1-2. Nama kebuah kitai engka ngasaika Jehovah enda nyaut sampi kitai?

 ‘GAGA ATI ke Jehovah, lalu Iya deka meri nuan utai ti dikinginka nuan.’ (Mas. 37:4) Nya semaya ti amat manah! Tang, kati kitai patut ngarapka Jehovah meri kitai semua utai ke dipinta kitai tekala nya? Nama kebuah tu tanya ti penting? Peratika sekeda chunto tu. Siku menyadi indu ke bedau kawin, besampi ngambika ulih enggau Sekula Penginjil Perintah Petara. Taja pia, pengudah beberapa taun, iya agi bedau dikangau. Siku menyadi lelaki ti biak bisi penyakit ti balat. Iya besampi minta Jehovah ngeraika iya ngambika iya ulih ngereja mayuh agi ke raban gempuru. Taja pia, pengerai iya enda berinsur manah. Apai indai besampi ngambika anak seduai iya mengkang ba pemendar. Tang anak seduai iya ngetu nyembah Jehovah.

² Nuan mega engka kala minta ari Jehovah sekeda utai, tang nuan bedau nerima nya. Ketegal nya, nuan engka ngumbai Jehovah semina nyaut sampi orang bukai, tang ukai sampi nuan. Tauka nuan engka ngumbai diri bisi ngereja penyalah. Nya meh utai ti diasaika siku menyadi indu ke benama Janice. b Iya enggau laki iya besampi ngagai Jehovah pasal pengingin seduai iya ti deka gawa ba Bethel. Ku iya: “Aku amat yakin kami duai deka dikangau gawa ba Bethel enda lama da agi.” Tang, taja pan beberapa taun udah belalu, seduai iya agi enda dikangau. Janice madahka: “Aku charut runding sereta tusah ati. Aku berunding, ‘Nama penyalah aku ngagai Jehovah?’ Aku bebendar besampi ngambika ulih gawa ba Bethel. Nama kebuah Iya agi bedau nyaut sampi aku?”

 3. Nama deka dikerandauka kitai dalam artikel tu?

 ³ Bisi maya iya, kitai engka berunding sekalika Jehovah ningaka sampi kitai tauka enda. Sekeda bala nembiak Jehovah kelia menya ti tetap ati mega kala berundingka utai tu. (Jop 30:20; Mas. 22:2; Hab. 1:2) Nama utai ke ngasuh nuan yakin Jehovah deka ningaka sampi nuan? (Mas. 65:2) Kena nyaut tanya nya, kitai patut berandauka sekeda utai tu dulu: (1) Nama deka dikereja Jehovah? (2) Nama utai ti dikearapka Jehovah ari kitai? (3) Nama kebuah kitai engka patut ngubah utai ke dipinta kitai?

 4. Nitihka Jeremiah 29:​12, Jehovah besemaya deka ngereja nama?

⁴ Jehovah besemaya deka ningaka sampi kitai. (Bacha Jeremiah 29:12.) Petara kitai rinduka kitai laban kitai nyembah Iya enggau tetap ati. Nya alai, Iya seruran deka ningaka sampi kitai. (Mas. 10:17; 37:28) Taja pia, tu ukai reti iya Jehovah deka meri kitai semua utai ke dipinta kitai. Sekeda ari utai ke dipinta kitai engka semina deka diterima kitai ba dunya baru.

 5. Nama utai ti diperundingka Jehovah lebuh Iya ningaka sampi kitai? Terangka.

⁵ Jehovah berundingka baka ni utai ke dipinta kitai bisi kaul enggau tuju Iya. (Isa. 55:​8, 9) Siti ari tuju Jehovah iya nya, ngambika dunya tu penuh enggau orang ti gaga ati sereta beserakup di baruh Perintah Iya. Tang Sitan madahka, mensia deka gaga agi ati enti sida merintah diri empu. (P-kal. 3:​1-5) Kena nunjukka utai ti dipadah Sitan nya bula, Jehovah udah nejuka mensia merintah diri empu. Lalu, kitai ulih meda perintah mensia udah ngasuh mayuh penanggul nyadi kemayaharitu. (P-jar. 8:9) Kitai nemu Jehovah enda muai semua penanggul nya diatu. Enti Iya ngereja nya, sekeda orang engka ngumbai perintah mensia ulih mutarka semua penanggul mensia.

 6. Nama kebuah kitai patut yakin Jehovah deka seruran ngereja utai enggau bepengerindu sereta lurus?

⁶ Jehovah engka nyaut sampi ti sama enggau chara ti bebida. Ambika chunto, lebuh Raja Hesekiah balat sakit, iya besampi minta Jehovah ngeraika iya. Jehovah nyaut sampi iya, lalu ngeraika iya. (2 Raj. 20:​1-6) Taja pia, lebuh Rasul Paul minta Jehovah muai “duri dalam isi,” engka penyakit ke dikembuan iya, Jehovah enda muai penanggul nya. (2 Kor. 12:​7-9) Peratika mega utai ti nyadi ngagai Rasul James enggau Rasul Peter. Raja Herod deka munuh seduai iya. Raban gempuru besampika Peter, lalu sida tentu besampika James mega. Taja pia, James diukum bunuh, tang siku melikat nyelamatka Peter. (SKR. 12:​1-11) Kitai engka berunding, ‘Nama kebuah Jehovah nyelamatka Peter tang enda nyelamatka James?’ Bup Kudus nadai madah kebuah iya, c tang kitai nemu semua jalai Jehovah “endang lurus magang.” (U-dat. 32:4) Lalu kitai nemu Jehovah rinduka Peter seduai James. (Pem. 21:14) Kekadang, Jehovah enda nyaut sampi kitai enggau chara ti dikedekaka kitai. Tang kitai yakin Jehovah seruran deka ngereja utai enggau bepengerindu sereta lurus. Nya alai, kitai enda mutap pasal chara ti dikena Iya nyaut sampi kitai.—Jop 33:13.

 7. Nama utai ti patut diseliahka kitai, lalu nama kebuah?

⁷ Kitai patut nyeliah ari mandingka situasi kitai enggau situasi orang bukai. Ambika chunto, kitai engka minta Jehovah nulung kitai nengah sesiti chara. Tang utai ke dipinta kitai enda disaut Jehovah. Udah nya,  kitai engka ninga orang bukai besampika utai ti sama, lalu Jehovah baka ke udah nyaut sampi sida. Nya meh utai ti nyadi ngagai Menyadi Anna. Iya besampi ngambika laki iya, Matthew, ulih gerai ari kanser. Ba maya ti sama, dua iku menyadi indu ti tuai agi pan bisi kanser. Anna bebendar besampika Matthew enggau dua iku menyadi indu nya. Dua iku menyadi indu nya ulih gerai, tang Matthew mati laban kanser nya. Tu ngasuh Anna berunding sekalika dua iku menyadi indu nya ulih gerai laban Jehovah nulung seduai iya. Enti pia, nama kebuah Jehovah enda nyaut sampi iya lalu nulung laki iya? Endang amat, kitai enda nemu nama kebuah dua iku menyadi indu nya ulih gerai. Tang kitai nemu, Jehovah deka ngujungka semua pemerinsa kitai. Iya mega keran deka ngangkatka bala pangan Iya idup baru.—Jop 14:15.

 8. (a) Nitihka Isaiah 43:​2, baka ni Jehovah nyukung kitai? (b) Baka ni sampi nulung kitai tan napi penguji ti tusah? (Peda video Sampi Nulung Kitai Tan Napi Penguji.)

⁸ Jehovah deka seruran nyukung kitai. Jehovah nya Apai kitai ti bepengerindu. Nya alai, Iya enggai meda kitai merinsa. (Isa. 63:9) Taja pia, Iya enda muai semua penanggul kitai, ke ulih disemaka baka ai ti dalam tauka api. (Bacha Isaiah 43:2.) Tang, Iya besemaya deka nulung kitai “bejalai nengah” penguji nya. Lalu, enda ngira nama penanggul ke ditapi kitai diatu, Iya deka nyediaka jalai ngambika kitai ulih terus nyembah Iya. Jehovah mega meri kitai kuasa kudus Iya ngambika kitai ulih tan. (Luk. 11:13; Plp. 4:13) Asil iya, kitai ulih yakin Iya deka seruran meri kitai utai ti diguna kitai ngambika ulih tan sereta mengkang tetap ati ngagai Iya. d

 9. Nitihka James 1:​6, 7, nama kebuah kitai patut arapka Jehovah deka nulung kitai?

⁹ Jehovah ngarapka kitai pechayaka Iya. (Heb. 11:6) Bisi maya iya, kitai ngasaika penanggul ke ditapi kitai amat besai. Tu engka ngasuh kitai kakang ati sekalika Jehovah deka nulung kitai tauka enda. Tang Bup Kudus madahka kitai, nengah kuasa kudus Petara, kitai ulih “ngalahka kuta.” (Mas. 18:29) Nyadi, ari ke kakang ati, besampi meh enggau ati ti andal lalu pechaya, Jehovah deka nyaut sampi kitai.—Bacha James 1:​6, 7.

10. Beri siti chunto kena nunjukka chara kitai ulih ngereja utai sejalai enggau sampi kitai.

¹⁰ Jehovah ngarapka kitai ngereja utai ti sejalai enggau sampi kitai. Ambika chunto, siku menyadi lelaki deka enggau konvensyen. Nyadi, iya minta tulung ari Jehovah ngambika ulih minta chuti ari tuke iya. Baka ni Jehovah engka nyaut sampi iya? Iya engka meri menyadi nya pemerani kena minta chuti ari tuke iya. Tang menyadi nya agi patut betemu enggau tuke iya lalu minta. Iya engka patut ngereja tu mayuh kali. Iya mega engka patut minta ngambika ulih nukar shift enggau orang bukai. Lalu enti patut, iya engka ulih minta chuti enda begaji.

11. Nama kebuah kitai patut besampi mayuh kali pasal utai ti dikeirauka kitai?

¹¹ Jehovah ngarapka kitai besampi mayuh kali pasal utai ke dikeirauka kitai. (1 Tes. 5:17) Baka ke dipadah Jesus, sekeda ari peminta kitai enda disaut tekala nya. (Luk. 11:9) Nyadi, anang meh putus asa! Bebendar meh besampi lalu anang ngetu ngereja nya. (Luk. 18:​1-7) Lebuh kitai terus besampi pasal sesiti utai, kitai nunjuk ngagai Jehovah utai nya amat penting ba kitai. Kitai mega nunjukka diri andal Iya ulih nulung kitai.

12. (a) Nama siti tanya ti patut ditanya kitai bekaul enggau sampi kitai, lalu nama kebuah? (b) Baka ni kitai ulih nentuka sampi kitai ngayanka basa ngagai Jehovah? (Peda kutak “ Kati Sampi Aku Ngayanka Basa ngagai Jehovah?”)

¹² Enti kitai enda nerima utai ke disampika kitai, kitai engka ulih nanya diri empu tiga iti tanya. Tanya kesatu, ‘Kati aku besampika utai ti betul?’ Kesuah iya, kitai ngumbai diri nemu utai ti pemadu manah ke diri empu. Tang, utai ke dipinta kitai engka enda entu mai penguntung ke kitai. Enti kitai besampi pasal sesiti penanggul, engka bisi chara ti manah agi kena mutarka penanggul nya kelimpah ari chara ke dipinta kitai. Lalu sekeda utai ke dipinta kitai engka enda sejalai enggau peneka Jehovah. (1 Jhn. 5:14) Ambika chunto, peratika chunto apai indai ke dipadah tadi. Seduai iya besampi minta Jehovah nulung anak seduai iya mengkang ba pemendar. Utai ke dipinta seduai iya endang manah. Tang Jehovah enda ngansak sapa-sapa nyembah Iya. Iya dekaka semua kitai, nyengkaum bala anak kitai, milih deka nyembah Iya. (U-dat. 10:​12, 13; 30:​19, 20) Nyadi, apai indai nya ulih ngubah peminta seduai iya. Seduai iya ulih besampi minta Jehovah nulung seduai iya nyapai ati anak seduai iya. Enggau nya, anak seduai iya deka diperansang rinduka Jehovah lalu nyadi pangan Iya.—J-lam. 22:6; Eps. 6:4.

13. Nitihka Hebrew 4:​16, kemaya Jehovah deka nulung kitai? Terangka.

¹³ Tanya kedua, ‘Kati tu maya iya Jehovah nyaut sampi aku?’ Kitai engka ngumbai sampi kitai patut disaut tekala nya. Tang kebendar iya, Jehovah nemu ni maya ti pemadu sesuai kena nulung kitai. (Bacha Hebrew 4:16.) Lebuh kitai enda nerima utai ke disampika kitai tekala nya, kitai engka ngumbai saut  ari Jehovah nya ‘Enda ulih.’ Tang saut ari Jehovah engka ‘Bedau agi.’ Ambika chunto, perundingka menyadi lelaki ti biak ke disebut tadi. Iya besampi ngambika Jehovah ngeraika penyakit iya. Tang enti Jehovah ngaga kereja ajih lalu ngeraika iya, Sitan engka madah menyadi nya semina nyembah Jehovah laban Jehovah ngeraika iya. (Jop 1:​9-11; 2:4) Kelimpah ari nya, Jehovah udah netapka jam alai Iya deka ngeraika semua penyakit. (Isa. 33:24; Pem. 21:​3, 4) Nyadi, nyentuk ngagai maya nya, kitai enda ulih ngarapka Jehovah ngaga kereja ajih kena ngeraika kitai. Nya alai, nama utai ke ulih dipinta menyadi lelaki nya? Iya ulih minta Jehovah meri iya pengering enggau pengelantang ba runding ngambika ulih tan napi penyakit nya, lalu terus nyembah Jehovah enggau tetap ati.—Mas. 29:11.

14. Nama ulih dipelajarka nuan ari pengalaman Janice?

¹⁴ Perunding baru pasal pengalaman Janice. Iya besampi ngambika ulih gawa ba Bethel. Pengudah lima taun, nya baru iya faham pasal chara Jehovah nyaut sampi iya. Ku iya madah: “Dalam timpuh nya, Jehovah ngajar aku mayuh utai, lalu nulung aku nyadi orang Kristian ti manah agi. Aku sedar pengarap aku ngagai Jehovah patut dikemansangka agi. Aku patut belajarka Bup Kudus enggau dalam agi. Lalu, aku mega patut belajar, aku ulih gaga ati enda ngira nama pengawa ke dikereja aku ke Jehovah.” Nyau kelama, Janice enggau laki iya dikangau ba pengawa ngabas raban gempuru. Lebuh Janice ngenang baru, iya madah: “Jehovah bisi nyaut sampi aku, tang enggau chara ti enda dijangka aku. Aku begunaka awak kena faham, saut ari Jehovah nya kebendar iya siti pemeri ti manah. Aku amat beterima kasih laban bisi peluang ngasaika pengerindu enggau pemanah ati Iya.”

15. Nama kebuah kekadang kitai enda ibuh minta enggau kelalu nyemetak lebuh besampi? (Peda mega gambar.)

 ¹⁵ Tanya ketiga, ‘Kati aku patut besampika utai bukai?’ Amat, lebuh kitai besampi, manah agi enti kitai nyebut utai enggau nyemetak. Tang bisi maya iya, kitai enda ibuh besampi enggau kelalu nyemetak. Enggau nya, kitai ulih nemu peneka Jehovah ke kitai. Peratika baru chunto menyadi indu ke besampi ngambika ulih enggau Sekula Penginjil Perintah Petara. Iya deka enggau sekula nya ngambika ulih nulung ba endur ti begunaka mayuh agi penginjil. Nyadi, lebuh iya besampi ngambika ulih enggau sekula nya, iya mega ulih besampi minta Jehovah nulung iya ngiga chara bukai alai iya ulih ngereja mayuh agi ke Jehovah. (SKR. 16:​9, 10) Pengudah besampika tu, iya ulih nanya ngagai tuai ti ngabas enti bisi raban gempuru ti semak endur iya ke begunaka mayuh agi pengerintis. Tauka iya mega ulih nulis ngagai pampang opis lalu nanya enti bisi endur ti begunaka mayuh agi penginjil. e

16. Nama utai ke ulih dikeandalka kitai?

¹⁶ Baka ke udah dikerandauka kitai, kitai ulih andal Jehovah deka nyaut sampi kitai enggau chara ti bepengerindu sereta lurus. (Mas. 4:3; Isa. 30:18) Kekadang kitai enda nerima saut ke dipinta kitai. Tang tu ukai reti iya Jehovah enda ningaka sampi kitai. Iya amat rinduka kitai, lalu Iya enda sekali-kali deka ninggalka kitai. (Mas. 9:10) Nyadi, terus meh ‘manggaika pengarap kitai berari ba Petara.’ Padahka semua utai ke bisi dalam ati nuan ngagai Iya nengah sampi.—Mas. 62:8.