1. Nama kebuah semua kitai begunaka pengelantang?

 SEMUA kitai begunaka pengelantang. Pengidup kitai engka penuh enggau pengirau, ati ti asa, sereta pemerinsa. Kitai engka merinsa ketegal sakit, majak tuai, tauka udah lenyau orang ti dikesayauka kitai. Sekeda ari kitai diperinsa orang bukai. Nambahka nya, kitai dikelingi orang ke majak mangah. Amat, “mayuh macham penusah nyadi” nunjukka kitai benung idup “ba hari ti penudi” lalu ninting hari kitai majak semak enggau dunya baru. (2 Tim. 3:1) Tang, kitai udah lama nganti Jehovah ngamatka semaya Iya, lalu kitai engka majak napi mayuh penanggul. Nya alai, dini kitai ulih tetemuka pengelantang?

2, 3. (a) Nama ditemu kitai pasal Habakuk? (b) Nama kebuah kitai deka mansik bup Habakuk?

² Kena nyaut tanya tadi, aram kitai mansik bup Habakuk.  Taja pan Bup Kudus nadai madah mayuh utai pasal pengidup Habakuk, tang bup ke ditulis iya amat meransang ati kitai. Nama Habakuk engka mai reti “Merap enggau Pengerindu.” Tu nunjukka chara Jehovah ngelantangka ati kitai. Iya baka ke merap kitai enggau pengerindu. Tauka nya mega nunjukka kitai bepegai tegut ba Iya. Habakuk berandau enggau Jehovah, lalu nanya Iya pasal sekeda utai. Nengah iring roh kudus, Jehovah ngasuh Habakuk nulis randau nya laban Jehovah nemu kitai deka bulih penguntung ari randau nya.—Hab. 2:2.

³ Bup Kudus nadai ngembuan mayuh penerang pasal Habakuk, semina randau iya ke balat tusah ati enggau Jehovah aja. Tang bup Habakuk nya sebagi ari “semua utai ti udah ditulis dulu kelia” dalam Jaku Petara, “ngambika ulih pengeliat ati kitai enggau ulih peransang ari Bup Kudus, kitai bisi pengadang.” (Rom. 15:4) Baka ni bup Habakuk ulih nulung tiap iku kitai? Bup nya nulung kitai nemu reti bepanggai ba Jehovah. Lalu utai ke dipadah Habakuk ngasuh kitai andal, kitai ulih ngembuan pengelantang ba ati enda ngira nama penanggul tauka penguji ke nuntung kitai.

 4. Nama kebuah Habakuk balat tusah ati?

⁴ Bacha Habakuk 1:2, 3. Habakuk idup ba maya ti balat tusah. Habakuk dikelingi orang ti jai sereta mangah, lalu nya ngasuh iya balat tusah ati. Ba dini-dini endur, iya meda orang Judah jai sereta enda lurus enggau pangan diri. Habakuk berunding: ‘Kemaya penyai tu deka nadai agi? Nama kebuah Jehovah lubah mutarka penyai?’ Habakuk nadai daya. Nya alai, iya minta Jehovah mutarka pekara nya. Habakuk engka berengkah ngumbai Jehovah enda agi ibuhka nembiak Iya tauka ngumbai Jehovah enda mutarka pekara nya. Kala nuan ngasaika nya?

 5. Nama ulih dipelajarka kitai ari bup Habakuk? (Peda gambar ba pun artikel.)

⁵ Kati tanya ari Habakuk nunjukka iya badu bepanggai ba Jehovah enggau semaya Iya? Tentu enda! Habakuk minta Jehovah nulung iya mutarka penusah sereta ati iya ti kakang. Tu nunjukka Habakuk enda putus pengarap, tang agi bepanggai ba Jehovah. Habakuk amat irau sereta charut runding. Iya enda meretika kebuah Jehovah bedau nulung iya lalu nejuka iya balat merinsa. Lebuh Jehovah ngasuh Habakuk nulis pasal pengirau iya nengah iring roh kudus, Jehovah ngajar kitai utai ti beguna. Kitai anang nangi madah ngagai Jehovah pasal utai ti ngirauka ati kitai tauka utai ti ngasuh kitai kakang ati. Tang, Iya enggau siru ngasuh kitai besampi, lalu madahka utai ke amat ba ati kitai ngagai Iya. (Mas. 50:15; 62:8) Jaku Dalam 3:5  meransang semua kitai: ‘Panggaika diri ba Jehovah enggau pengabis ati nuan. Anang manggaika diri ba penemu diri empu.’ Habakuk nitihka ayat tu ba pengidup iya.

 6. Nama kebuah nya beguna besampi?

⁶ Habakuk bepanggai ba Jehovah, ke nyadi Pangan sereta Apai iya. Iya empu dulu semak enggau Jehovah. Lebuh Habakuk irau enggau utai ke ditapi iya, iya enda diau diri aja tauka nguji mutarka pekara nya kediri empu. Tang iya besampi madahka asai ati diri sereta utai ti ngirauka ati. Tu teladan ti manah ke kitai. Jehovah ninga sampi kitai. Iya deka kitai nunjukka diri bepanggai ba Iya nengah sampi, lalu madah ngagai Iya utai ti ngirauka ati kitai irau. (Mas. 65:2) Enggau tu, kitai deka meda baka ni Jehovah nyaut sampi kitai. Kitai tentu ulih ngasaika Iya merap kitai enggau pengerindu lebuh Iya ngiring sereta ngelantangka ati kitai. (Mas. 73:23, 24) Enda ngira nama pemerinsa ke ditapi kitai, Jehovah deka nulung kitai nemu runding Iya pasal utai ke ditapi kitai. Besampi ngagai Jehovah nya siti chara ti pemadu manah kena nunjukka kitai bepanggai ba Iya.

 7. Nama digaga Jehovah pengudah Habakuk madahka pengirau ati iya?

⁷ Bacha Habakuk 1:5-7. Pengudah Habakuk madahka pengirau ati iya ngagai Jehovah, Habakuk engka berundingka utai ti deka digaga Jehovah. Ketegal Jehovah nya Apai ti bisi pengerindu, Iya ulih meretika asai ati Habakuk. Iya nemu Habakuk merinsa lalu minta tulung ari Iya. Nya alai Jehovah enda nganu Habakuk, tang Iya madah ngagai Habakuk pasal utai ti deka digaga Iya ba orang Judah ke enda tetap ati. Habakuk engka orang ti keterubah alai Jehovah madah pasal Iya ke enda lama da agi deka ngukum orang Judah.

 8. Nama kebuah saut ari Jehovah ukai utai ti disadang Habakuk?

⁸ Jehovah madah ngagai Habakuk pasal Iya ke udah sedia deka nulung. Iya deka ngukum orang Judah ti mangah sereta jai. Enggau madahka pengawa ngukum nya deka nyadi “lebuh rambau kita,” Jehovah nunjukka pengawa nya deka datai maya jeman Habakuk tauka orang Judah nya. Saut ari Jehovah nya enda disadang Habakuk. Orang Babilon balat jai. Sida mangah agi ari orang Judah ke nemu standard Jehovah. Nya alai nama kebuah Jehovah ngena bansa ke enda arapka Iya sereta jai nya ngukum nembiak Iya? Tu semina nambahka pemerinsa orang Judah. Enti sema nuan nya Habakuk, nama asai ati nuan?

 9. Nama utai bukai ke ditanya Habakuk?

⁹ Bacha Habakuk 1:12-14, 17. Taja pan Habakuk nemu Jehovah nyau ngena orang Babilon ngukum orang jai ke ngelingi iya, Habakuk agi charut runding. Tang iya baruh ati lalu keran deka terus bepanggai ba Jehovah. Indah, iya madahka Jehovah terus nyadi “Penyaga” iya. (U-dat. 32:4; Isa. 26:4) Habakuk pechaya Petara bisi pengerindu sereta siru. Tu ngasuh Habakuk enda nangi nanya pasal utai bukai ngagai Jehovah. Ku iya: Nama kebuah Jehovah ngelakka utai ba menua Judah majak jai, lalu nejuka nembiak Iya balat agi merinsa? Nama kebuah Jehovah enda mutarka penusah tekala nya? Nama kebuah Petara ti  Pemadu Bekuasa “enda bemunyi” lalu nejuka penyai nyadi ba dini-dini endur? Jehovah nya ‘Kudus’ lalu ‘mata Iya kelalu kudus merening ngagai penyai.’ Nya alai nama kebuah Iya nejuka utai nya nyadi?

10. Nama kebuah kitai kadang-kadang ngasaika utai ti diasaika Habakuk?

¹⁰ Kadang-kadang kitai ngasaika utai ti diasaika Habakuk. Kitai mendingka Jehovah. Kitai bepanggai ba Iya, macha sereta belajarka Bup Kudus, laban tu ulih negapka pengadang kitai. Kitai mega ninga pasal semaya Iya nengah iring ti diberi gerempung Iya. Tang kitai engka agi berunding, ‘Kemaya pemerinsa kitai deka nadai agi?’ Kitai ulih belajar ari utai ti deka digaga Habakuk.

11. Nama utai ti keran digaga Habakuk?

¹¹ Bacha Habakuk 2:1. Randau Habakuk enggau Jehovah meri Habakuk pengelantang ba ati. Tu ngasuh iya keran nganti Jehovah datai nulung. Ku Habakuk nyebut baru pasal pengeran iya: “Aku deka diau jenoh nganti penatai hari nya.” (Hab. 3:16, Bup Kudus Berita Manah Ka Rebak Diatu) Nembiak Jehovah ti tetap ati ke bukai mega terus liat ati nganti Iya nulung sida. Teladan sida meransang ati kitai laban tu nunjukka kitai mega ulih ngereja utai ti sama.—Mik. 7:7; Jas. 5:7, 8.

12. Nama ulih dipelajarka kitai ari Habakuk?

¹² Nama ulih dipelajarka kitai ari pengeran Habakuk? Kesatu, kitai anang badu besampi ngagai Jehovah enda ngira nama penanggul ke ditapi kitai. Kedua, kitai patut ningaka utai ti dipadah Jehovah nengah Jaku Iya sereta gerempung Iya. Lalu ketiga, kitai patut liat ati nganti Jehovah nulung kitai sereta pechaya Iya deka muai pemedis ke ditapi kitai ba maya ti udah diletak Iya. Enti kitai neladan Habakuk, kitai deka ngembuan pengelantang ba ati lalu ulih betan. Pengadang deka nulung kitai liat ati sereta gaga enda ngira nama penanggul ke ditapi kitai. Kitai pechaya Apai kitai ti di serega deka nulung kitai.—Rom. 12:12.

13. Baka ni Jehovah ngelantangka ati Habakuk?

¹³ Bacha Habakuk 2:3. Jehovah tentu lantang ati enggau Habakuk ti deka nganti Iya datai nulung. Petara ti Pemadu Bekuasa nemu pemerinsa ke diasaika Habakuk. Nya kebuah Iya ngelantangka ati nabi nya lalu madahka Diri deka nyaut tanya iya ti ari ati. Enda lama agi Habakuk deka nadai agi pengirau. Jehovah baka ke madah ngagai Habakuk: “Sabar meh lalu bepanggai ba Aku. Aku deka nyaut sampi nuan, taja pan utai nya baka ke lama dianti.” Jehovah ngingatka Habakuk, Iya udah netapka maya Iya deka ngamatka semaya Diri. Nya alai  Iya meransang Habakuk terus nganti. Pengujung iya, Habakuk enda berasai asa ati.

14. Nama utai ti keran deka digaga kitai lebuh napi pemerinsa?

¹⁴ Kitai patut nganti Jehovah datai nulung kitai. Kitai mega patut ningaka enggau manah utai ti dipadahka Iya. Udah nya, kitai deka bisi pengandal sereta pengelantang ba ati enda ngira nama pemerinsa ke ditapi kitai. Jesus meransang kitai enda beberatka “maya tauka musin” ti enda dipadahka Petara ngagai kitai. (SKR. 1:7) Kitai patut arap, Jehovah nemu maya ti ngena deka nulung. Nya alai, kitai anang badu nganti. Kitai patut baruh ati sereta sabar, lalu arapka Petara. Seraya kitai nganti, kitai patut ngena jam enggau manah sereta enggau naka ulih gawa ke Jehovah.—Mrk. 13:35-37; Gal. 6:9.

15, 16. (a) Nama semaya ke ulih ditemu kitai ba bup Habakuk? (b) Nama ulih dipelajarka kitai ari semaya nya?

¹⁵ Jehovah besemaya: “Orang ke lurus deka idup ngena pengarap sida,” lalu ‘dunya deka penuh laban penemu pasal mulia Jehovah.’ (Hab. 2:4, 14) Au, Jehovah besemaya meri pengidup ti meruan belama iya ngagai orang ti liat ati sereta bepanggai ba Iya.

¹⁶ Semaya ke dipadah ba Habakuk 2:4 endang beguna bendar nya kebuah rasul  Paul tiga kali nyebut semaya nya dalam surat iya! (Rom. 1:17; Gal. 3:11; Heb. 10:38) Kitai pechaya, enda ngira nama pemerinsa ke ditapi kitai, kitai ulih meda semaya Iya dikeamatka enti kitai bepanggai ba Iya. Jehovah deka kitai ngemeratka pengadang kitai ke jemah ila.

17. Nama semaya Jehovah ke kitai enti kitai bepanggai ba Iya?

¹⁷ Bup Habakuk bisi jaku ajar ti beguna ngagai semua kitai ke benung idup ba hari ti penudi. Jehovah besemaya meri pengidup ti meruan belama iya ngagai orang ti lurus ke bepanggai ba Iya. Nya alai aram meh kitai terus negapka pengarap sereta bepanggai ba Petara, enda ngira nama penanggul enggau pengirau ke ninggang kitai. Utai ti dipadah Jehovah ngagai Habakuk ngasuh kitai andal, Iya deka nyukung lalu nyelamatka kitai. Jehovah ngasuh kitai bepanggai ba Iya sereta liat ati nganti maya alai Perintah Iya merintah bumi datai. Maya nya ila, bumi deka penuh enggau orang ti gaga ati sereta rinduka pemaik nyembah Jehovah.—Mat. 5:5; Heb. 10:36-39.

18. Baka ni jaku Jehovah ngelantangka ati Habakuk?

¹⁸ Bacha Habakuk 3:16-19. Utai ti dipadah Jehovah ngagai Habakuk amat ngelantangka ati iya. Habakuk belematika utai ti ngalitka ati ke udah digaga Jehovah ke nembiak Iya kelia menya. Ketegal nya, Habakuk bepanggai agi ba Jehovah. Habakuk pechaya enda lama agi Jehovah deka nulung iya! Tu ngasuh Habakuk lantang ati taja pan iya nemu diri agi patut natka pemerinsa enda lama. Habakuk nadai agi kakang ati. Tang iya enggau pengabis ati arapka Jehovah deka nyelamatka iya. Indah, utai ke disebut Habakuk ba ayat 18 nya siti ari jaku ke ngayanka pengandal ti pemadu besai dibacha kitai ba Bup Kudus. Sekeda pakar Bup Kudus pechaya, ayat nya mai reti: “Aku deka merejuk gaga ati ketegal Tuan; Aku deka betanda gaga ati ketegal Petara.” Semua kitai bulih penguntung ari utai ti dipelajar tu! Jehovah ukai semina meri kitai semaya ti ngerinduka ati ke dudi hari ila, tang ngambika kitai andal, Iya mega nunjukka enda lama da agi Iya deka ngamatka semaya nya.

19. Baka Habakuk, baka ni Jehovah ngelantangka ati kitai?

¹⁹ Utai ti beguna ke dipelajarka kitai ari bup Habakuk iya nya bepanggai ba Jehovah. (Hab. 2:4) Ngambika terus bepanggai ba Iya, kitai patut negapka kaul enggau Iya. Nya alai tu utai ti enda tau enda digaga kitai. (1) Terus besampi, padahka semua pengirau sereta pemerinsa ke ditapi kitai ngagai Jehovah. (2) Pendingka enggau manah utai ti dipadah Jehovah ngagai kitai dalam Bup Kudus, sereta nitihka iring ke diberi nengah gerempung Iya. (3) Tetap ati sereta liat ati seraya kitai nganti Jehovah ngamatka semaya Iya. Tu meh utai ke digaga Habakuk. Taja pan iya balat tusah ati, tang pengudah iya berandau enggau Jehovah, iya berasai diperansang sereta gaga ati! Enti kitai neladan Habakuk, kitai mega deka bulih pengelantang ba ati ari Apai kitai ti di serega, Jehovah. Tu baka ke diberap Jehovah enggau pengerindu. Kitai nadai bulih pengelantang ke baka tu ari dunya ti jai tu.