1. Nama utai ti dikemendarka Jehovah gaga kitai?

 JEHOVAH ngemendarka kitai ngaga pemutus dalam pengidup kitai empu. Iya ngajar kitai chara ngaga pemutus enggau manah. Lebuh kitai ngaga pemutus ti ngelantangka ati Iya, Iya ulih nulung kitai mujur. (Mas. 119:173) Nya alai lebuh kitai ngena penemu ari Bup Kudus, kitai ulih ngaga pemutus enggau manah agi.—Heb. 5:14.

 2. Nama penanggul ke engka ditapi kitai pengudah ngaga pemutus?

² Indah lebuh kitai udah ngaga pemutus enggau manah, kitai engka tusah deka nembuka pengawa ti udah diperambu kitai. Ambika chunto: Seiku menyadi Kristian lelaki ke agi biak ngaga pemutus deka macha Bup Kudus. Iya mujur ngereja nya beberapa minggu, tang udah nya iya nyau ngetu macha. Seiku menyadi Kristian indu ngaga pemutus deka nyadi pengerintis, tang iya suah betangguh deka berengkah ngereja nya. Bala tuai gempuru ngaga pemutus deka suah agi ngereja pengawa datai meransang bala menyadi ba eklisia. Tang beberapa bulan udah nya, sida enda agi ngereja nya. Taja pan tiga iti chunto nya bebida, tang bisi siti utai ke sama. Sida ngaga pemutus tang enda nembuka pengawa ti udah diperambu sida. Orang Kristian di Korint ba abad keterubah mega napi penanggul ti sebaka. Aram kitai berandauka utai ke ulih dipelajar ari sida.

 3. Nama pemutus ke digaga bala menyadi ba Korint? Tang nama penyadi?

³ Ba urung 55 M., bala menyadi ba Korint ngaga siti pemutus ti berat. Sida nemu bala menyadi ba Jerusalem enggau Judea napi penanggul sereta balat seranta. Lalu bala menyadi ari eklisia bukai benung ngumpul duit kena nulung bala menyadi ke seranta. Bala menyadi ba Korint manah ati sereta gerah jari. Sida mega berunding deka nulung bala menyadi ke seranta. Nya alai sida nanya rasul Paul chara sida tau nulung. Paul meri iring ngagai sida lalu milih Titus nulung sida ngumpul duit.  (1 Kor. 16:1; 2 Kor. 8:6) Tang beberapa bulan udah nya, Paul nyau nemu, bala menyadi ba Korint bedau agi ngumpul duit. Ketegal tu, pemeri sida enggau pemeri ari bala menyadi ke bukai enda ulih dianjung ngagai Jerusalem ba maya ti udah ditetapka.—2 Kor. 9:4, 5.

 4. Baka ke dipadah ba 2 Korint 8:7, 10, 11, nama utai ti diasuh Paul gaga bala menyadi ba Korint?

⁴ Bala menyadi ba Korint udah ngaga pemutus enggau manah. Paul muji pengarap sida ti tegap sereta ulah sida ti keran deka gerah jari. Tang Paul mega meransang sida nembuka pengawa ti udah diperambu sida. (Bacha 2 Korint 8:7, 10, 11.) Ari peneleba sida kitai nemu, indah orang Kristian ke tetap ati engka tusah deka nembuka utai ti udah diperambu sida.

 5. Nama tanya ke patut disaut kitai?

⁵ Baka bala menyadi ba Korint, kitai engka tusah deka ngereja utai ti udah diperambu kitai. Nama kebuah? Ketegal enda sempurna, kitai engka deka betangguh ngereja siti-siti pengawa. Tauka utai ti enda disadang engka nyadi lalu ngasuh kitai tusah deka nembuka pengawa kitai. (P-jar. 9:11; Rom. 7:18) Baka ni kitai ulih meresa siti-siti pemutus ke udah digaga, lalu nentuka sekalika pemutus nya patut diubah tauka enda? Lalu baka ni nentuka diri ulih mujur nembuka pengawa ti udah diperambu kitai?

 6. Kemaya kitai engka patut ngubah siti-siti pemutus?

⁶ Sekeda pemutus ke udah digaga enda diubah kitai. Ambika chunto, kitai mutuska diri deka nyembah Jehovah sereta keran deka tetap ati ngagai kaling pengidup kitai. (Mat. 16:24; 19:6) Tang bisi sekeda pemutus patut diubah kitai. Nama kebuah? Laban gaya pengidup kitai ulih berubah. Nama ulih nulung kitai ngaga pemutus enggau manah agi?

 7. Nama patut disampi kitai, lalu nama kebuah?

⁷ Besampi minta penemu-dalam. Jehovah ngena roh kudus Iya ngasuh James nulis: ‘Enti kita [“kurang,” NWT] penemu-dalam, pinta ngagai Petara ke meri enggau gerah mudah.’ (Jas. 1:5) Ba sekeda pekara, penemu-dalam kitai amat kurang. Nya alai, besampi meh ngagai Jehovah ngambika Iya nulung nuan ngaga pemutus tauka ngubah pemutus ke udah digaga nuan. Nya baru Jehovah deka mantu nuan ngaga pemutus ti manah.

 8. Nama pansik ke patut digaga kitai sebedau ngaga pemutus?

⁸ Gaga pansik enggau silik. Giga iring ari Bup Kudus enggau litaricha ke disediaka gerempung kitai sereta bejaku enggau orang ke ulih meri nuan jaku lalau. (J-lam. 20:18) Pengawa ngaga pansik beguna sebedau ngaga pemutus bekaul enggau nukar kereja, pindah ngagai endur bukai, tauka milih bidang pelajar ke ulih nulung nuan ngiga belanja lalu ulih terus nyembah Jehovah.

 9. Nama asil ke diulih enti kitai lurus enggau diri empu?

⁹ Meresa tuju ngaga siti-siti pemutus. Jehovah deka nemu tuju kitai ngereja siti-siti pekara. (J-lam. 16:2) Iya deka kitai lurus ba semua pekara. Nya alai lebuh ngaga pemutus, kitai deka lurus enggau diri empu sereta orang bukai pasal tuju kitai ngereja pengawa nya. Enti kitai enda tentu lurus, kitai engka tusah nitihka pemutus ke udah digaga kitai. Ambika chunto, seiku menyadi Kristian lelaki ke agi biak engka ngaga pemutus deka nyadi pengerintis. Tang enda lama udah nya, iya tusah deka nembuka jam ba pengawa nginjil. Iya nyau enda tentu agi gaga ati nyadi pengerintis. Iya engka ngumbai tuju iya nyadi pengerintis nya ketegal iya deka ngelantangka ati Jehovah. Tang ke amat, iya engka ngereja nya ketegal deka ngelantangka ati apai indai iya tauka orang bukai.

10. Nama patut bisi ba kitai enti deka ngaga ubah?

 ¹⁰ Peratika chunto pasal seiku pemelajar Bup Kudus ke deka badu nginsap. Iya nguji enda nginsap pengelama seminggu tauka dua, taja pan nya tusah ba iya. Tang udah nya iya nginsap baru. Taja pia nyau kelama, iya ulih badu nginsap! Pengerindu ke Jehovah enggau pengeran ke deka ngelantangka ati Jehovah udah nulung iya mujur muai pengawa ke enda manah nya.—Kol. 1:10; 3:23.

11. Nama kebuah kitai patut bisi tuju ti nyemetak?

¹¹ Bisi tuju ti nyemetak. Tu deka nulung nuan senang agi nembuka pengawa ke udah diperambu nuan. Ambika chunto, nuan engka berunding deka suah agi macha Bup Kudus. Tang enti nadai jadual ti nyemetak, nuan engka tusah deka ngereja nya. b Tauka bala tuai gempuru engka berunding deka suah agi ngereja pengawa datai meransang bala menyadi Kristian, tang enda lama udah nya, sida enda nitihka utai ti udah diperambu sida. Ngambika ulih mujur, sida ulih nanya sekeda tanya tu: “Sapa ke begunaka peransang? Kati kitai udah netapka jam alai kitai ulih datai meransang sida?”

12. Nama utai ke engka patut digaga kitai, lalu nama kebuah?

¹² Nemu tatak diri. Nadai seiku ari kitai bisi chukup awak, utai, tauka pengering kena ngereja semua utai ti dikedekaka kitai. Nya alai, kitai patut nemu tatak diri. Enti pia, nuan tau ngubah pemutus ke udah digaga enti nuan nemu diri sigi enda ulih nembuka pengawa nya. (P-jar. 3:6) Enti nuan meresa baru pemutus ke udah digaga lalu ngaga ubah ti patut, nuan engka ngasaika diri ulih nembuka pengawa ti udah diperambu. Peratika lima iti chara ke ulih nulung nuan nembuka pengawa ti udah diperambu nuan.

13. Baka ni nuan tau bulih pengering kena ngereja pengawa ti udah diperambu nuan?

¹³ Besampi minta pengering ngambika ulih nembuka pengawa ti udah diperambu. Jehovah ulih meri nuan pengering kena ngereja pengawa ti udah diperambu nuan. (Plp. 2:13) Nya alai besampi meh minta roh kudus ari Jehovah ngambika Iya ulih meri nuan pengering kena ngereja nya. Anang ngetu besampi enti nuan ngasaika sampi nuan bedau disaut. Jesus madahka enti kitai enda ngetu minta, kitai deka bulih roh kudus.—Luk. 11:9, 13.

14. Baka ni prinsip ba Jaku Dalam 21:5 ulih nulung nuan nembuka pengawa ti udah diperambu nuan?

¹⁴ Ngaga pelan. (Bacha Jaku Dalam 21:5.) Kena nembuka siti-siti pengawa, nuan begunaka pelan tauka perambu. Udah nya nuan patut nitihka iya. Pia mega lebuh nuan ngaga pemutus, tuliska semua utai ke patut dikereja nuan ngambika ulih nembuka pengawa nya. Enti pengawa nya mar, pupuk ngereja iya ngambika nuan nyamai nembuka iya. Paul meransang bala menyadi ba Korint ngalau lalu naruh duit ba “hari ti keterubah tiap minggu” ari ke ngumpul duit nya maya iya datai dudi hari. (1 Kor. 16:2) Mupuk-mupuk ngereja pengawa ti mar mega ulih nyeliahka nuan ari irauka diri enda ulih nembuka pengawa nya.

15. Nama kebuah nya manah enti nuan nuliska utai ti deka digaga nuan?

¹⁵ Enti nuan nuliska utai ti deka digaga nuan, tu deka nulung nuan senang agi nembuka pengawa ti udah diperambu nuan. (1 Kor. 14:40) Ambika chunto, raban tuai gempuru diasuh milih seiku tuai gempuru ngambika nulis semua utai ke deka digaga bala tuai gempuru, nyengkaum sapa ke diasuh ngereja siti-siti pengawa lalu kemaya sida patut nembuka pengawa nya. Tu deka nulung sida senang agi nitihka  utai ti udah diperambu sida. (1 Kor. 9:26) Nuan mega ulih ngereja utai ti sebaka lebuh nuan deka ngaga siti-siti pengawa ba pengidup besehari-sehari. Ambika chunto, nuan ulih nuliska utai ke deka digaga nuan ninting hari lalu nentuka utai ke deka digaga nuan dulu sehari nya. Tu ukai aja nulung nuan nembuka utai ti udah diperambu nuan, tang mega nulung nuan ngereja mayuh agi utai.

16. (a) Nama patut digaga nuan enggau pengawa ti udah diperambu nuan? (b) Baka ni Rome 12:11 nunjukka nya amat?

¹⁶ Bebendar nembuka pengawa ti udah diperambu nuan. Anang lembau nitihka pelan sereta nembuka pengawa ti udah diperambu nuan. (Bacha Rome 12:11.) Paul ngasuh Timoti majak ngereja pengawa nyadi pengajar ti landik. Kitai mega ulih nitihka jaku lalau Paul lebuh ngereja sebarang pengawa ke Jehovah.—1 Tim. 4:13, 16.

17. Baka ni nuan ulih nitihka Epesus 5:15, 16 lebuh ngereja pengawa ti udah diperambu nuan?

¹⁷ Ngatur jam enggau manah. (Bacha Epesus 5:15, 16 enggau nota kaki ba Bup Kudus Baru.) Tetapka jam alai nuan deka nembuka pengawa ti udah diperambu nuan lalu anang ngubah iya. Anang betangguh. Nyeliah ari nganti maya ti ngena deka nembuka pengawa nya. (P-jar. 11:4) Anang ngelakka pengawa bukai ti enda tentu beguna masau jam enggau pengering nuan. (Plp. 1:10) Enti ulih, kereja pengawa nya lebuh nadai tentu utai nekul nuan. Padah ngagai orang, nuan benung kisuk. Tutup talipaun, lalu anang meresa email tauka media sosial maya nya. c

18-19. Nama ulih nulung nuan nembuka pengawa ti udah diperambu nuan taja pan nya enda senang dikereja?

¹⁸ Pikirka asil manah ti diulih. Asil ari pemutus ke digaga nuan ulih disemaka baka ngagai endur ke deka dituju nuan. Taja pan jalai ngagai endur ke dituju nuan ditutup, nuan tentu deka ngena jalai bukai ngambika ulih datai ba endur nya. Pia mega, enti kitai mikirka asil manah ke diulih pengudah nembuka siti-siti pengawa, kitai tentu enggai mantul lebuh napi utai ti tau nekul.—Gal. 6:9.

¹⁹ Ngaga pemutus ti manah sereta nembuka pengawa ti udah diperambu, ukai utai ti senang dikereja. Tang enggau saup ari Jehovah, nuan tau bulih penemu-dalam sereta pengering kena nembuka pengawa ti udah diperambu nuan.