:8.

11. Baka ni roh kudus nulung kitai?

¹¹ Roh kudus ulih nulung kitai ngemansangka pengelandik enggau penau ngambika ulih bejalaika tanggung pengawa ke diberi Jehovah. Enti kitai bulih asil ti manah, kitai nemu tu ketegal saup ari roh kudus Jehovah.

12. Nitihka Masmur 139:23, 24, kitai ulih minta roh kudus nulung kitai ngereja nama?

¹² Siti agi chara kitai nunjukka roh kudus Petara berega ba kitai iya nya, minta Jehovah meresa runding tauka pengingin ba ati kitai. (Bacha Masmur 139:23, 24.) Enti kitai besampika nya, Jehovah nulung kitai nemu bagi runding tauka pengingin ti salah nengah roh kudus Iya. Lalu enti kitai nemu diri bisi runding tauka pengingin ti salah, kitai patut besampi minta roh kudus Petara meri kitai pengering kena ngelaban nya. Enggau tu, Jehovah ulih meda kitai bebendar nyeliahka sebarang utai ti salah ngambika kitai tau terus nerima roh kudus Iya.—Eps. 4:30.

13. Baka ni kitai deka agi beterima kasihka roh kudus?

¹³ Lebuh kitai berundingka utai ke udah mujur digaga roh kudus kemayaharitu, kitai deka agi beterima kasihka pemeri tu. Sebedau niki ke serega, Jesus madah ngagai bala murid iya: ‘Kita deka nerima kuasa lebuh roh kudus udah nurun atas kita, lalu kita deka nyadi saksi aku . . . ngagai ujung dunya.’ (SKR. 1:8) Tu meh utai ke nyadi diatu. Enggau saup ari roh kudus, kira-kira lapan setengah juta iku orang di serata dunya udah nyadi penyembah Jehovah. Kitai mega bebaik sereta beserakup enggau pangan diri. Nya ketegal roh kudus nulung kitai ngemansangka “buah roh kudus” baka  pengerindu, pengaga, pemaik, pengeliat ati, penyiru, pemadas, pengarap, penelap, enggau ulah ti ulih nagang diri. (Gal. 5:22, 23) Roh kudus endang pemeri ti chukup berega ari Jehovah!

14. Sapa ke sama bekereja enggau kitai ba pengawa nginjil?

¹⁴ Siti agi pemeri ke enda ulih dipeda iya nya, ulih “sama bekereja” enggau Jehovah sereta gerempung Iya ba serega. (2 Kor. 6:1) Ku Paul, semua orang ke enggau pengawa nginjil nya ‘sama bekereja enggau Petara.’ (1 Kor. 3:9) Lalu kitai mega sama bekereja enggau Jesus lebuh nginjil laban Jesus ngasuh bala murid iya ‘bejalai ngagai semua bansa lalu gaga sida nyadi murid’ iya. Jesus mega besemaya: “Aku deka seruran enggau kita.” (Mat. 28:19, 20) Lalu kitai mega beterima kasih ngagai bala melikat ke ngiring kitai lebuh kitai nusui “Berita Manah ti meruan belama iya . . . ngagai orang ke diau di dunya”!—Pem. 14:6.

15. Padahka siti chunto ari Bup Kudus ti nunjukka Jehovah bisi enggau ba pengawa nginjil.

¹⁵ Nama dijapai kitai ketegal saup ari Jehovah, Jesus, sereta bala melikat? Sekeda orang ke ninga engka nerima berita manah lalu ngaga pemansang ba pengarap. (Mat. 13:18, 23) Sapa ke ngasuh sida mansang ba pengarap? Jesus madahka, nadai orang ulih nyadi murid iya enti “Apai . . . enda mai iya.” (Jhn. 6:44, Bup Kudus Berita Manah Ka Rebak Diatu) Bup Kudus bisi siti chunto pasal pekara tu. Lebuh Paul ba luar nengeri Pilipi, iya nginjil ngagai seraban orang indu. Bup Kudus nyebut pasal seiku ari sida ke benama Lidia: ‘Jehovah muka ati iya, ngasuh iya keran deka mendingka utai ti disebut Paul.’ (SKR. 16:13-15) Baka Lidia, bejuta iku orang udah dibai Jehovah nyadi murid Jesus.

16. Sapa ke patut nerima mulia enti kitai mujur ba pengawa nginjil?

¹⁶ Sapa ke patut nerima mulia enti kitai mujur ba pengawa nginjil? Paul nyaut tanya nya lebuh iya nulis surat ngagai bala menyadi ba Korint: ‘Aku nanam, Apollos manjah, tang Petara ti ngasuh utai nya tumbuh. Nya alai, iya ke nanam, enggau iya ke manjah, sama nadai tentu guna. Semina Petara aja ke ngasuh utai nya tumbuh.’ (1 Kor. 3:6, 7) Baka Paul, kitai patut seruran meri mulia ngagai Jehovah enti kitai mujur ba pengawa nginjil.

17. Baka ni kitai nunjukka diri beterima kasihka peluang ulih “sama bekereja” enggau Jehovah, Jesus sereta bala melikat?

¹⁷ Baka ni kitai nunjukka diri beterima kasihka peluang ulih “sama bekereja” enggau Jehovah, Jesus sereta bala melikat? Chara nya, enggau ransing ngiga peluang bekunsika berita manah ngagai orang ke ditemu kitai. Bisi mayuh chara ulih dikena kitai, baka nginjil “di mua orang mayuh” enggau “ari rumah sebuah ngagai rumah sebuah.” (SKR. 20:20) Mayuh bala menyadi mega rindu nginjil enggau chara ti enda formal. Lebuh betemu enggau orang ke enda dikelala, sida nguji berandau manah enggau sida. Enti orang nya deka berandau, nya baru sida berengkah bekunsi pasal berita manah ari Bup Kudus.

18-19. (a) Baka ni chara kitai ngajar orang pemendar? (b) Padahka siti chunto ke nunjukka Jehovah nulung seiku pemelajar Bup Kudus.

¹⁸ Ketegal kitai ‘sama bekereja enggau Petara,’ kitai ukai semina nginjil tang mega ngajar orang pemendar. Enti orang bisi ati deka nemu mayuh agi pasal pemendar, kitai enggau naka ulih datai baru berandau enggau iya tauka ngasuh menyadi bukai belajar  Bup Kudus enggau iya. Kitai gaga ati lebuh meda Jehovah nulung pemelajar Bup Kudus ngubah chara berunding sereta asai ati diri.

¹⁹ Peratika chunto pasal seiku lelaki ke benama Raphalalani ari Afrika Selatan. Iya nyadi manang. Iya rindu belajarka Bup Kudus. Tang iya tusah deka nerima ajar Bup Kudus pasal enda tau bejaku enggau bala peturun ke udah mati. (U-dat. 18:10-12) Belubah-lubah, iya ngawakka Petara ngubah runding iya. Asil iya, Raphalalani badu agi nyadi manang lalu iya lenyau penatai pemisi. Diatu, iya beumur 60 taun lalu ku iya: “Aku beterima kasih ngagai Saksi-Saksi Jehovah ke udah suah nulung aku, baka nulung aku ngiga kereja. Kelebih agi, aku beterima kasih ngagai Jehovah ketegal nulung aku ngubah pengidup diri ngambika ulih nginjil lalu dibaptisa nyadi Saksi Jehovah.”

20. Nama utai ke deka digaga nuan enggau bebendar agi?

²⁰ Ba artikel tu, kitai udah berandauka empat iti pemeri ti enda ulih dipeda. Siti ari empat iti pemeri ke pemadu berega iya nya, ulih nyadi pangan Jehovah. Tu nulung kitai bulih penguntung ari pemeri ti bukai, iya nya ulih besampi ngagai Jehovah, bulih saup ari roh kudus, sereta nerima sukung ari Jehovah, Jesus enggau bala melikat ba pengawa nginjil. Aram meh kitai bebendar agi beterima kasihka empat iti pemeri tu. Lalu anang ngetu beterima kasih ngagai Jehovah ketegal Iya nyadi Pangan ti badas.