1. Nama dikedekaka kitai ba diri sebilik?

 SEIKU menyadi Kristian indu ke benama Pauline b madahka: “Sekumbang belajarka pemendar, aku deka kami sebilik diau ba Paradais. Kelebih agi aku deka laki aku, Wayne, enggau anak kami duai sama nyembah Jehovah.” Kati nuan bisi diri sebilik ke bedau nemu pasal Jehovah? Baka Pauline, nuan engka deka diri sebilik sama enggau nuan nyembah Jehovah.

 2. Nama tanya ke deka dikerandauka kitai ba artikel tu?

² Kitai enda ulih ngansak diri sebilik nerima pemendar, tang kitai ulih meransang sida berunding sereta ninga pesan ari Bup Kudus. (2 Tim. 3:14, 15) Nama kebuah kitai patut nginjil ngagai diri sebilik? Nama kebuah kitai patut nguji meretika asai ati sida? Nama ulih digaga kitai kena nulung diri sebilik rinduka Jehovah? Lalu baka ni semua bala menyadi ba eklisia ulih nulung kitai?

 3. Nitihka 2 Peter 3:9, nama kebuah kitai patut nginjil ngagai diri sebilik?

³ Enda lama agi, Jehovah deka muai penyai ba dunya tu. Semina sida ke “bisi pengingin deka bulih pengidup ti meruan belama iya” deka selamat. (SKR. 13:48, NW) Kitai ngena mayuh awak enggau pengering nginjil ngagai orang bukai. Nya alai, kitai mega tentu deka nginjil ngagai diri sebilik ngambika sida nyembah Jehovah enggau kitai. Jehovah, Apai kitai ti bepengerindu, “enggai nejuka indah siku [kitai] dirusak, tang semua nesal ati.”—Bacha 2 Peter 3:9.

 4. Nama penyalah ke engka digaga kitai lebuh nginjil ngagai diri sebilik?

 ⁴ Kitai patut ingat, bisi chara ti betul sereta salah lebuh bekunsika pesan ari Bup Kudus. Ambika chunto, kitai engka bejaku manah lebuh nginjil ngagai orang ti enda dikelala. Tang lebuh nginjil ngagai diri sebilik, kitai engka enda berundingka asai ati sida.

 5. Nama patut dikingatka kitai sebedau bekunsika pemendar ari Bup Kudus ngagai diri sebilik?

⁵ Lebuh ngenang baru chara kitai nginjil ngagai diri sebilik suba, kitai engka nesalka nya laban chara kitai bejaku enggau sida enda tentu manah. Lalu kitai engka ngasaika diri patut bejaku manah agi enggau sida. Rasul Paul ngelalau orang Kristian: “Awakka jaku kita seruran badas sereta ngenyamaika ati orang, ngambika kita nemu jalai kita patut nyaut semua orang.” (Kol. 4:5, 6) Kitai patut ingatka jaku lalau tu lebuh nginjil ngagai diri sebilik. Enti enda, kitai engka ngemediska ati sida, ukai nulung sida mendingka pesan Bup Kudus.

6-7. Padahka siti chunto kebuah nya beguna bendar orang Kristian meretika asai ati kaling pengidup ke enda nyembah Jehovah.

⁶ Nguji meretika asai ati sida. Pauline ke disebut tadi, madahka: “Terubah aku semina deka bejaku pasal Petara enggau Bup Kudus aja ngagai laki aku. Kami duai enda berandau pasal pekara besehari-sehari.” Tang, laki Pauline, Wayne, semina nemu mimit aja pasal Bup Kudus lalu enda tentu meretika utai ku Pauline. Ba iya, Pauline semina berunding pasal pengarap diri aja. Nya alai, iya irau enggaika Pauline nitihka jalai pengarap ti tesat.

⁷ Pauline ngaku, iya ngena mayuh awak begulai enggau bala menyadi Kristian maya lemai hari sereta ujung minggu—ba gempuru, ba pengawa nginjil, sereta lebuh beserumpu makai. Ku Pauline madahka: “Kadang-kadang  nadai orang ba rumah lebuh Wayne pulai. Nya alai, iya berasai sunyi.” Endang amat, Wayne deka anak bini iya begulai enggau iya. Iya enda nemu sapa ke begulai enggau seduai iya. Wayne ngasaika Pauline ngemeratka agi bakih baru iya, ukai iya. Ketegal tu, iya ngemba deka sarak enggau Pauline. Ulih nuan mikirka chara Pauline tau ngayanka diri meretika asai ati laki iya?

 8. Nitihka 1 Peter 3:1, 2, nama utai ke diperatika diri sebilik?

⁸ Ayanka ulah ti manah. Kesuah agi, diri sebilik meratika ulah kitai enti dibandingka enggau utai ke disebut kitai. (Bacha 1 Peter 3:1, 2.) Udah nya, Pauline nyau sedarka utai tu. Ku iya madah: “Aku nemu Wayne sayauka kami lalu iya ukai amat-amat deka sarak. Tang jaku iya ke deka minta sarak ngasuh aku sedar, aku patut nitihka jaku Jehovah pasal tikah. Ari ke mayuh bejaku, aku patut netapka teladan ti manah nengah ulah.” Pauline badu ngansak Wayne berandau pasal Bup Kudus, lalu iya berengkah berandau enggau Wayne pasal utai ke diguna besehari-sehari. Wayne beratika bini iya nyau enda tentu agi ngansak iya, lalu anak seduai iya ngembuan basa sereta ngasi. (J-lam. 31:18, 27, 28) Lebuh Wayne beratika asil manah ke dibai pesan Bup Kudus ngagai sida sebilik, iya berengkah berunding lalu ninga pesan ari Bup Kudus.—1 Kor. 7:12-14, 16.

 9. Nama kebuah kitai patut majak nguji nulung diri sebilik nemu pemendar ke bisi ba Bup Kudus?

⁹ Majak nguji nulung diri sebilik. Jehovah netapka teladan ke kitai. Iya “majak” meri orang peluang ninga berita manah lalu bulih pengidup. (Jer. 44:4) Indah rasul Paul meransang Timoti majak nulung orang. Nama kebuah? Enggau ngereja nya, Timoti deka nyelamatka  diri empu enggau orang ke mendingka iya. (1 Tim. 4:16) Kitai rinduka diri sebilik, nya alai kitai deka sida nemu pemendar ke bisi ba Bup Kudus. Nyau kelama, ulah enggau jaku Pauline meri asil ti manah ngagai sida sebilik. Diatu iya gaga ati laban laki iya nyembah Jehovah. Seduai iya bela nyadi pengerintis, lalu Wayne nyadi tuai gempuru.

10. Nama kebuah kitai patut sabar?

¹⁰ Sabar. Lebuh kitai mutus deka ngasika Jehovah, kitai ngaga ubah ba pengidup sereta utai ke dipechaya kitai pengudah nyadi Saksi. Diri sebilik engka tusah deka nerima ubah tu. Kesuah agi, utai ke dulu diperatika sida iya nya kitai enda agi enggau politik sereta enda agi nyambut pengerami ke bekaul enggau pengarap. Terubah iya, sekeda diri sebilik engka pedis ati ngagai kitai. (Mat. 10:35, 36) Tang kitai anang ngumbai sida enda ulih berubah. Enti kitai enggai agi nulung sida meretika utai ke dipechaya kitai, reti nya kitai baka ke ngakim sida, ngumbai sida enda layak bulih pengidup ti meruan belama iya. Jehovah nadai meri kitai hak ngakim orang. Pengawa nya diberi Iya ngagai Jesus. (Jhn. 5:22) Enti kitai sabar, nyau kelama diri sebilik engka deka mendingka pesan ke dikunsi kitai.—Peda kutak “Ngajar Ngena Laman Web Kitai.”

11-13. Nama dipelajarka nuan ari chara Alice ngintu apai indai iya?

¹¹ Nelap tang anang ngelakka sida ngubah pemutus nuan. (J-lam. 15:2) Peratika chunto Alice. Iya belajar pasal Jehovah lebuh iya diau jauh ari apai indai iya ke enda pechayaka Petara sereta balat enggau politik. Alice nemu, iya patut tumu madah ngagai apai indai pasal utai manah ke dipelajar iya. Ku Alice madah: “Enti nuan betangguh madah pasal utai baru ke dipechaya sereta digaga nuan, sida deka tusah nerima pekara tu.” Iya nulis surat ngagai apai indai iya, nanya pasal runding seduai iya bekaul enggau ajar Bup Kudus ke engka ngerinduka ati seduai iya, baka pengerindu. (1 Kor. 13:1-13) Iya madahka diri beterima kasih ngagai apai indai iya laban udah ngemesai sereta nyaga iya, lalu ngirumka seduai iya hadiah. Lebuh nemuai, Alice nulung indai iya ngereja pengawa ba rumah. Terubah iya, apai indai iya enda tentu gaga lebuh iya madahka pasal pengarap baru iya.

¹² Lebuh Alice ba rumah apai indai iya, iya tetap macha Bup Kudus ninting hari. Ku Alice madah: “Aku ngereja tu ngambika indai nemu macha Bup Kudus nya beguna ba aku.” Lalu apai Alice mutus deka belajar pasal Bup Kudus ngambika ulih meretika kebuah anak iya berubah. Iya mega deka ngiga penyalah ba Bup Kudus. Ku Alice baru: “Aku meri apai Bup Kudus. Aku nulis pesan ba siti keretas lalu nyelitka nya dalam Bup Kudus.” Nama asil iya? Utai ke dibacha balat negu ati apai Alice, lalu iya nadai tetemuka penyalah ari utai ke dibacha iya.

¹³ Kitai patut nelap tang anang ngelakka diri sebilik ngubah pemutus ke digaga kitai, taja pan napi penguji. (1 Kor. 4:12b) Ambika chunto, Alice natka diri disakal indai iya. Ku Alice: “Lebuh aku dibaptisa, indai ngumbai aku enda sayauka iya.” Nama digaga Alice? Ku iya agi: “Ari ke nyeliahka diri bejaku pasal pengarap baru aku, aku enggau basa nerangka pemutus aku ke deka nyadi seiku ari Saksi-Saksi Jehovah lalu aku tetap enggau pemutus aku. Aku nguji ngasuh indai pechaya, aku sayau amat ke iya. Kami duai bela nyabak, lalu aku manduk pemakai ti nyamai ke iya. Kenyau ari nya, indai berengkah nemu Bup Kudus ngubah aku nyadi orang ti manah agi.”

14. Nama kebuah kitai enda tau ngelakka diri sebilik ngubah pemutus kitai ke deka nyembah Jehovah?

¹⁴ Diri sebilik endang begunaka awak ti lama kena meretika kebuah kitai nyembah Jehovah. Ambika chunto, lebuh Alice mutus deka nyadi  pengerintis ari ke ngereja pengawa ke dipilih apai indai iya, indai iya nyabak. Tang Alice tetap enggau pemutus diri. Ku iya madah: “Enti nuan ngelakka diri sebilik ngubah pemutus ke digaga nuan ba siti pekara, sida tentu deka ngubah pemutus nuan ba pekara bukai. Tang enti nuan nelap, lalu enda ngelakka sida ngubah pemutus ke digaga nuan, sekeda ari sida engka mendingka nuan.” Tu meh utai ke nyadi ba Alice. Diatu apai indai iya bela nyadi pengerintis, lalu apai iya nyadi tuai gempuru.

15. Nitihka Matthew 5:14-16 enggau 1 Peter 2:12, baka ni “pemadas pengawa” bala menyadi Kristian ulih nulung orang ke sebilik enggau kitai?

¹⁵ Jehovah ngena “pemadas pengawa” nembiak Iya kena mai orang semak ngagai Iya. (Bacha Matthew 5:14-16; 1 Peter 2:12.) Enti kaling pengidup nuan ukai seiku ari Saksi-Saksi Jehovah, kati iya udah kala betemu enggau bala menyadi Kristian ba eklisia? Pauline ke disebut tadi mai bala menyadi ngagai rumah iya ngambika laki iya, Wayne, ngelala sida. Wayne ngenang baru baka ni seiku menyadi ke lelaki nulung iya ngelala sapa Saksi-Saksi Jehovah kebendar iya. Iya ngambi chuti sehari laban deka enggau Wayne meda program main bol ba TV. Lalu ari tu Wayne nemu, menyadi nya pan bisi utai bukai ti dikerinduka kelimpah ari pengarap.

16. Nama kebuah kitai patut mai diri sebilik datai ngagai gempuru?

¹⁶ Siti chara ti pemadu manah ke ulih dikena nulung diri sebilik iya nya mai sida datai ngagai gempuru. (1 Kor. 14:24, 25) Keterubah kali Wayne datai ke gempuru iya nya, maya Ngingatka Pemati Jesus laban pengawa nya dipejalaika pengudah iya abis kereja lalu pengawa  nya enda lama. Ku Wayne madahka: “Aku enda nemu utai ke disebut ba cheramah nya. Tang utai ti ngerinduka ati aku iya nya lebuh sida ngelaluka penatai aku sereta betabi enggau aku. Ari tu aku ulih meda, sida orang ti manah.” Sepasang laki bini amat manah enggau Pauline. Seduai iya nulung Pauline enggau anak iya ba gempuru sereta ba pengawa nginjil. Nya alai lebuh Wayne mutus deka nemu mayuh agi pasal pengarap baru Pauline, iya minta menyadi lelaki nya ngajar iya Bup Kudus.

17. (a) Kitai anang nyalahka diri empu ketegal nama? (b) Nama kebuah kitai enda patut ngetu nulung diri sebilik nyembah Jehovah?

¹⁷ Kitai dekaka semua diri sebilik nyembah Jehovah. Taja pia, bisi mega ke tetap enggai nerima pemendar taja pan kitai udah bebendar nulung sida ngambika nyembah Jehovah. Enti pia, kitai anang nyalahka diri empu laban pemutus nya bepanggai ba sida empu. Nambahka nya, kitai enda ulih mejal orang nerima pengarap kitai. Tang enti diri sebilik meda nuan gaga ati ketegal nyembah Jehovah, tu ulih meransang sida ngembuan runding ti manah pasal kitai. Besampi meh ke sida. Bejaku enggau bejimat lebuh nginjil ngagai sida. Anang ngetu nulung sida! (SKR. 20:20) Andalka Jehovah deka merekatka pengawa nuan. Lalu enti diri sebilik deka mendingka pesan ari Bup Kudus ke ditusui nuan, sida deka diselamatka!